34
Elihu ni Cathut lannae a pâpho
1 Elihu ni rekrek a pathung teh,
2 Nangmouh a lungkaangnaw ka lawk heh thai awh,
Nangmouh panuenae katawnnaw, na hnâpakeng awh.
3 Bangkongtetpawiteh, ka kâko ni rawca atuinae a patek e patetlah,
hnâ ni lawk hah a tanouk van.
4 Maimouh roeroe ni lannae teh, kârawi awh haw sei.
Ahawinae hah bangmaw tie hah maimae thung hoi panuek awh haw sei.
5 Bangkongtetpawiteh, Job ni kai teh ka lan,
hateiteh, Cathut ni ka lannae a la
6 Ka lannae e kong dawk ka laithoe han na maw,
kâtapoenae ka tawn hoeh nakunghai ka hmâ teh,
ka dam thai hoeh e doeh toe, telah a ti.
7 Panuikhainae hah tui patetlah ka net e,
Job patetlah apimaw kaawm.
8 Payonnae kasaknaw hoi kamyawng e,
tamikathoutnaw hoi ka cet e apimaw kaawm.
9 Bangkongtetpawiteh, Cathut koe lunghawi e heh,
tami ni banghai hawinae awm hoeh telah ati toe
10 Hatdawkvah, panuethainae katawnnaw na thai pouh haw,
kathoute ka sak e teh, Cathut hanelah roeroe coung thai hoeh,
yonnae ka sak e teh, Athakasaipounge hanelah khoeroe coung thai hoeh.
11 Bangkongtetpawiteh, tami hah a sak e patetlah ama ni a patho han,
tami pueng a tawksak e hoi kamcu lah tawkphu kamcu lah a poe han.
12 Cathut ni kahawihoeh poung lah sak mahoeh,
nahoeh pawiteh, Athakasaipounge ni lannae teh,
khoeroe kamlang takhai mahoeh.
13 Apinimaw ama teh talai e thaw a poe,
talai van pueng heh apinimaw ama a uk sak.
14 Ama ni tami teh a ngainae awm hoeh pawiteh,
kai e hringnae kâha hah lat boipawiteh,
15 Takthai pueng reirei a kahma han
tami teh vaiphu lah bout a ban han.
16 Thaipanueknae na tawn awh pawiteh, Kâlawk pawlawk heh thai awh haw.
17 Lannae ka hmuhma e ni a uk han namaw,
Kalan ni teh athakaawme hah, yon na pen thai namaw.
18 Nang teh banghai cungkeinae na awm hoeh telah, siangpahrang koe dei pouh han.
19 Hateiteh, ahni ni bawi hai kapeknae tawn hoeh,
Tami tangreng hoi roedeng hoi kapeknae ka tawn hoeh e doeh.
Bangkongtetpawiteh, abuemlahoi amae kutsaknaw doeh.
20 Karumsaning tawkkadek a due awh teh,
taminaw pueng hah a kâhuet awh teh, koung a kahma awh,
tami athakaawme hai tami e kut laipalah be kahmat lah a la pouh.
21 Bangkongtetpawiteh, a mit teh tami e lamthung dawk ao teh,
a khoktakan puenghai be a hmu,
22 Yonnae kasaknaw, amamouh kâhro nahane hmuen awmhoeh,
duenae tâhlip hai awm hoeh.
23 Bangkongtetpawiteh, Cathut e hmalah lawkceng hane cei hanelah,
tami e kong bout pouk hane ama ni panki hoeh.
24 A kung rek khei ngai laipalah athakaawme taminaw hah koung a tâtueng han,
ahnimae hmuen dawk tami alouke o nahanelah ka poe han.
25 Hatdawkvah, ahnimouh ni a sak e pueng hah a panue teh,
karum vah ama ni a tâkhawng teh koung a kâbawng.
26 Tami ni a hmu thai e hmuen koe,
tamikathoutnaw patetlah a hem awh.
27 Bangkongtetpawiteh, ama hah a kamlang takhai awh,
a lamthung hah pouk raw pouk awh hoeh.
28 Hottelah karoedengnaw e lawk hah a hmalah a pha,
Bangkongtetpawiteh rektapnaw e lawk hah a ma ni a thai.
29 BAWIPA ni roumnae a poe torei teh, apinimaw rucatnae a poe thai han,
a minhmai a hro torei teh, apinimaw a hmu thai han,
miphun buet touh taranlahoi thoseh, tami buet touh taranlahoi thoseh,
30 Tamikahawihoeh e ni a uk hoeh nahanlah,
telah nahoeh pawiteh, tami pueng koung kaithi payon han.
31 Tami ni Cathut koehoi tounnae ka hmu toe.
Kai teh hawihoehnae ka sak mahoeh toe.
32 Ka hmu hoeh e hah na cangkhai haw, Payonnae hah ka sakpayon pawiteh, bout ka sak mahoeh toe.
33 Na lawkkamnae na pahnawt dawkvah, na sak e boiboelah na pathung han na maw.
Kai ni na hoeh, nang ni roeroe na kârawi han.
Hatdawkvah, na panue e hah deih.
34 Panue thainae katawnnaw hoi,
ka lawk ka thai e lungkaangnaw ni kai koe vah,
35 Job ni panuenae tawn laipalah lawk hah a dei,
a lawk hah lungangnae kaawm hoeh e naw doeh telah a dei awh.
36 Oe Job heh a pout totouh tanouknae lah awm yawkaw naseh,
bangkongtetpawiteh, lawk pathungnae hah tamikathoutnaw lawk pathungnae patetlah ao.
37 Bangkongtetpawiteh, a yonnae dawk taranthawnae a thap sin,
maimouh koevah, kut tambei teh,
Cathut taranlahoi lawk a pap telah a ti.