1 Izip hoi a tâco awh hnukkhu, kum hni nah kum, thapa yung pahni, apasuek hnin vah Sinai kahrawngum kamkhuengnae lukkareiim dawk BAWIPA ni Mosi hah a pato teh,

2 Isarel tamihu pueng hah a miphun lahoi, a imthung lahoi, a min kâtarui lahoi tongpa pueng koung touk haw, 3 kum 20 lathueng Isarelnaw thung dawk hoi taran ka tuk thai e naw pueng nang nama hoi Aron ni ahuhu lahoi koung na touk awh han. 4 Nang koe e miphunnaw pueng thung dawk hoi imthung kahrawikung buet touh koung ao awh han. 5 Hetnaw heh nang koe kaawm hane tami minnaw doeh.

Reuben dawk hoi Shedeur capa Elizur,

6 Simeon dawk hoi Zurishaddai capa Shelumiel,

7 Judah dawk hoi Amminadab capa Nahshon,

8 Issakhar dawk hoi Zuar capa Nethanel,

9 Zebulun dawk hoi Helon capa Eliab,

10 Joseph casak Ephraim dawk hoi Ammihud capa Elishama hoi, Manasseh dawk hoi Pedahzur capa Gamaliel,

11 Benjamin dawk hoi Gideoni capa Abidan,

12 Dan dawk hoi Ammishaddai capa Ahiezer,

13 Asher dawk hoi Okran capa Pagiel,

14 Gad dawk hoi Deuel capa Eliasaph,

15 Naphtali dawk hoi Enan capa Ahira Enan seh, atipouh.

16 Hetnaw heh tamimaya thung dawk hoi rawi e a na mintoenaw miphun dawk hoi kahrawikung Isarel imthung kahrawikungnaw doeh. 17 Hot patetlah Mosi hoi Aron ni min a kaw e hetnaw heh a ceikhai awh. 18 Tamimaya hah thapa yung pahni, apasuek hnin vah koung a kamkhueng awh teh, a na pa hoi, imthungnaw hoi kakhekungnaw, khetsin lahoi yah, kum 20 lathueng pueng teh kakhekungnaw hah ama buet touh min lahoi a kaw awh.

19 BAWIPA ni Mosi koe kâ a poe e patetlah Sinai kahrawngum vah a touk awh. 20 Isarel capa, a camin Reuben casak thung hoi a min kâtarui lah tongpa pueng kum 20 lathueng tarantuknae koe ka cet thai e, 21 Reuben miphun a touk awh e teh 46, 500 touh a pha awh.

22 Simeon casak dawk hoi a miphun lahoi imthungkhu lahoi a min kâtarui e patetlah tongpa pueng kum 20 lathueng tarantuknae koe ka cet thai naw, 23 Simeon casak a touk awh e naw teh 59, 300 touh a pha.

24 Gad catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng tarantuknae koe ka cet thai naw, 25 Gad miphun dawk a touk awh e teh 45, 650 touh a pha.

26 Judah catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 27 Judah miphun dawk a touk awh e teh 74, 600 touh a pha.

28 Issakhar catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 29 Issakhar miphun dawk a touk awh e teh 54, 400 touh a pha.

30 Zebulun catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 31 Zebulun miphun dawk a touk awh e teh 57, 400 touh a pha.

32 Joseph catounnaw dawk hoi Ephraim catoun hai imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 33 Ephraim miphun dawk a touk awh e teh 40, 500 touh a pha.

34 Manasseh catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 35 Manasseh miphun dawk a touk awh e teh 32, 200 touh a pha.

36 Benjamin catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 37 Benjamin miphun dawk a touk awh e teh 35, 400 touh a pha.

38 Dan catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 39 Dan miphun dawk a touk awh e teh 62, 800 touh a pha.

40 Asher catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 41 Asher miphun dawk a touk awh e teh 41500 touh a pha.

42 Naphtali catounnaw dawk hoi a miphun lahoi a imthungkhu lahoi, a min kâtarui e patetlah tongpa pueng kum 20 lathueng tarantuknae koe ka cet thai naw, 43 Naphtali miphun dawk a touk awh e teh 53, 400 touh a pha.

44 Hotnaw teh Mosi hoi Aron ni Isarel kahrawikung hlaikahni imthung kahrawikungnaw hai a touk awh e doeh. 45 Hot patetlah Isarel imthung abuemlahoi kum 20 lathueng taranruknae koe ka cet thai e naw pung Isarel lah koung a touk awh teh, 46 a touk awh e naw pueng teh 603550 touh a pha.

47 Hatei, ahnimouh thung dawk hoi Levihnaw kakhekung lah touk awh hoeh. 48 BAWIPA ni Mosi koevah, 49 Levih miphun teh na touk mahoeh. Isarel taminaw lahai na touksin mahoeh. 50 Bangkongtetpawiteh, Levihnaw teh lawkpanuesaknae lukkareiim hoi, hnopai khenyawnkung, haw e kaawm e naw pueng ka khenyawnkung lah na pouk awh han. Lukkareiim hoi a hnonaw pueng ka kâkayawt awh teh, ka khetyawt awh han. Bawknae rim a tengpam moi ao sin awh han. 51 Hote bawknae rim teh a tâcokhai hanlah ao toteh, Levihnaw ni a raphoe vaiteh, hote rim bout a thung awh han. Tami alouke miphun bawk pawiteh thei lah ao han.

52 Isarelnaw ni amamouh o nah tangkuem koe ahuhu lahoi apap e lahoi lukkareiim teh a sak awh han. 53 Levihnaw a pâlei teh, kamkhueng e Isarelnaw lathueng vah a lungkhueknae ao hoeh nahan, Cathut onae im a tengpam vah a roe awh vaiteh, Levihnaw ni lawkpanuesaknae bawknae im teh, a khetyawt awh han. 54 Hot patetlah Isarelnaw ni BAWIPA ni Mosi koe kâ a poe e patetlah a sak awh.