9
Lungangnae lamthung
1 Lungangnae ni a im a sak teh
khom sari touh a ung.
2 Moi a thei teh misurtui a phunphun hoi
a kalawt teh ca hanelah caboi van a pâtoum.
3 A san tanglanaw a patoun teh,
khopui hmuenrasang koehoi a oung awh.
4 Kamawngrame pueng hi lavah kamlang awh naseh.
Oe, thaipanueknae kavoutnaw hai tho awh.
5 Kaie vaiyei hah cat awh.
Aphunphun kalawt e misurtui hah net awh a ti.
6 Kamawngrame hah cettakhai awh nateh, hring awh.
Hahoi thaipanueknae lamthung hah dawn awh.
7 Ayâ ka dudam e tami hah ka yue e teh, yeirai a po han.
Tamikathout ka yue e teh pacekpahleknae a kâhmo han.
8 Ayâ ka dudam e tami hah na yue pawiteh, na hmuhma han.
Tamilungkaang e na yue pawiteh, ahni ni na lungpataw han.
9 Tamilungkaang hah yue haw, a lung hoe a ang han.
Tamikalan hah pâtu haw thoumthainae a kâthap han.
10 BAWIPA takinae teh lungang kamtawngnae a kung doeh.
Kathounge Cathut panue e teh thaipanueknae doeh.
11 Bangkongtetpawiteh, na hnin hah kai ni ka pap sak vaiteh,
na hringyung kum na thap pouh han.
12 Na lungang pawiteh, na lungangnae phu na hmu han.
Na dudam pawiteh, nama ni na khang han.
Pathunae lamthung
13 Napui pathu teh a hramki teh,
kamawngrame lah ao dawkvah, banghai panuek hoeh.
14 A im takhang koe a tahung teh,
khopui hmuen rasang tahungnae koe a tahung.
15 Lam dawk amamae lamthung dawk
kacetnaw hah a kaw teh,
16 kamawngrame pueng hivah tho awh,
lungangnae ka tawn hoeh naw,
17 paru e tui teh a radip, arulahoi ca e vaiyei teh
hoe a tui telah ouk a ti.
18 Hatei, hawvah tamikadoutnaw ao teh,
amae imyinnaw teh adungnae koe sheol dawk ao awh tie hah
hote tongpa ni panuek hoeh.