9
BAWIPA lawkcengnae dawk lunghawi lawk dei ratoumnae
Kathutkung: Devit
1 Oe BAWIPA, ka lungthin abuemlahoi na pholen han.
Na sak e kângairu hno pueng ka dei han.
2 Nang dawk konawm lahoi ka nawm han.
Oe Lathueng Poung, na min pholen hoi la ka sak han.
3 Ka tarannaw a ban awh toteh,
na hmalah tâlaw awh naseh, rawk awh naseh.
4 Bangkongtetpawiteh, bawitungkhung dawk tahung hoi
lannae hoi lawk na ceng teh,
ka lannae hoi coungnae hah na cak sak.
5 Miphunnaw hah na yue teh,
tamikathoutnaw hah na raphoe teh,
ahnimae min teh ayungyoe hoi a yungyoe totouh na raphoe toe.
6 Oe ka tarannaw, rawknae teh a yungyoe poutnae koe a pha toe.
Khopui teh na raphoe teh noutnae ao hoeh totouh a kahma toe.
7 Hatei, BAWIPA teh a yungyoe a kangning.
Lawkceng nahanelah bawitungkhung teh a rakueng toe.
8 Lannae lahoi talaivan heh lawkceng vaiteh,
a lannae dawk lawkcengnae hah taminaw hanelah a cak sak.
9 BAWIPA teh repcoungroenaw hane lahai rapanim lah ao teh,
runae kâhmo nah kâhronae lah ao han.
10 Na min kapanueknaw ni nang na kâuep awh han.
Bangkongtetpawiteh, BAWIPA,
nang katawngnaw teh na cettakhai boihoeh.
11 Zion kaawm e naw, BAWIPA pholen hoi la sak awh.
A sak e hno hah taminaw koe pâpho awh.
12 Thipaling phu moi a pathung toteh, pahnim hoeh.
Kârahnoumnaw e hram lawk hai pahnim hoeh.
13 Oe BAWIPA, na pahren haw.
Na kahmuhmanaw kecu dawk ka runae hah pouk haw.
Nang teh duenae longkha thung hoi na kahloutsakkung doeh.
14 Hottelah, nang pholennae pueng hah,
Zion canu longkha koehoi roeroe ka pâpho thai nahanlah,
na rungngangnae dawk ka konawm han.
15 Miphunnaw teh amamouh ni a tai awh e tangkom dawk koung a bo awh.
Arulahoi a patung awh e tangkam dawk a khok a kâman awh.
16 BAWIPA teh lawk a ceng e patetlah panue thai.
Tamikathoutnaw teh amamouh ni a sak e hno dawk a kâman awh.
17 Tamikathoutnaw teh Cathut ka pahnim e
miphunnaw hoi sheol dawk a kak awh han.
18 Bangkongtetpawiteh, kavoutthoupnaw teh pahnim lah pou awm awh mahoeh.
Karoedengnaw, e ngaihawinae hai pou kahmat mahoeh.
19 Oe BAWIPA thaw haw, tami ni na tâ hanh naseh.
Miphunnaw teh na mithmu vah lawkceng lah awm awh naseh.
20 Oe BAWIPA, miphunnaw ni tami lah
ao awh e a panue awh nahanelah,
lungpuennae dawk tat haw. Selah.