55
Yuemkamcu hoeh e hui kong dawk Cathut kâuepnae
Kathutkung: Devit
1 Oe Cathut, ka ratoumnae hah na thai pouh haw,
nang koe kâhei navah na kâhrawk takhai hanh.
2 Na thai pouh haw, na pato haw.
Ka reithainae dawkvah, pou ka phuenangnae kâhat thai hoeh.
3 Bangkongtetpawiteh, ka tarannaw pawlawk hoi,
tamikathoutnaw ni repcoungroenae kecu dawk,
runae kai dawk a pha sak teh, lungkhuek laihoi na hmuhma awh.
4 Ka lungthin teh ka lung thung puenghoi a pataw teh,
due takinae ni na tho sin.
5 Takinae hoi pâyawnae ni na tho sin teh,
kaluenae ni na ramuk.
6 Oe bakhu patetlah rathei tawn ka ngai.
Hottelah ka tawn pawiteh, vi kamleng vaiteh, duem kâhat han eite.
7 Ahlanae koe ka cei vaiteh,
kahrawng vah ka o han eite. Selah.
8 Hete kahlî tûilî ka tho e hoi ka hlout nahanlah,
karanglah ka yawng han toe telah ka pouk.
9 Oe BAWIPA, ahnimae lawk hah a kahma nahanlah,
koung kâkapek sak haw. Bangkongtetpawiteh,
kho thung vah, thamanae hoi lawpnae ka hmu.
10 Karum khodai pout laipalah, rapan dawk hoi a kâhêi awh teh,
kho thung vah thoenae hoi runae lah ao awh,
11 Kho thung vah thoenae ao teh,
repcoungroenae hoi dumnae teh lamnaw dawk ao.
12 Kai na ka pathoe e teh ka taran nahoeh.
Hoehpawiteh, ka pouk thai han ei.
Na ka taran ni teh kai na ka hmuhma e hai ka taran nahoeh.
Hoehpawiteh, ahni hah ka roun thai han ei.
13 Hottelah ka tet e tami teh nang doeh.
Kai hoi kâtakawi e ka hui, ka kâpanuek e doeh.
14 Buet touh hoi buet touh lawk kapan e,
Cathut im dawk tamimaya hoi reirei ka cet e doeh.
15 Duenae ni man naseh.
Hringo hoi sheol dawk cet naseh.
Bangkongtetpawiteh, hawihoehnae teh ahnimouh koe ao.
16 Kai teh Cathut ka kaw vaiteh,
BAWIPA ni na rungngang han.
17 Amom, kanîthun, tangmin lah ka ratoum han.
Kacaipounglah ka hram vaiteh, ka lawk hah a thai han.
18 Kai taranlahoi na tuknae hmuen koehoi,
ka hringnae heh karoumcalah a ratang toe.
Kai koelah kaawm e teh apap awh.
19 Ayan hoi kangning e Cathut ni a thai teh,
ahnimouh hah a khang sak han. Selah.
Ahnimouh teh a kâthung awh hoeh dawkvah, Cathut taket awh hoeh.
20 Ahnimouh teh hui hah a taran awh teh,
lawkkam a raphoe awh.
21 Apâhni hoi a dei awh e lawk teh,
maito sanutui kamkak e hlak a pâhnan.
Hatei, a lungthung tarankâtuknae ao.
A lawk teh satui hlak a nem eiteh,
rayu tangcoung e tahloi lah doeh ao.
22 Na hnokari hah BAWIPA dawk patue haw, ama ni na hlai han.
Tami kalan rawp hane pasoung hoeh.
23 Oe Cathut, alouknaw teh rawknae tangkom dawk koung na pabo han.
Tamikathetnaw hoi yuemkamcuhoeh e naw teh,
a hringyung tangawn patenghai hring awh mahoeh.
Kai teh nang doeh na kâuep han.