88
Lungpoutnae hoi kabawp heinae
Kasakkung: Korah Capa Heman
1 Oe BAWIPA kaie rungngangnae Cathut,
na hmalah karum khodai ka hram.
2 Na hmalah ka ratoumnae phat naseh,
ka hramnae heh na thai pouh haw.
3 Ka hringnae teh runae hoi a kawi teh,
Sheol phuen teng rek ka pha toe.
4 Tangkom dawk kâennaw hoi mek touksin lah ka o teh,
thaonae ka tawn hoeh e patetlah ka o.
5 Taran ni a thei teh tangkom dawk pakawp e patetlah,
tami kadoutnaw koe tâkhawng lah ka o teh,
pouk hoeh e kabawp hoeh e patetlah ka o.
6 Tangkom dawk a dengnae koe, adungnae koe,
a hmo poungnae koe vah na ta.
7 Na lungkhueknae ni na ratet teh,
na tuicapa ni na ramuk. Selah.
8 Ka panue e naw hah kai koehoi ahlanae koe na ta teh,
ahnimouh hanlah panuettho e lah na coung sak.
na taren sin teh ka tâcawt thai hoeh toe.
9 Runae kecu ka mit a mom.
Hnintangkuem BAWIPA ka kaw teh, ka kut nang koe ka dâw.
10 Tami kadoutnaw hanlah kângairu na sak han na maw.
Tamikadout thaw vaiteh, na pholen han na maw. Selah.
11 Na lungpatawnae teh phuen koe pâpho vaiteh,
yuemkamcu lah na onae hah
duenae hmuen koe pâpho han na maw.
12 Kângairu na sak e hah hmonae koe panue han na maw.
Na lannae teh pahnim e ram dawk panue thai han na maw.
13 Hatei, Oe BAWIPA, nang koevah ka hram.
Amom ka ratoumnae nang koe a pha han.
14 BAWIPA bangkongmaw ka hringnae hah na tâkhawng.
Bangkongmaw kaimouh koehoi na minhmai na hro.
15 Ka camo nah hoi runae ka khang teh, due hane coungkacoe ka o toe.
Taki na thonae hah ka khang teh
kabawmkung ka tawn hoeh.
16 Na lungkhueknae ni na ramuk teh,
taki na thonae ni na raphoe toe.
17 Hotnaw ni tui patetlah kanîloum totouh
pou na ramuk teh na kalup.
18 Ka pahren e hoi ka huikonaw heh ahlanae koe a ta teh,
ka panue e naw hai hmonae koe na o sak.