18
1 Lijou'ma aixim'ma ƚocuena capaluc quema'a imuyonni lema'a. Acueca' apaxi iƚque. Epalc'o'i'ma jahuay li'a ƚamats'. 2 Acueca' y axpaiqui' lipalai'ma. Ipalai'ma ujfxi, tuya'e':
“¡Joupa ecangemma, i'ipa camats' al cuecaj quiƚya' Babilonia!
Itsiya ailopa'a xanuc' iƚpiya, timana' ma le'a lontahue.
Iƚpiya timana' lan xujc'a contahue, timana' lan xujc'a cacaƚ'hui naiyulpá, iƚniya pe lan xanuc' texits'eyi.
3 Luyaipa quitine tixoqui quileta lan xanuc' quiyouyomma lan nación tiyeyi titsulfoƚaiyi jiƚpe al cuecaj quiƚya'.
Iƚiya liƚya' ti'onƚcospa to quixcay caca'no', i'e'mola' lan xanuc' camac'ta to lisnaye.
Lan rey nomana' li'a ƚamats' tihuejyi liƚya' to mihuejyi ƚixcay caca'no'.
Nocucalepá ti'najnufyi locujyacu, ticujconayi ulij'me acuecaj quiƚ'huexi.”
4 Aicuej'ma ƚocuena tipalay pu'hua lema'a, timila' lixanuc' ȽanDios:
“Imanc' aixanuc' tolipalunca jiƚpiya liƚya'.
Ja'ni aimolipalumma tonƚ'e'me lixcay to lo'epa iƚpiya.
Tijouƚa' imanc' jouc'a lan xanuc' nomana' jiƚpe liƚya' titeƚ'mim'molhuo' anuli.
5 Axpe' camats' ti'eyi juaiconapa lixcay.
Iƚe liƚpixcay i'ipa to anuli cal cuecaj quijuala, icula'apa icuaita lema'a.
Itsiya ƚinca, ȽanDios aimiƚonc'e'eyacola' liƚjunac'.
6 Iƚiya liƚya' ma to li'e'epolhuo' imanc' toƚ'e'econtsa xonca.
Iƚe lixcay li'epa, toƚpai'iconƚe oquemma.
Ihuants'i lixcay loƚsnapa, imanc' toƚhuants'i'me xonca lixcay loxnaya.
7 Iƚiya liƚya' i'epoxi to acuecaj caca'no', iƚque nipajmpa ac'a, tenant'ƚi jahuay lojanajpa.
Itsiya imanc' toƚteƚ'miƚe juaiconapa, tixinƚa' acuecaj cumla, tixhueƚcoƚa', tijojla'.
Luyaipa quitine ticua: ‘Jifa'a cacutsu, cacuxe to cal cuecaj quincuxepa.
Iya' a'i nimpotsate, jouc'a aimaƚ'iya toƚta'a.
Aicaxhueƚcoya ni cajojya, ni anulemma.’
8 Iƚe linespa aiquixpic'e ȽanDios, toƚiya icuaico'ma lateƚcoya.
Iƚe litine jiƚpe liƚya' lan xanuc' tixim'me lamaya, tixim'me lumemma, tixhueƚmot'ƚe'me, tijojhuaƚque'me.
Ƚipaƚ cunga tipi'e'ma nulemma liƚya', ti'i'ma capi', tejac'e'ma.
Tipa'a acueca' lipujfxi ƚaƚPoujna ȽanDios, iƚque Noteƚ'miya iƚe liƚya'.”
9 Lan rey nomana' li'a ƚamats' tixim'me tif'aqui ƚicuxis mepi liƚya'. Luyaipa quitine iƚne lan rey ac'a lomajmpa jiƚpe al cuecaj quiƚya'. To cal xujc'a caca'no' iƚque liƚya' tepi'ila' lojanajpa. Itsiya iƚniya tijolijyi, tija'ayi. 10 Tecaxoƚyi aculi'. Tixpailiquila'. Ƚunga tipi'enni jiƚiya liƚya', timiyi:
“¡Babilonia, ima' uncuecaj quiƚya'!
¡Ima' mujfxi quiƚya'!
Joupa ixcaiyoƚpo', uncuanuc', aiquicoƚi loteƚcopa.
Tijouƚa' ma le'a to anuli 'hora joupa eteƚquemmo'.”
11 Nocucalepá nomana' li'a ƚamats' jouc'a tijolijyi, tixhueƚcoyi acueca' quihuotsoqueya. Itsiya, ¿naitsi no'najá ts'iƚtaic' iƚniya? Ailopa'a no'najá. Joupa eteƚquemma liƚya'. 12 Iƚniya nocucalepá iƚtaic' al 'oro, al plata, lapic' acueca' quipitali, jouc'a lam perla. Iƚtaic' al c'a quijahua' al fujca, jiƚiya cuftine lino, jouc'a lijahua' ummangaic' unxaƚcumi jouc'a unxali. Jouc'a iƚtaic' lijahua' aseda. Iƚtaic' al c'a c'ec, tujuej c'a, iƚtaic' lilajncopa amárfil, iƚtaic' lilajncopa al c'a c'ec acueca' quipitali, iƚtaic' lilajncopa abronce, lilajncopa atejma', iƚtaic' lilajncopa ƚapic cuftine mármol. 13 Iƚtaic' cal canela, jouca' ƚupa c'ec ƚojuepa c'a, jouc'a ƚipa' c'ec, jouc'a licat'ƚa al 'ec cuftine mirra, jouc'a al 'ec cuftine olíbano. Iƚtaic' al vino, laceite, jouc'a cal 'harina trigo, jouc'a lan trigo. Iƚƚecola' lam mot'ƚ, jouc'a locuenaye quinneja. Jouc'a iƚƚecola' laihuale, iƚƚecola' lan carro jouc'a liƚxanuc' joupa i'nampola'. Jouc'a iƚƚecola' locuenaye lan xanuc' ticuj'me. 14 Nocucalepá timiyi liƚya':
“Iƚe lofjanajpa aimapenufconaya, jahuay al c'a loftepa joupa ailopa'a.
Al c'a lopijahua', jahuay ƚola'acoyoxi, joupa ejac'pa nulemma, aimoxingonaya.”
15 Nocucalepá jouc'a no'najualepá iƚne nolijpá juaiconapa jiƚpe al cuecaj quiƚya', iƚniya tecaxoƚaiyi aculi'. Tixpailiquila' ƚunga. Tipi'enni liƚya'. Tijolijyi, tixhueƚcoyi acueca' quihuotsoqueya. 16 Ticuayi:
“Ay, acuanuc' iƚta'a al cuecaj quiƚya'.
Li'ipa i'huáqui to ƚaca'no' ƚetejyoxi al c'a, lipijahua' ilajncopa lan c'a quijahuaƚi, to al fujca quijahua' cuftine lino.
Jouc'a ilajncopa lunxaƚcumi quijahua', jouc'a lunxali quijahua'.
Ipo'no'ma ƚila'acoyoxi ilajncopa a'oro, ilajncopa apic' acueca' quipitali, jouc'a lam perla.
17 Icoƚ'ma ma le'a anulij hora liteƚ'mim'me.
Luyaipa quitine acueca' ƚi'hueca, itsiya joupa ijounapa.”
Tecaxoƚanna aculi' lan xanuc' nocuxepá liƚbarco, jouc'a noyepá lam barco, jouc'a jahuay no'epá canic' jiƚpe ƚaja. 18 Lixim'me ƚicuxis pe iƚpe lepipa al cuecaj quiƚya' tija'ayi, ticuayi: “¿Te tipa'a acueca' quiƚya' lo'onƚcospa to iƚiya al cuecaj quiƚya'? A'i. Ailopa'a co'onƚcoya.” 19 Tija'ayi, tijolijyi, tixhueƚcoyi acueca' quihuotsoqueya. Tejuaf'iyoƚtsi capi' liƚjuac'. Ticuayi:
“Ay, acuanuc' juaiconapa jiƚiya al cuecaj quiƚya' Babilonia.
Luyaipa quitine acuecaj tomí tipa'a jiƚpiya.
Liƚpoujnalá jiƚne lam barco loyepá ƚaja tulijyi juaiconapa.
Jiƚpe liƚya' ti'naji ƚiƚtaic' liƚbarco.
Itsiya joupa ejac'pa; ma le'a anuli 'hora icoƚ'ma liteƚ'mimpa.
20 ¡Tixojla' cunlata imanc' noƚmana' lema'a!
Imanc' ixanuc' ȽanDios, imanc' unlihuequi Jesús,
imanc' unc'iprofeta noluya'apá loxpic'epa ȽanDios,
jahuay imanc': ¡Tixojla' cunlata!
Joupa eteƚquemma al cuecaj quiƚya', iƚe liƚya' iteƚ'mipolhuo',
itsiya ȽanDios iteƚ'miconapa, i'epa ƚijca li'e'epolhuo'.”
21 Anuli cal cuecaj capaluc quema'a ipulaf'ma cal cuecaj caxpehui capic, ecajm'mi'ma ƚaja, ticua:
“Iƚque cal cuecaj capic nulemma necajm'mipa ƚaja, if'acaipa, aimipajnconaya, aimixingonayacu.
Ma toƚta'a eteƚquemma al cuecaj quiƚya' Babilonia, if'acaipa, aimipajnconaya.
22 Luyaipa quitine jiƚpe liƚya' tunayi liƚ'harpa, tunac'liyi, tifus'miyi liƚflauta, tifus'miyi liƚtrompeta.
Itsiya a'i, iƚpiya aimunaconayacu.
Luyaipa quitine iƚpiya timana' lan xanuc' acuecaj liƚpicuejma', tilanc'eyi al c'a.
Itsiya a'i, iƚpiya aimixingonayacu ni anuli cal xans ts'ipicuejma'.
Luyaipa quitine jiƚpe ticuequinni ƚilepic molino, titaijyi lan trigo.
Itsiya a'i, joupa i‑ch'ixcopa, aimicuejconayacu.
23 Luyaipa quitine jiƚpe ulif'iya epalaƚc'o' ƚajut'ƚi.
Itsiya a'i, i'ipa pangay muf, jiƚpe aimulif'iconaya, ni anuli lepalc'o'.
Luyaipa quitine jiƚpe tixoqui quileta tipalaic'oyoƚtsi, temalƚiyi, ti'eyi liƚjuic.
Cal xans tipalaic'o ƚipeno, ƚaca'no' tipalaic'o ƚipe'ailli'.
Itsiya a'i, aimicuejconayacu toƚta'a, aimipalaic'oconayoƚtsi.
Luyaipa quitine ipalunca jahuay li'a ƚamats', tiƚcuaiyumma jiƚpiya lan tsilaj xanuc' nocucalepá, ticujyi liƚtaic'.
Itsiya aimi'econayacu toƚta'a.
Ima' cumBablilonia, to cal bruja tofel'mila' jahuay lan xanuc' nomana' li'a ƚamats'.”
24 Iƚpe al cuecaj quiƚya' Babilonia ixim'me lixcuajaiquemma liƚjuats' iƚne lam profeta, lixcuajaiquemma liƚjuats' lixanuc' ȽanDios, iƚne i'huexi ȽanDios. Ma jiƚpe liƚya' ixim'me jouc'a lixcuajaiquemma liƚjuats' jahuay noma'ampola', iƚne lan xanuc' naihuejpá ȽanDios. Iƚe liƚya' itaiyinge lajunac'.