1 Pues entonces e rey Asuero uyare tuaꞌ amorojsena e impuesto tama inteꞌ inteꞌ departamento y tama inteꞌ inteꞌ chinam, y aquetpa tuaꞌ amorojsena e impuesto motor tama e chinamobꞌ xeꞌ aquetpobꞌ más innajt xeꞌ turobꞌ tutiꞌ e nuxi jaꞌ. 2 Y e Mardoqueo cay uche meyra cosa xeꞌ nojta ucꞌampibꞌir taca ucꞌotorer xeꞌ meyra ayan xeꞌ ajcꞌuna umen e rey. Y tamar era jaxir tajttzꞌa meyra umen e rey ubꞌan. Pues tunor era chꞌar tzꞌijbꞌabꞌir tama inteꞌ jun xeꞌ tuaꞌ e rey tiaꞌ quetpa tzꞌijbꞌabꞌir tunor lo que numuy tama tunor or e lugar Media y tama tunor or e lugar Persia. 3 Pues e Mardoqueo cay cꞌotori yebꞌar taca e rey Asuero. Y jaxir quetpa nuxi winic tujam tunor e gente xeꞌ tuobꞌ e Israel, y tama tunor era cꞌubꞌesna meyra umenerobꞌ, cocha cay usajca cocha tuaꞌ upasi e bꞌir tutobꞌ tuaꞌ uyubꞌi apatnobꞌ taca e jiriar. Y iraj iraj war ubꞌijnu cocha tuaꞌ utacre upiarobꞌ.