1 Pues entonces turicon yebꞌar ucꞌotorer tin e war acꞌotoriobꞌ. Porque matucꞌa e cꞌotorer jay machi ajcꞌuna umen e Dios, y tunor e ajcꞌotorerobꞌ turbꞌabꞌirobꞌ umen e Dios. 2 Y tamar era tin e axin asutpa tujor inteꞌ ajcꞌotorer cocha era war asutpa tujor lo que chena umen e Dios ubꞌan. Y tunor tin e uche cocha era aquetpa tuaꞌ ajajtzꞌobꞌ. 3 Porque tunor e ajcꞌotorerobꞌ turbꞌabꞌirobꞌ tuaꞌ ucojcobꞌ tin e war uchiobꞌ lo que imbꞌutz, y machi turobꞌ tuaꞌ abꞌajcꞌujseyanobꞌ. ¿O war ca ibꞌacta tut e ajcꞌotorer? Actan tuaꞌ ache lo que mabꞌambꞌan y chen lo que imbꞌutz tut tunor e ajcꞌotorer y jaxirobꞌ tuaꞌ atzay uwiretobꞌ. 4 Porque e ajcꞌotorerobꞌ cocha era ajtacarsiajobꞌ tuaꞌ e Dios tuaꞌ utacret. Pero jay war ache e mabꞌambꞌanir, ucꞌani tuaꞌ ibꞌacta, porque majax intaca ayan ucꞌotorer e ajcꞌotorerobꞌ era, porque jax upatnar xeꞌ ajcꞌubꞌirobꞌ umen e Dios tuaꞌ axin uwatzꞌiobꞌ tin e war uchiobꞌ e mabꞌambꞌanir. 5 Y tamar era ucꞌani tuaꞌ cose cabꞌa yebꞌar ucꞌotorer tin e war acꞌotoriobꞌ, majax umen taca e bꞌajcꞌut tut inteꞌ jatzꞌuar, sino que umen que bꞌan canata tama cawalma que ucꞌani tuaꞌ cache ubꞌan. 6 Y tamar era catoyi e impuesto ubꞌan porque tin e ajcꞌotorerobꞌ ajtacarsiajobꞌ tuaꞌ e Dios y bꞌan taca upatnarobꞌ.

7 Entonces ajcꞌunic inteꞌ inteꞌ winic lo que aquetpa tuaꞌ atojyobꞌ. Jay aquetpa tuaꞌ camani inteꞌ boleto de ornato, camanic. Y jay aquetpa tuaꞌ catoyi e IVA, catoyic ubꞌan. Y tin e aquetpa tuaꞌ cabꞌacre, cabꞌacric. Y tin e aquetpa tuaꞌ catattzꞌi, catattzꞌic. 8 Y ira ixquetpa ixbꞌeto taca otronteꞌ, sino lo que ucꞌani tuaꞌ cabꞌeto tut tunor e gente jax era: Tuaꞌ cayajta utobꞌ. Pues tin e war uyajta ut upiar war uche lo que arobꞌna tuaꞌ uche umen uley e Moisés. 9 Pues chꞌar tzꞌijbꞌabꞌir tunor lo que arobꞌbꞌiron umen e Dios que non ucꞌani tuaꞌ cobꞌian tut: “Ira iꞌxin taca inteꞌ ajnajtir ixic o taca inteꞌ ajnajtir winic, ira ichamsan, ira ixujchꞌian, ira oꞌsre tuaꞌ achꞌami lo que tuaꞌ otronteꞌ.” Bꞌan che tama uyojroner e Dios. Pero tunor lo que arobꞌbꞌiron umen e Dios tuaꞌ cache era y tunor e inmojr ojroner xeꞌ chꞌar tzꞌijbꞌabꞌir aquetpa natanwa tama e ojroner era: “Yajtan ut apiar bꞌan cocha acꞌani tuaꞌ ayajtna oit umen apiar era.” Bꞌan che tama uyojroner e Dios. 10 Tin e war uyajta ut inteꞌ upiar ma tiaꞌ tuaꞌ uche lo que mabꞌambꞌan upater. Y tamar era war cache tunor lo que chꞌar tzꞌijbꞌabꞌir tama uley e Moisés conda war cayajta ut capiar.

11 Pues entonces cabꞌijnuic tama e tiempo era conda war caturuan tara tor e rum, y canatic que cꞌotoyix e hora tuaꞌ cabꞌixcꞌa tama e waynij. Conda cay cꞌupseyanon tama uyojroner e Dios tama e Jesucristo machi cabꞌijnu jay watar wacchetaca Cawinquirar, pero coner canata que watar e hora conda tuaꞌ achecta Cawinquirar tuaꞌ usuti ubꞌixqꞌueson tuaꞌ cachꞌami e cuxtar taca e Dios tichan. 12 Cꞌanix acꞌapa tunor e acbꞌar, y watarix e janchꞌaquenar tama e día tuaꞌ cacorpesiaj conda tuaꞌ achecta watar Cawinquirar. Y tamar era cawactic uchicobꞌ tunor lo que uchiobꞌ tin e axanobꞌ tama e incsibꞌaner. Y calapic e bꞌujc tuaꞌ e janchꞌaquenar bꞌan cocha ulapi inteꞌ soldado tuaꞌ uyubꞌi ucorpes ubꞌa. 13 Entonces turuanicon tama e janchꞌaquenar, xanacon imbꞌutz tama tunor cacuxtar tara tor e rum. Y ma erer cacaray, y ma erer caxin tut e sian nojqꞌuin, y ma erer cose cabꞌa taca tin e majax nujbꞌiron tacar, y ma erer caturuan tama e sian vicio, y ma erer cacꞌaye cabꞌa, y ma erer caqꞌuijna cawira lo que ayan tuaꞌ otronteꞌ. 14 Sino que cabꞌujcsic cabꞌa tamar Cawinquirar Jesucristo, y machix cabꞌijnu tamar lo que uyusre uche cawerir.