1 Mürin, ewe king Salomon a körato ren ekewe souakomwen Israel me mwänirelan ekewe ainang meinisin, pwal ekewe souemwenin ekewe eterekesin Israel. Iwe, a amwichafengeniir lon Jerusalem, pwe repwe uwato lon ewe imwenfel än ewe Samol mi Lapalap we pworofel seni ewe telinimwen Tafit iei Sion. ✡ 2.Sam 6.12-16; 1.Kron 15.25-29 2 Iwe, ekewe re Israel meinisin ra mwicheto ren ewe king Salomon lupwen fansoun ewe chulapen likachoch lon ewe maram Etanim, iei ewe afisuen maram. ✡ Lif 23.34 3 Lupwen ekewe souakomwen Israel meinisin ra feito, ekewe souasor ra ekietä wor än ewe Samol mi Lapalap we pworofel, 4 o mwärela ren ewe imwenfel. Iwe, ekewe souasor me ekewe mwän seni ewe ainangen Lefi ra pwal uwala ewe imwenfel seni mangaku me ekewe pisek mi pin mi nom lon ren ewe imwenfel. 5 Iwe, ewe king Salomon me ekewe chon Israel meinisin mi mwichefengen ren ra nom mwen ewe pworofel o eäni asor chomong sip me ätemwänin kow, pwe ekewe mönün asor resap chüen tongeni lea. 6 Mürin, ekewe souasor ra uwalong än ewe Samol mi Lapalap we pworofel lon ewe imwenfel o anomu lon ewe rum mi unusen pin fän pöükässin ekewe kerop. 7 Pöükässin ekewe kerop mi meresiwu ra pwölüela won ewe pworofel me ämwärin kewe. 8 Ekewe ämwär ra kon langatam, pwe eman a tongeni küna lesopur seni ewe rum mi pin ika a ü mwen ewe rum mi unusen pin, nge esap wor eman a tongeni küneer me lükün. Ekewe ämwär ra nom ikenan tori ikenai. 9 Iwe, esap wor och lon ewe pworofel chilon chök ekewe rüepek fau mi chöpöp Moses a isenirelong lon me arun ewe chuk Horep. Iei ewe ia ewe Samol mi Lapalap a eäni eu pwon ngeni ekewe aramasen Israel, lupwen ra towu seni ewe fanü Isip. ✡ Tut 10.5 10 Nge lupwen ekewe souasor ra towu seni lon ewe imwenfel, eu kuchu a aurala ewe imwenfel, 11 ina mine ekewe souasor resap chüen tongeni föri ar angang lon pokiten ewe kuchu. Pun än ewe Samol mi Lapalap ling a aurala ewe imwenfel. ✡ Eks 40.34-35

12 Mürin, ewe king Salomon a iotek,

14 Iwe, ekewe aramasen Israel meinisin ra ütä, nge ewe king a kulu ngeniir o afeiöchüür. 15 Mürin a apasa, “Üpwe mwareiti ewe Samol mi Lapalap, ewe Koten Israel, mi apwönüetä mine a eäni pwon ngeni Tafit semei we, lupwen a üra, 16 ‘Seni ewe ränin üa emwenawu nei aramasen Israel seni Isip, üsap filätä eu telinimw me lein telinimwen ekewe ainangen Israel meinisin ia eu imwenfel epwe kaütä ie, pwe aramas repwe fel ngeniei ie. Nge üa filätä Tafit, pwe epwe nemeni nei aramasen Israel.’ ✡ 2.Sam 7.4-11; 1.Kron 17.3-10 17 Iwe, a nom lon än Tafit semei we ekiek, pwe epwe aüetä eu imwenfel fän iten ewe Samol mi Lapalap ewe Koten Israel. 18 Nge ewe Samol mi Lapalap a üreni Tafit semei we, ‘A mürina pwe ka ekiekin aüetä eu imwenfel fän itei. ✡ 2.Sam 7.1-3; 1.Kron 17.1-2 19 Inamwo nge en kosap aüetä ewe imwenfel. Nge noum mwän epwe upu ngonuk, i epwe aüetä ewe imwenfel fän itei.’ ✡ 2.Sam 7.12-13; 1.Kron 17.11-12 20 Iei ewe Samol mi Lapalap a apwönüetä an we pwon a eäni. Pun üa siwili Tafit semei we lon wisan wisen king me lon Israel, usun ewe Samol mi Lapalap a fen pwon. Iwe, üa aüetä ei imwenfel fän iten ewe Samol mi Lapalap, ewe Koten Israel. 21 Ikenan üa pwal awora eu leni fän iten ewe pworofel, ia a nom ie ekewe rüepek fau mi chöpöp än ewe Samol mi Lapalap kapasen pwon a mak ie. Ekei kapasen pwon a eäni ngeni ach kewe lewo, lupwen a emwenirewu seni ewe fanü Isip.”

22 Mürin, Salomon a ütä mwen än ewe Samol mi Lapalap we rongen asor me fän mesen unusen ewe mwichen chon Israel. Iwe, a aitietä pöün läng 23 o iotek, “Ai Samol mi Lapalap, Koten Israel, esap wor eman kot a wewe ngonuk lon läng ika won fanüfan. Ka apwönüetä om pwon o pwäri om tong ellet ngeni noum kewe chon angang mi föri letipom ren unusen leluker. 24 Ka apwönüetä om pwon ngeni noum chon angang Tafit semei we. Ewer, ikenai a fis meinisin mine ka apasatä. 25 Nge iei, ai Samol mi Lapalap, Koten Israel, kopwe pwal apwönüetä om pwon ngeni Tafit semei we, pun ka üreni pwe epwe wor eman mwirimwirin, epwe wiseni ewe wisen king me lon Israel fansoun meinisin, are nöün kewe mwän repwe chök aleasochik o föri letipom usun i a föri letipom. ✡ 1.King 2.4 26 Iei mine, ai Kot, en ewe Koten Israel, kopwe apwönüetä om kapas ka eäni ngeni noum chon angang Tafit semei we.

27 Nge ifa usun en, äm Kot, kopwe wesewesen tongeni imweimw won fanüfan? Nengeni, kosap kuch lon läng pwal lon ewe läng mi unusen tekia. Ifa usun, kopwe tongeni kuch lon ei imwenfel üa aüetä? ✡ 2.Kron 2.6 28 Ai Samol mi Lapalap, ai Kot, ngang noum chon angang, kose mochen kopwe aüselinga ai iotek o apwönüetä ai tüngor üa eäni ngonuk ikenai. 29 Kopwe mamasa ei imwenfel lepwin me lerän, ewe leni ka kapas usun pwe en kopwe imweimw lon. Kopwe aüselinga ewe iotek ngang noum chon angang üa eäni ngonuk le sape ngeni ei leni. ✡ Tut 12.11 30 Kopwe aüselinga ai kewe tüngor me än noum aramasen Israel kewe tüngor, lupwen aia iotek ngonuk le sape ngeni ei leni. Ewer, kopwe aüseling me läng ewe ia ka nom ie, nge lupwen ka rongorong, kopwe amusala äm tipis.

31 Iwe, are eman aramas epwe atipisi chon arun, o emwenala ren om ei rongen asor lon ei imwenfel, pwe epwe pwon fän akapel pwe esap tipis, 32 mürin kopwe aüseling me läng o apwüngü noum kewe chon angang. Kopwe atipisi ewe mi tipis o ukun ngeni an föför, nge kopwe pwärala pwüngün ewe chon pwüng o liwini ngeni won ükükün an pwüng.

33 Iwe, are noum aramasen Israel ra kuf ren chon oputer pokiten ar tipis ngonuk, nge mürin ra kulsefäl ngonuk o amusamus ngonuk, are ra iotek o tüngor ngonuk me lon ei imwenfel, 34 kopwe aüselingeer me läng o amusala ar tipis. Kopwe aliwinisefäliir ngeni ewe fanü ka fen ngeni ar kewe lewo. 35 Iwe, are üt esap püngütiu me läng pokiten ar tipis ngonuk, nge mürin ra iotek ngonuk le sape ngeni ei leni, are ra amusamus ngonuk o kul seni ar tipis pokiten ka ariaföüür, 36 mürin kopwe aüselingeer me läng o amusala än noum kewe chon angang ekewe aramasen Israel tipis. Iwe, kopwe aiti ngeniir mine a pwüng pwe repwe föri. Mürin kopwe apüngätiu üt won fanüom, ewe fanü ka ngeni noum aramas pwe repwe fanüeni.

37 Iwe, are a fis lengita lon ewe fanü, are a wor mätter ika moi ika mesenipik ika lifichimas ika muun, are chon oputer repwe pwelifeili eu lein ar kewe telinimw fän pisekin maun, ese lifilfil meni sokun riaföü ika samau a fis, 38 kopwe aüseling ar iotek. Iwe, are eman chök aramas ika noum aramasen Israel meinisin ra tüngor o aitiela pöür ngeni ei imwenfel, ese lifilifil met sokun iotek ika tüngor ra eäni, pun iteiten eman me eman a silei riaföün püsin lelukan, 39 mürin kopwe aüselingeer me läng ewe ia ka nom ie. Kopwe amusala ar tipis o liwini ngeni eman me eman ükükün an föför, pun en ka silei leluker, ewer, en echök ka silei leluken aramas meinisin. 40 Ren ei noum aramas repwe meninituk lon fansoun ar manau lon ewe fanü ka ngeni äm kewe lewo.

41 Nge are eman chon ekis, sap i eman lein noum aramasen Israel, epwe feito seni eu fanü toau fän iten itom, 42 pun ekewe aramas repwe rongorong itom mi iteföüla, pwal usun om kewe föför ka föriir ren poum mi manaman, are ewe chon ekis epwe feito o iotek le sap ngeni ei imwenfel, 43 kopwe aüselinga me läng ewe ia ka nom ie. Iwe, kopwe mwütätä meinisin mine ewe chon ekis a tüngor ngonuk. Ren ei ekewe aramasen fanüfan meinisin repwe silei itom o meninituk, usun noum kewe aramasen Israel ra föri, repwe pwal silei pwe ei imwenfel üa aüetä a eu leni ia aramas repwe fel ngonuk ie.

44 Iwe, are ka tinala noum aramas pwe repwe feila maun ngeni chon oputer, ese lifilifil ia ra nom ie, are ra iotek ngonuk, en ewe Samol mi Lapalap, le sape ngeni ei telinimw ka filätä, pwal ngeni ei imwenfel üa aüetä fän itom, 45 kopwe aüselinga ar iotek me tüngor me läng o alisiir.

46 Nge are noum aramas ra tipis ngonuk, pun esap wor eman esap föri tipis, nge ka song ngeniir o mwüt ngeni chon oputeer pwe repwe akufuur o uweerela lon fanüer mi toau ika arap, 47 nge are ra memef lon leluker o ekieksefäl me lon ewe fanü ia ra oola ie, are ra tüngor ngonuk me lon fanüen chon liapeniir o apasa, ‘Äm aia tipis o föri föför esepwüng me ngau,’ 48 are ra kulsefälituk ren unusen leluker me lon fanüen chon oputer o iotek ngonuk le sape ngeni fanüer ka ngeni ar kewe lewo, are ra sape ngeni ei telinimw ka filätä, pwal ngeni ei imwenfel üa aüetä fän itom, 49 kopwe aüselinga ar iotek me ar tüngor me läng ewe ia ka nom ie o alisiir. 50 Iwe, kopwe amusala än noum kewe aramas tipis me pupungau ra föri ngonuk. Kopwe pwal awora tong lon leluken chokewe mi uweerela, pwe repwe tongeer. 51 Pun ir noum aramas ka nöüniir, ka emwenirewu seni Isip ewe leni mi wewe ngeni eu lenien ekkei mi fokun sarara. 52 Ai Samol me ai Kot, kose mochen kopwe netiu o aüselinga än noum chon angang tüngor, pwal än noum kewe aramasen Israel tüngor iteiten fansoun ra kökköruk pwe kopwe alisiir. 53 Pun en ka aimwürela seni lein ekewe aramasen fanüfan meinisin pwe kopwe nöüniir, usun Moses noum we chon angang a fen pwärätä fän alom, lupwen ka emwenawu äm kewe lewo seni Isip.”

54 Lupwen Salomon a wes le eäni ekei iotek me tüngor meinisin ngeni ewe Samol mi Lapalap, a ütä me mwen ewe rongen asor, ia a fotopwäsuk ie o eitietä pöün läng. 55 Iwe, a ütä o afeiöchü unusen ewe mwichen chon Israel fän mwelian mi osomong o apasa, 56 “Üpwe mwareiti ewe Samol mi Lapalap mi awora kinamwe ngeni nöün aramasen Israel usun a fen pwon. A apwönüetä an kewe pwon mi mürina meinisin a eäni ngeni Moses nöün we chon angang fän iten ekewe chon Israel. ✡ Tut 12.10; Jos 21.44-45 57 Ewe Samol mi Lapalap ach Kot epwe etikich usun a eti ach kewe lewo. Amwo esap likitikichela ika pöütikichela. 58 Epwe akulu lelukach ngeni, pwe sipwe aleasochisi alon o apwönüetä an kewe allük me pwüüng meinisin a allük ngeni ach kewe lewo. 59 Amwo ewe Samol mi Lapalap ach we Kot epwe chechemeni lerän me lepwin ai kei kapas üa eäni le tüngor ngeni. Amwo epwe pwal alisiei ngang nöün chon angang me nöün aramasen Israel won ükükün ach osupwang iteiten rän. 60 Ren ei aramasen fanüfan meinisin repwe silei pwe ewe Samol mi Lapalap i chök Kot, esap pwal wor eman lükün. 61 Iei mine lelukemi epwe fokun wenechar ngeni ewe Samol mi Lapalap ach we Kot, oupwe aleasochisi an kewe allük o apwönüetä an kewe pwüüng, usun oua föri ikenai.”

62 Mürin, ewe king Salomon me ekewe chon Israel meinisin mi nom ren ra asor ngeni ewe Samol mi Lapalap. 63 Iwe, Salomon a eäni asoren kinamwe ngeni ewe Samol mi Lapalap ükükün rüe me ruungeröü ätemwänin kow me ipükü rüe ngeröü sip. Iei usun ewe king me ekewe aramasen Israel meinisin ra efinüna imwen ewe Samol mi Lapalap. 64 Lon ewe chök ränin ewe king a apini lukalapen ewe leni lükün mwen imwen ewe Samol mi Lapalap. Iwe, ikenan a eäni ekewe asoren kek me asoren mongö, pwal ekewe kinikinin kiris seni ekewe asoren kinamwe, pokiten ewe rongen asor seni piras mi nom fän mesen ewe Samol mi Lapalap a men kükün fän iten ekei sokopaten asor meinisin.

65 Iei usun Salomon me ekewe chon Israel meinisin mi nom ren ra föri ewe chulapen likachoch lon ewe fansoun. Iwe, eu mwichemongen aramas ra feito seni ewe al mi ale ngeni Hamat a nom efeng, pwal seni ewe öüwön Isip a nom ör. Ra föri efinünen ewe imwenfel lon ükükün fisu rän, nge lon ükükün fisu rän ra föri ewe chulapen likachoch. 66 Iwe, sorotän ewe rän Salomon a afeilai ekewe aramas. Iwe, ra afeiöchü ewe king o feila ngeni en me lenian fän meseik me pwapwan leluker pokiten ekewe feiöch meinisin ewe Samol mi Lapalap a awora ngeni Tafit nöün we chon angang, pwal ngeni nöün kewe aramasen Israel.