1 Iwe, ekewe aramasen Juta meinisin ra seikätä Usia, pwe epwe siwili Amasia saman we lon wisan wisen king. Usia a ierini engol me wonu, lupwen a seikitä. 2 Mürin än ewe king Amasia mäla, Usia a liapenisefäli Elat o aüsefälietä.

3 Iwe, Usia a ierini engol me wonu, lupwen a tolong lon wisan wisen king. A nom lon Jerusalem o nemenem lon ükükün lime me ruu ier. Iten inan we Jekolia seni Jerusalem. 4 Iwe, Usia a föri mine a pwüng me fän mesen ewe Samol mi Lapalap, usun chök Amasia saman we a föri. 5 A angang ngeni Kot fän allükülük lon ränin manauen Sekaraia mi aiti ngeni usun an epwe niuokusiti Kot. Iwe, ewe Samol mi Lapalap a afeiöchü lon ükükün fansoun an angang ngeni.

6 Iwe, Usia a feila o maun ngeni ekewe chon Filistia. A ataetiu tittin ekewe telinimw Kat, Japne me Astot o aüetä telinimw arun Astot, pwal ekis meinisin lein ekewe chon Filistia. 7 Kot a alisi Usia le maun ngeni ekewe chon Filistia, ekewe chon Arapia mi nom lon Kurpaal, pwal ekewe chon Meun. 8 Iwe, ekewe chon Amon ra takises ngeni Usia. A pwal pöchökülela pwe an iteüöch a chöüla tori lekiännin Isip. 9 Usia a pwal aüetä o apöchöküla imw tekia lon Jerusalem arun ewe Asamalapen Lepwokuku, arun ewe Asamalapen Lemol me arun ewe Pwokukun ewe tit. 10 Iwe, a aüetä imw tekia lon ewe fanüapö o tuw chomong chönüttu, pun a wor chomong nöün pwiin man fäsonun ekewe chuk, pwal lon ekewe maasies. A pwal wor nöün chon tümwünü irän wain won ewe fanü mi chukuchukutä, pwal nöün chon tanipi won ewe fanü mi pwülüöch, pun a aücheani ewe pwül. 11 A pwal wor nöün Usia mwichen sounfiu mi molotä ngeni maun. Ra kinikin lon mwich mi alealong won ewe iteit Jeiel ewe seketeri me Maseia ewe meilap ra angei. Ätekei ra nom fän emwenien Hanania, eman me lein nöün ewe king nöüwis. 12 Iwe, iteiten ekewe meilapen sounfiu ükükün rüengeröü wonopükü mwän. 13 Eu mwichen sounfiu ükükün ülüpükü fisungeröü limepükü mwän mi tongeni maun fän pöchökül ra nom fän nemenier. Ir repwe alisi ewe king le maun ngeni chon oputan. 14 Iwe, Usia a amolätä tittin maun, siles, akkaw, sakit seni mächä, esefich me föün aülül fän iten unusen ewe mwichen sounfiu. 15 Lon Jerusalem a wor nöün chon angang mi sipeöch le ekiekietä minefön pisek. Iwe, ewe king a awisa ngeniir pwe repwe förätä mwesiin, repwe nom won ekewe imw tekia, pwal won ekewe pwokukun ewe tit, pwe repwe eppichi föün esefich me fau watte. Än Usia iteüöch a chöfetal ekis meinisin, pun Kot a alisi pwe a fokun pöchökül.

16 Nge lupwen Usia a pöchökülela, a lamalamtekia pwe a tolong lon feiengau. Iwe, a tipis ngeni ewe Samol mi Lapalap an we Kot o tolong lon imwenfelin ewe Samol mi Lapalap, pwe epwe keni apach mi pwokus me won ewe rongen asoren ötüöt. 17 Nge ewe souasor Asaria a tapwela mürin fiti walik nöün ewe Samol mi Lapalap souasor, ir mwän mi pworacho. 18 Ra ü ngeni ewe king Usia o üreni, “Esap wisom Usia, pwe kopwe keni apach mi pwokus ngeni ewe Samol mi Lapalap, nge wisen chök ekewe souasor ir mwirimwirin Aaron kewe mi apinipinila pwe repwe keni apach mi pwokus. Kopwe towu seni ei imw mi pin, pun ka föri mine a ngau. Ei lapalap esap atoto womw iteüöch seni Kot ewe Samol mi Lapalap.” ✡ Eks 30.7-8; Num 3.10 19 Mürin, Usia a fokun song ren ekewe souasor. Lon ewe chök otun a amwöchü lepöün eu sepien asoren ötüöt, pwe epwe keni apach mi pwokus. Nge lupwen a song, rupun pwötür a pwüküwu won chamwan. Ei a fis me fän mesen ekewe souasor lon imwen ewe Samol mi Lapalap me arun ewe rongen asoren ötüöt. 20 Lupwen ewe souasor mi lap Asaria me ekewe souasor meinisin ra nenengeni, ra küna pwe a rupun pwötür won chamwan. Iei mine ra müttir asüela lükün, pwal püsin i a müttir le towu, pun ewe Samol mi Lapalap a afeiengaua. 21 Iwe, ewe king Usia a rupun pwötür tori an mäla. Nge pokiten a rupun pwötür, a imwüla lon pwal eu imw, esap pwal tongeni tosefälilong lon imwen ewe Samol mi Lapalap. Iwe, Jotam nöün we mwän a tümwünü chon leimwen ewe king o nemeni aramasen ewe fanü.

22 Nge lusun pworausen än Usia kewe föför seni lepoputan tori lesopolan an nemenem ewe soufos Aisea nöün Amos we mwän a makelong lon eu puk. 23 Iwe, Usia a mäla, nge ra peiaseni ren peiasen ekewe king, nge sap lon peiasen ekewe king, pun Usia a rupun pwötür. Nge Jotam nöün we mwän a siwili lon wisan wisen king. ✡ Ais 6.1