1 Iwe, limu rän mürin ewe Souasor mi Lap Ananias a feila Seserea fiti ekoch souakom me eman souallük itan Tertullus. Ra feito mwen mesen ewe kepina Feliks o pwärätä ekewe tipis ra tipi ngeni Paulus. 2 Mürin ar körato Paulus, Tertullus a popuetä le pwärätä an kapasen atutur. Iei usun mine a apasa: “En ämäfen kepina! Om tipachem le emwenikich a aworato kinamwe ngenikich lon fansoun langatam, pwal chomong minefön mettoch ra fisitä fän iten feiöchün fanüach. 3 Ekis meinisin pwal fansoun meinisin äm aia etiwa ei sokun feiöch, nge äm aia fokun kilisou chapur ngonuk. 4 Ngang üsap mochen atai om fansoun, nge üa tüngor ngonuk pwe kopwe kirikiröch ngenikem o aüseling ngeni äm kewe kapas mi mochomoch. 5 Äm aia mefi pwe ei mwän eman aramas mi fokun afeiengau. A popuetä fitikoko lein ekewe chon Juta won unusen fanüfan, i eman souemwenin ewe mwichen Nasaret. 6 A pwal sotuni an epwe apiningaua ewe Imwenfel, nge äm aia turufi. [Äm aia ekiekin apwüngü fän pwüngün püsin äm kewe allük, 7 nge ewe sounemenemen sounfiu Lisias a war o angei senikem fän pöchökül. 8 Mürin Lisias a üreni, pwe ekewe chon atipisi ei mwän repwe feito me mwomw.] Are en kopwe kapas ais ngeni ei mwän, kopwe tongeni silei seni i usun ekewe mettoch meinisin aia atipisi won.” 9 Iwe, ekewe chon Juta ra tipeeu ngeni ekewe kapasen atipisi o üra pwe meinisin a let.

10 Iwe, ewe kepina a pwome ngeni Paulus an epwe kapas. Iwe, Paulus a üra, “Ngang üa silei pwe en ka fen soukapwüngün ei mwü lon chomong ier. Iei mine üa pwapwa ai üpwe püsin peniei me mwomw. 11 Usun ka tongeni püsin silei pwe esap mwo lap seni engol me ruu rän ra la, pwe ngang üa feila Jerusalem ai üpwe fel ngeni Kot. 12 Ekewe chon Juta resap küna pwe üa anini ngeni eman me lon ewe Imwenfel, resap pwal künaei pwe üa föri och mine aramas repwe fitikoko ren, sap lon ekewe imwen felikis ika ekis meinisin lon ewe telinimw. 13 Resap pwal tongeni alletätä pwe a let ekewe kapasen atipisi ra aturuei won iei. 14 Nge ngang üpwe pwärätä ei ngonuk: Üa fel ngeni än ach kewe lewo we Kot ren ai fetal won ewe Al ir ra apasa pwe mi mwäl. Nge üa pwal lükü meinisin mine a mak lon än Moses kewe Allük pwal lon ekewe puken soufos. 15 Üa pwal apilükülük lon ewe Kot ir ra pwal apilükülük ngeni, pwe aramas meinisin, ekewe chon pwüng me ekewe aramas mi ngau, repwe manausefäl seni mäla. 16 Iei mine üa achocho ngeni fansoun meinisin, pwe esap wor mengiringirin letipei me mwen Kot me aramas.

17 “Mürin ai toau seni Jerusalem ekoch ier, üa liwinto ikei ai üpwe uwato moni fän iten alilisin aramasei kewe chon Juta mi osupwang, üpwe pwal uwato ai asor. 18 Lupwen üa föri iei usun, ra künaei lon ewe Imwenfel, mürin ai awesi ai we angangen alimelim. Esap wor eu mwichen aramas a nom rei, esap pwal wor och fitikoko. ✡ Föf 21.17-28 19 Nge ekoch chon Juta seni ewe fanü Asia ra nom ikenan. Püsin ir repwe feito mwomw o pwärätä ar kapasen atutur are mi wor mine ra tongeni atipisiei won. 20 Ika ekei mwän mi nom ikei repwe pwärätä met sokun föföringau ra küna rei lupwen üa ütä me mwen ewe mwichen soupwüng, 21 chilon chök ewe eu mettoch üa kökkö lupwen üa ütä me mwer, ‘Ngang üa küna kapwüng me remi ikenai fän iten üa lükü pwe ekewe sotup repwe manausefäl.’ ” ✡ Föf 23.6

22 Mürin Feliks mi sileöchü usun ewe Al a aükätiu ewe kapwüng o üreniir, “Lupwen ewe sounemenemen sounfiu Lisias epwe war, üpwe atowu pwüngün ei kapwüng.” 23 Iwe, a allük ngeni ewe meilapen sounfiu mi tümwünü Paulus, pwe epwe mamasaöchü Paulus, nge epwe ekis angasa o mwüt ngeni chiechian kana ar repwe alisi ngeni met a osupwang ren.

24 Mürin ekoch rän Feliks a feito fiti pwülüan we itan Trusilla, i eman fin Juta. A titi Paulus o aüseling ngeni lupwen a afalafal usun ach lükülük lon Kraist Jesus. 25 Nge lupwen Paulus a sopwela le kakapas usun pwüng, usun ach sipwe tongeni nemeni püsin inisich, pwal usun ewe ränin kapwüng lon ewe fansoun lesopolan, Feliks a niuokus o apasa, “Kopwe feila iei, ngang üpwe kökkörisefäluk lupwen epwe wor ai fansoun mi fich.” 26 Lon ena fansoun Feliks a pwal apilükülükü pwe Paulus epwe ngeni moni, iei popun a soun titi i pwe repwe pworausfengen. 27 Iwe, ruu ier mürin, Porkius Festus a siwili Feliks lon wisen kepina. Nge Feliks a mochen kütta an chen me ren ekewe chon Juta, iei mine a likiti Paulus lon imwen fötek.