1 Iwe, ewe Samol mi Lapalap a kapas ngeni Moses, 2 “Kopwe üreni ekewe chon Israel pwe repwe uwato ar alilis ngeniei. Kopwe angei seni eman me eman aramas mine a mochen fang ngeniei seni letipan. 3 Iwe, epwe iei usun ewe alilis kopwe angei seniir: kolt, silifer me piras, 4 mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch, 5 silin ätemwänin sip mi kapar me silin man mi mürina, pwal pap seni ewe irä itan akasia, 6 noppuk fän iten ekewe lamp, uän irä mi pwokus me chöön fän iten löön epit, pwal fän iten apach mi pwokus, 7 fau aüchea itan oniks me sokun fau aüchea fän iten alingen ewe üf itan efot, pwal fän iten ewe chechen leupw. 8 Mürin, ekewe aramas repwe föri ewe imw mi pin fän itei pwe üpwe imweimw lefiler. 9 Repwe föri ewe imwenfel seni mangaku me pisekin lon meinisin won ükükün mine üpwe aiti ngonuk.”

10 “Kopwe föri eu pworofel seni ewe irä akasia langataman ükükün faik me limu inis, nge chölapan me tekian ükükün rüe mi fisu inis. 11 Iwe, lon me lükün kopwe apacha ngeni kolt mi mürina, kopwe pwal alinga ngeni kolt mi chipwechip ünükün me won ewe pworofel. 12 Kopwe föri fofoch ring seni kolt o apacheretä ngeni pwokukun me rüanü, ruofoch me epek, pwal ruofoch me epek. 13 Iwe, kopwe falei ruofoch ämwär seni ewe irä akasia o apachätä kolt wor. 14 Kopwe sökirelong lon ekewe ring mi pachetä lepekin ewe pworofel, pwe aramas ra tongeni ämwära. 15 Iwe, ekewe ämwär repwe chök nonom lon ringen ewe pworofel, nge resap sökuwu seniir. 16 Mürin kopwe iseis lon ewe pworofel ekewe rüepek fau mi chöpöp üpwe ngonuk, ekewe allük ra mak won. 17 Kopwe pwal föri öppüngün seni kolt mi mürina, langataman ükükün faik me limu inis, nge chölapan rüe me fisu inis. Iei lenien ai ümöümöch. ✡ Ipr 9.5 18 Kopwe pwal föri uluulun ruoman kerop seni kolt won lesopun ewe öppüng me ruosop, nge kopwe chök necheer ngeni ama. 19 Ekewe kerop repwe nonom lesopun ewe öppüng me ruosop, nge repwe chök förunus me ewe öppüng. 20 Iwe, pöükässin ekewe kerop repwe itila o meresila, pwe repwe ochunoi won ewe öppüng, nge won meser repwe säpefengen o wenetiu ngeni ewe öppüng. 21 Iwe, kopwe iseis lon ewe pworofel ekewe rüepek fau mi chöpöp ngang üpwe ngonuk, ekewe allük ra mak won o apüngü ngeni ewe öppüng. 22 Iei ewe leni ia üpwe churuk me ie. Iwe, seni ei leni lefilen ekewe ruoman kerop mi nom won ewe pworofel üpwe kapas ngonuk o aiti ngonuk ekewe allük fän iten chon Israel.”

23 “Iwe, kopwe föri eu chepel seni ewe irä akasia langataman ükükün ilik me wonu inis, chölapan ükükün engol me walu inis, nge tekian rüe me fisu inis. 24 Kopwe apacha ngeni kolt mi mürina, kopwe pwal alinga ngeni kolt mi chipwechip ünükün me won ewe chepel. 25 Iwe, kopwe föri aaman won pwelin ünükün tekian ükükün ülüngat inis, kopwe pwal alinga ngeni kolt mi chipwechip. 26 Iwe, kopwe föri fofoch ring seni kolt o apacheretä ngeni lepwokukun me rüanü, ia ekewe fofoch pechen ra nom ie. 27 Ekewe ring repwe kuku ngeni aamen ewe chepel, nge ämwärin repwe sökulong lon ekewe ring, pwe aramas ra tongeni ämwära. 28 Kopwe falei ekewe ämwär seni ewe irä akasia o apachätä kolt wor. 29 Kopwe pwal föri sepi me kap me rume, pwe repwe nonom fän iten ewe asoren ün. Iwe, kopwe föriir meinisin seni kolt mi mürina. 30 Iwe, kopwe iseis ekewe pilawa mi pin won ewe chepel, pwe repwe nom fän mesei fansoun meinisin.” ✡ Lif 24.5-8

31 “Iwe, kopwe föri eu lenien atittin seni kolt mi mürina, kopwe pwal auluulu motongan me popun o necheer ngeni ama. Iwe, alingan meinisin, ekewe uluulun pön irä me kirupun repwe förunus me ewe lenien atittin. 32 Epwe pwal wor wonofoch keangan repwe keang seni ewe popun, ülüfoch me epek, pwal ülüfoch me epek. 33 Won eu me eu keangan epwe wor ülüpö uluulun pön irä usun chök pön ewe irä itan almont. Nge iteiten pön irä epwe wor kirupun me fan. Ina usun lapalapen ekewe wonofoch keang mi keang seni popun ewe lenien atittin. 34 Iwe, won popun epwe wor fapö uluulun pön irä usun chök pön ewe irä almont, epwe pwal wor föföü kirupur, 35 eföü kirup epwe nom fän iteiten ekewe leni, ia ekewe wonofoch keang ra keang seni ie. 36 Nge ekewe kirup me ekewe keang repwe förunus, pwe unusen ewe lenien atittin epwe för seni kolt mi mürina, epwe pwal auluul o nechenech ngeni ama. 37 Kopwe pwal föri fisu lamp fän iten ewe lenien atittin. Ekewe lamp repwe nom won pwe repwe asarama mwan. 38 Iwe pisekin ewe lenien atittin, ekewe fich me lenien mooch repwe pwal för seni kolt mi mürina. 39 Ewe lenien atittin me pisekin meinisin repwe för seni ina epwe ükükün fik me limu paun kolt mi mürina. 40 Kopwe tümwünü pwe kopwe chök föri meinisin usun mine üa aiti ngonuk me won ewe chuk.” ✡ Föf 7.44; Ipr 8.5