1 Iwe, lupwen ekewe chon Israel ra küna pwe Moses a mangetiu me won ewe chuk, ra mwichefengen ren Aaron o üreni, “Etto, kopwe föri ngenikem uluulun eman kot epwe akom mwach, pun sisap silei mine a fis ngeni Moses, ewe mwän a emwenikichewu seni lon ewe fanü Isip.” ✡ Föf 7.40 2 Nge Aaron a üreniir, “Oupwe ettatiu ekewe ierring seni kolt seni selingen pwülüemi, pwal seni selingen nöümi mwän me fefin o uweereto rei.” 3 Iei mine ekewe aramas meinisin ra ettatiu nöür ierring seni kolt seni selinger o uwato ren Aaron. 4 Iwe, a angei seniir ekewe kolt, a ateli o ninalong lon eu lenien auluulu uluulun eman kow. Mürin, ekewe aramas ra apasa, “Iei i om we Kot, Israel, ewe mi emwenukowu seni lon ewe fanü Isip.” ✡ 1.King 12.28; Föf 7.41 5 Lupwen Aaron a küna ei föför, a senätä eu rongen asor me mwen ewe uluulun kow o arongafeili, “Lesor epwe fis eu chulap fän iten ewe Samol mi Lapalap.” 6 Iwe, ekewe aramas ra pwätä lesosorusich o eäni asoren kek me asoren kinamwe. Nge wesin ar asor ra mottiu pwe repwe momongö o ükün. Mürin ra ütä o urumwotongau. ✡ 1.Kor 10.7

7 Mürin, ewe Samol mi Lapalap a kapas ngeni Moses, “Kopwe müttiritiu, pun noum kewe aramas ka emwenirewu seni lon ewe fanü Isip ra föri föför mi ngau. 8 Ra müttir aleasolap ngeni ekewe allük üa ngeniir, ra föri eu uluulun kow seni kolt fän iter, ra fel ngeni, ra pwal asor ngeni o apasa, ‘Iei i om we Kot Israel, ewe mi emwenukowu seni lon ewe fanü Isip.’ 9 Üa küna ekei aramas pwe ir aramas mi tipepöchökül o ülöförea. 10 Iei mine kopwe mwüt ngeniei pwe üpwe aroserela, pun üa fokun song ngeniir. Mürin üpwe föri senuk eu mwichen aramas mi chomong.”

11 Nge Moses a tütüngor ngeni an we Kot ewe Samol mi Lapalap fän iten ekewe chon Israel o apasa, “Ai Samol mi Lapalap, pwota ka fokun song ngeni noum kei aramas ka emwenirewu seni lon ewe fanü Isip ren om manaman, pwal ren poum mi fokun manaman? 12 Ifa usun, ka mochen pwe ekewe chon Isip repwe apasa, ‘A chök emwenirewu, pun a ekiekin afeiengaueer. A mochen nirela won ekewe chuk o aroserela seni won fanüfan?’ Kopwe likitala om song mi pöchökül, kopwe pwal siwili om ekiekin afeiengaua noum kewe aramas. 13 Kopwe chechemeni noum kewe chon angang Apraham, Isaak, me Israel, pun ka pwon fän akapel ngeniir fän püsin itom o üreniir pwe kopwe achomongala mwirimwirir usun fün läng, kopwe pwal ngeni mwirimwirir unusen ewe fanü, pwe repwe fanüeni tori feilfeilachök usun ka fen pwon ngeniir.” ✡ Ken 22.16-17; 17.8 14 Mürin, ewe Samol mi Lapalap a siwili an ekiekin afeiengaua nöün aramas. ✡ Num 14.13-19

15 Iwe, Moses a kul o feitiu me won ewe chuk, nge a uwei ekewe rüepek fau mi chöpöp lepöün, ekewe allük ra mak wor me rüepek. 16 Iwe, ekei rüepek fau Kot a püsin falei o makei ekewe allük wor. 17 Nge lupwen Josua a rong akürangen ekewe aramas mi mweireir, a üreni Moses, “A fis akürangen maun lon lenier.” 18 Nge Moses a üreni, “Ei akürang sap akürangen aramas mi win ika kuf, nge mine üa rong ngingin aramas mi köl.” 19 Iwe, lupwen Moses a arap ngeni lenien ekewe chon Israel, a küna ewe uluulun kow me ekewe aramas ra pworuk ünükün. Mürin, Moses a fokun lingeringer, pwe a aturätiu me lepöün ekewe rüepek fau o amökküür me fäsonun ewe chuk. 20 A angei ewe uluulun kow ra föri, a atelala o atatakisi, a pwal wüsi o atoropasafeili moromoran lon koluk. Mürin a echimwa ekewe chon Israel pwe repwe ünümi ewe koluk.

21 Iwe, Moses a aisini Aaron, “Met ekei aramas ra föri ngonuk pwe ka uwato wor eu tipis mi lapalap?” 22 Nge Aaron a üreni, “Ai samol, kosap fokun song ngeniei. Ka püsin silei usun ekei aramas, pwe ra müttir ngeni le föri mine a ngau. 23 Pun ra apasa ngeniei, ‘Kopwe föri ngenikem uluulun eman kot epwe akom mwem. Pun aisap silei mine a fis ngeni Moses, ewe mwän mi emwenikichewu seni ewe fanü Isip.’ 24 Iei mine üa üreniir, ‘Iteiten eman me eman mi wor an fout seni kolt epwe uttawu.’ Mürin ra ngeniei ar kewe kolt, nge ngang üa atururolong lon ekkei. Iwe, a fis ei uluulun kow.”

25 Iwe, Moses a küna pwe ekewe aramas ra parangarang, pun Aaron a mwüt ngeniir pwe repwe parangarang. Iei mine ra asäw me ren chon oputeer. 26 Mürin, Moses a ütä leasamalapen lenier we o leüömong le kökkö, “Iön pekin ewe Samol mi Lapalap? Oupwe feito rei.” Iwe, ekewe mwän meinisin seni ewe ainangen Lefi ra mwicheto ren. 27 Moses a üreniir, “Iei alon ewe Samol mi Lapalap, ewe Koten Israel: Iteiten eman me eman mwän epwe rietä nöün ketilas lepekin o asaifetal lon ei leni seni eu asamalap tori pwal eu. Iwe, epwe ni pwin me chiechian me chon arun.” 28 Iei usun ekewe mwän seni ewe ainangen Lefi ra föri mine Moses a apasa. Lon ewe rän ina epwe ükükün ülüngeröü mwän ra mäla me lein ekewe aramas. 29 Mürin, Moses a üreniir, “Ikenai oua püsin apinikemi fän iten angangen ewe Samol mi Lapalap, pokiten oua niela püsin nöümi mwän ika püsin pwimi. Iwe, Kot a afeiöchükemi ikenai.”

30 Sorotän ewe rän Moses a üreni ekewe aramas, “Oua föri eu tipis mi lapalap. Iei üpwe feitä ren ewe Samol mi Lapalap. Eli üpwe tongeni föri angangen amusamusen ämi tipis.” 31 Mürin, Moses a liwinsefälitä ren ewe Samol mi Lapalap o üreni, “Üa lolilen, pun ekei aramas ra föri eu tipis mi lapalap. Ra föri kot fän iter seni kolt. 32 Iwe, kose mochen kopwe amusala ar tipis. Nge ika kosap mochen, üa tüngor ngonuk, kopwe pwal talawu itei seni om puk ia ka makei iten noum kana ie.” ✡ Kölf 69.28; Pwär 3.5 33 Nge ewe Samol mi Lapalap a üreni Moses, “Iteiten iö mi tipis ngeniei üpwe talawu itan seni ai puk. 34 Iei kopwe feila. Kopwe emwenala ekewe aramas ngeni ewe leni üa fen kapas ngonuk usun. Nengeni, nei chon läng epwe akom mwom. Nge epwe war ewe fansoun üpwe liwini ngeniir liwinin ar tipis.”

35 Iwe, ewe Samol mi Lapalap a awarato feiengau won ekewe aramas, pokiten ra fel ngeni ewe kow Aaron a föri.