1 Iwe, Pesalel me Oholiap repwe föri ewe angang, pwal ekewe mwän meinisin ewe Samol mi Lapalap a ngeniir tufich me tipachem pwe repwe sipeöch le föri unusen angangen ewe imw mi pin. Nge repwe chök föri usun mine ewe Samol mi Lapalap a allük ngeniir.

2 Mürin, Moses a körato Pesalel me Oholiap, pwal ekewe mwän ewe Samol mi Lapalap a fang ngeniir ar tufich, pwal ir mi mochen feito o föri ewe angang seni mochenin letiper. 3 Iwe, ra angei seni Moses ekewe alilis meinisin ekewe aramasen Israel ra uwato seni mochenin letiper fän iten angangen ewe imw mi pin. Nge iteiten lesosor ekewe aramas ra chök wakato ar alilis seni mochenin letiper, 4 pwe ekewe mwän mi föri ekewe sokopaten angang won ewe imw mi pin ra likitala ar angang, ra feito ren Moses 5 o üreni, “Ekewe aramas ra kon uwato chomong lap seni aükükün ewe angang ewe Samol mi Lapalap a allük ngenikem pwe aipwe föri.” 6 Mürin, Moses a allük pwe repwe asilefeili lon unusen ewe leni, pwe esap wor eman mwän ika fefin epwe chüen uwato och fän iten alilisin ewe imw mi pin. Iei mine ekewe aramas resap chüen uwato ar alilis rer, 7 pun ekewe pisek mi fen wor ra ku ngeni ewe angang meinisin, ra pwal somwola.

8 Iwe, ekewe mwän meinisin mi silelap me lein chokewe mi angang ngeni ewe imwenfel seni mangaku ra föri ewe imwenfel ren engol pekin mangaku mi mürina o pwechepwech, mangaku mi arauarau me parachol me parapar. Förün a unusen mürina, nge ekewe chon silelap le chü ra chüri liosun kerop wor. 9 Iwe, ekewe pekin mangaku meinisin ra nönnöfengen, langatamer ükükün engol me rüanü iach, nge chölaper ruu iach.

10 Ra teifengeni limu pekin mangaku, nge ekewe limu pekin ra pwal teifengeni, pwe a wor ruachö cheech. 11 Mürin ra tei pwäken mi arauarau ünükün ewe echön cheech me epek, ina usun ra pwal föri won ewe aruachön cheech. 12 Iwe, ra teätä lime pwäken ünükün ewe echön cheech me epek, ra pwal teätä lime pwäken ünükün ewe arüachön cheech me epek. Iwe, ekewe pwäken ra chök wenefengen. 13 Ra pwal föri lime ökkük seni kolt o ökküküfengeni ekewe cheech. Iei usun ewe imwenfel seni mangaku a unus.

14 Mürin ra föri engol me echö pekin mangaku seni ülöülen kuuch pwe pwölüpwölün ewe imwenfel. 15 Iwe, ekewe engol me echö pekin mangaku ra chök nönnöfengen ükükün langatamen echö pekin engol me limu iach, nge ükükün chölapan ruu iach. 16 Iwe, ra teifengeni limachö pekin mangaku pwe repwe chök eu cheech, ra pwal teifengeni ekewe wonachö pwe epwe wor aruachön cheech. 17 Mürin ra teätä lime pwäken ngeni ünükün ewe echön cheech me epek, ra pwal teätä lime pwäken ngeni ünükün ewe aruachön cheech me epek. 18 Iwe, ra föri lime ökkük seni piras o ökküküfengeni ekewe pwölüpwöl pwe repwe echö chök. 19 Ra pwal föri echö pwölüpwöl mi kapar seni silin ätemwänin sip, pwal echö pwölüpwöl seni silin man mi mürina.

20 Mürin ra föri papen ewe imwenfel seni mangaku seni ewe irä akasia, nge ekewe pap ra üwenewenetä. 21 Iwe, langatamen echö me echö kewe pap ükükün engol me limu fiit, nge chölaper rüe me fisu inis. 22 Nge fän iteiten echö pap a wor ruu oupun pwe ra tongeni afoufengen. Iei usun ra föri ngeni papen ewe imwenfel seni mangaku meinisin. 23 Iwe, ra föri rüe pap fän iten peliörün ewe imwenfel seni mangaku. 24 Mürin ra föri faik along seni silifer o anomuur fän ekewe rüe pap, ruu along fän iteiten echö pap, pwe oupun ra sökulong lon pwangen ekewe along. 25 Ra pwal föri rüe pap fän iten peliefengin ewe imwenfel seni mangaku 26 me faik alongur seni silifer, ruu along fän iteiten echö pap. 27 Iwe, ra föri wonachö pap fän iten lükisökürün ewe imwenfel seni mangaku me pelilotoun. 28 Ra pwal föri ruachö pap fän iten lepwokukun ewe imwenfel seni mangaku me lükisökürün. 29 Ekewe ruachö pap ra pachfengen seni fan tori asan o ökkükfengen ren efoch ring. Iei usun ra föri ngeni ekewe ruachö pap fän iten ekewe ruu pwokuku. 30 Ina usun a wor walüchö pap, pwal engol me wonu alongur seni silifer, ruu along fän iteiten echö pap.

31 Iwe, ra föri ömwöch seni ewe irä akasia, limefoch fän iten papen lepekin ewe imwenfel seni mangaku me epek, 32 limefoch fän iten papan me pwal epek, nge limefoch fän iten papen lükisökürün me pelilotoun. 33 Ra pwal föri ewe ömwöch mi nom lukalapen ekewe pap seni fän mesen ewe imwenfel seni mangaku tori lükisökürün. 34 Iwe, ra apacha ngeni kolt ekewe pap o föri ringen wor seni kolt, pwe ekewe ömwöch repwe sökulong lor. Ra pwal apachätä kolt won ekewe ömwöch.

35 Mürin ra föri echö cheech seni mangaku mi arauarau me parachol me parapar, pwal mangaku mi pwechepwech o mürina. Nge ekewe chon silelap le chü ra chüri liosun kerop won. 36 Iwe, ra pwal föri fofoch üren ewe cheech seni ewe irä akasia o apacha ngeniir kolt. Nge won ekewe ür a wor ökkükür seni kolt, a pwal wor rüanü alongur seni silifer. 37 Ra föri echö cheech mi chü fän iten asamalapen ewe imwenfel seni mangaku mi arauarau me parachol me parapar, pwal seni mangaku mi pwechepwech o mürina. 38 Ra pwal föri limefoch ür fiti ökkükür fän iten ewe cheech. Iwe, asen ekewe ür fiti ömwöchür ra apachätä kolt won. Ra pwal föri limu alongur seni piras.