1 Iwe, lupwen a tori ewe afisuen maram, nge ekewe chon Israel ra nonom lon ar kewe telinimw, ra tipeeu le chufengen lon Jerusalem. 2 Mürin, Jesua nöün Jehosatak we mwän fiti chienan kewe souasor me Serupapel nöün Sealtiel we mwän fiti aramasan kewe ra senätä än ewe Koten Israel we rongen asor pwe repwe eäni asoren kek won, usun a mak lon ewe allük än Moses ewe aramasen Kot. ✡ Eks 27.1 3 Inamwo ika ra niuokusiti ekewe aramas mi fen nom lon ewe fanü, nge ra chök senätä ewe rongen asor won lenian me lom o eäni asoren kek won ngeni ewe Samol mi Lapalap iteiten lesosor me lekuniol. ✡ Num 28.1-8 4 Iwe, ra föri ewe chulapen likachoch, usun a fen mak lon akotun. Ra eäni asoren kek iteiten rän aükük ngeni ükükün mine a fen pwüngüla fän iten eu me eu rän. ✡ Num 29.12-38 5 Lükün ei asor ra pwal eäni ekewe asoren kek mi fifis iteiten rän, ekewe asor mi fis lepopun maram, pwal lon än ewe Samol mi Lapalap kewe chulap meinisin mi kefilitä, me ekewe asor eman me eman a eäni seni mochenin letipan ngeni ewe Samol mi Lapalap. ✡ Num 28.11–29.39 6 Iwe, lon ewe aeuin ränin ewe afisuen maram ra popuetä le eäni asoren kek ngeni ewe Samol mi Lapalap. Nge longolongun imwenfelin ewe Samol mi Lapalap esamwo popuetä. 7 Mürin ra ngeni ekewe chon ses fau me ekewe taiku moni pwe liwinin ar angang. Ra pwal ngeni ekewe chon Siton me Tirus ener me ünümer me apüra, pwe repwe uwato irä setar seni Lepanon ngeni ewe matau o uweela tori Joppa, usun Sirus ewe kingen Persia a fen mwütätä.

8 Iwe, lon ewe aruuen maramen ewe aruuen ierin ar liwinla ren ewe imwen Kot lon Jerusalem, Serupapel nöün Sealtiel me Jesua nöün Jehosatak ra popuetä ewe angang, nge märärir kewe, ekewe souasor me chon ewe ainangen Lefi, pwal meinisin mi liwinla Jerusalem seni ar oola ra etiir. Iwe, ra awisa ekewe mwän seni ewe ainangen Lefi seni ier rüe feitä pwe repwe nemeni angangen ewe imwenfel. 9 Iwe, Jesua fiti nöün kewe mwän me aramasan, Katmiel me nöün kewe mwän, ir mwirimwirin Hotawia, pwal nöün Henatat me nöün nöün kewe fiti aramaser, ir meinisin seni ewe ainangen Lefi, ra nemeni ekewe chon angang ngeni ewe imwenfel.

10 Iwe, lupwen ekewe chon kaü imw ra föri longolongun imwenfelin ewe Samol mi Lapalap, ekewe souasor ra ütä rer fän üfer üföüfen souasor, pwal fän nöür kewe rappwa. Nge ekewe mwän seni ewe ainangen Lefi, ekewe mwirimwirin Asaf, ra ütä fän ar pisekin kaktai, pwe repwe mwareiti ewe Samol mi Lapalap usun Tafit ewe kingen Israel a aiti ngeniir me lom. ✡ 1.Kron 25.1 11 Iwe, ra kölün mwareiti ewe Samol mi Lapalap o kilisou ngeni, “Ewe Samol mi Lapalap a kirikiröch, an tong ellet ngeni chon Israel a nonom tori feilfeilachök.” Iwe, ekewe aramas ra leüömong le kökkö, lupwen ra mwareiti ewe Samol mi Lapalap, pun a fis longolongun ewe imwenfel. ✡ 1.Kron 16.34; 2.Kron 5.13; 7.3; Kölf 100.5; 107.1; 118.1; 136.1; Jer 33.11 12 Nge chomong me lein ekewe souasor me ekewe mwän seni ewe ainangen Lefi, pwal ekewe mwänirelan än semer kewe cho, ir ekewe chinlap mwän mi küna ewe aeuin imwenfel, ra leüömong le kechü, lupwen ra küna pwe a fis longolongun ei imwenfel. Nge pwal chomong me lein ekewe aramas ra fokun leüömong fän ar pwapwa. 13 Iwe, esap wor eman a tongeni weweiti ngingin ewe pwapwa fän leüömong me ngingin än ekewe aramas kechü, pun ngingir a fokun leüömong, pwe aramas ra tongeni rongorong me toau.