1 Iei än Kot kapas usun Tamaskus: Tamaskus esap chüen eu telinimw, nge epwe wiliti eu ioien mettoch mi tala. ✡ Jer 49.23-27; Am 1.3-5; Sek 9.1 2 Aramas repwe likitala ekewe telinimwen Siria tori feilfeilachök, pwiin man chök repwe nonom lor fän kinamwe, nge esap wor eman epwe eniwokusuur. 3 Än Israel telinimw mi pöchökül tittin epwe tala, nge än Tamaskus nemenem epwe wesila. Iwe, chokewe mi chüen manau lon Siria repwe itengau usun chök chon Israel. Ngang ewe Samol mi Unusen Manaman üa kapas.

4 Iwe, ewe Samol mi Lapalap a apasa, “Epwe war eu fansoun pwe lingen Israel epwe ükütiu, nge an wöü epwe wili ngeni wöüngau. 5 Israel epwe usun chök eu tanipi eman chon kinikin a pilüküfengeni irän wiich won o pökü umwun, pwal usun chök eu tanipi lon lemolun Refaim, eman a fen rusala umwun wiich won. 6 Nge ekoch chök aramas repwe chüen manau. Iwe, Israel epwe usun chök efoch irä olif eman a fen wichiki. Ruoföü ika ülüföü chök repwe nonom leulun, are föföü ika limeföü chök won palan. Ngang ewe Samol mi Lapalap, ewe Koten Israel, üa kapas.”

7 Lon ena fansoun aramas repwe chechemeni Kot ewe a föriir, repwe kütta ar alilis seni Ewe mi Pin lon Israel. 8 Resap chüen aücheani ekewe rongen asor ra föri ren püsin pöür, resap pwal anomu ar apilükülük won ekewe uluulun ewe anüfefin Astarot ra föri me ekewe rongen asoren ötüöt ra senätä. 9 Lon ena fansoun ar kewe telinimw mi pöchökül tittir repwe pönüla o tala usun chök ekewe telinimwen chon Hiw me chon Amor, ra likitala lupwen ra sü seni ekewe chon Israel.

10 Israel, ka manlükala Kot om Chon Amanau, kosap chechemeni ewe Achau om lenien op. Nge ka fotuki eu tanipi pwe kopwe fel ngeni eman koten ekis lon. 11 Inamwo are kopwe apwükü ekewe irä lon ewe chök rän, are kopwe pwal ämäriretä pwe ra sot lesosorun ewe rän ka fotukiir, esap fokun wor mine kopwe kini seniir. Epwe chök wor samau me metek esap ükütiu.

12 A wor akürangen chomong mwichen aramas, ra akürang usun püngüpüngün no. A wor wörüwörün chomong mwü, ra wörüwör usun üngüngün chomong koluk. 13 Chon ekewe mwü ra wörüwör usun üngüngün chomong koluk, nge Kot a apwüngüür pwe ra süla toau. Ra usun chök pön wiich won ekewe chuk asepwäl a ässirela, pwal usun chök pipi ra ässitä ren mölümöl. 14 Lekuniol ra afisätä niuokus watte, nge mwen epwe ränila resap chüen nom. Iei usun epwe fis ngeni chokewe ra angei pisekich fän pöchökül o soläni mine ach.