Echö Toropwe nöün
James
Kapas akom
I. Chon makkei ei toropwe: Ese fat, nge ekoch sousilelap lon Paipel ra ekieki pwe James, ätewe Paulus a aita ngeni “pwiin ach Samol” (Kal 1.19) a makkei ei toropwe.
II. A mak ngeni iö: Ngeni ekewe chon Juta, ir souläng mi nom won ekewe fanü lükün Israel.
III. Itelapemongen ei toropwe: Usun än souläng repwe pwärätä ar enletin lükü lon ar föför.
IV. Kapas aüchean ei toropwe: Oupwe chon apwönüetä kapasen Kot, nge sap chon rong chök.
V. Masouen ei toropwe: Ewe toropwe seni James ekoch kapasen öüröür usun föförün manauen souläng ra chufengen lon. A mak ngeni “ekewe engol me ruu ainang mi toropasfeil won unusen fanüfan”. James a aea chomong sokun kapasen awewe an epwe atowu kapasen öüröür usun än eman epwe eäni tipachem lon föförün, pwal kapasen emwen usun än souläng ekiek me föför. A eäni longolong pwüngün souläng, lupwen a mak usun sokopaten itelap: usun pisekisek me wöüngau, sosot, föför mürina, lifilifil aramas, lükülük me föför, kapasen awach, tipachem, anini, lamalamtekia me tipetekison, apwüngü aramas, sikesik, mosonotam me iotek.
Ewe toropwe a afata aüchean föför fiti lükülük lon föförün manauen eman souläng.
VI. Tettelin masouen ei toropwe:
Kapas akom 1.1
Lükülük me tipachem 1.2-8
Wöüngau me pisekisek 1.9-11
Asosot me sosot 1.12-18
Rong me föri 1.19-27
Kapasen fön usun lifilifil aramas 2.1-13
Lükülük me angang 2.14-26
Eman souläng me kapasen awan 3.1-18
Eman souläng me fanüfan 4.1–5.6
Sokopaten kapasen öüröür 5.7-20
1
Kapong
1.1
1 Ngang James, eman nöün Kot me ach Samol Jesus Kraist chon angang, üa kapong ngeni ekewe engol me ruu ainang mi toropasfeil won unusen fanüfan. ✡ Mat 13.55; Mark 6.3; Föf 15.13; Kal 1.19
Lükülük me tipachem
1.2-8
2 Ämi pwii kana, oupwe fokun ekiekin pwapwa lupwen oupwe tolong lon sokopaten sosot, 3 pun oua silei pwe mine a sotuni ämi lükülük a afisätä ämi tipeppos. 4 Iwe, ämi tipeppos epwe chöchöla lon föförümi meinisin, pwe oupwe mirit o unusöchüla, nge ousap osun och mettoch lon manauemi. 5 Nge are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman. 6 Nge lupwen epwe tüngor, epwe tüngor fän lükülük, nge esap tipemwaramwar. Pun eman mi tipemwaramwar a wewe ngeni eu noon lematau, a mwökütüküt o nono ren asepwäl. 7 Ei sokun aramas esap ekieki pwe epwe angei och seni ach Samol, 8 pun i eman aramas mi tipekinikin, a wiliwilikis lon an föför meinisin.
Wöüngau me pisekisek
1.9-11
9 Eman souläng mi wöüngau epwe fokun pwapwa lupwen Kot epwe atekiatä. 10 Nge eman souläng mi pisekisek epwe fokun pwapwa lupwen Kot epwe atekisonatiu. Pun ekewe chon pisekisek repwe mwor usun epö pön irän lemäl a mworotiu. 11 Pun akkar a tötä fiti pwichikaran o a keni ewe irä, pwe pön ewe irä a mworotiu o lingan a tala. Ina usun ewe mwän mi pisekisek epwe müch manauan lon an föri an kewe angang. ✡ Ais 40.6-7
Asosot me sosot
1.12-18
12 A feiöch eman aramas mi tipeppos lon sosot, pun are epwe mokos lon ewe sosot, epwe angei ewe mwärin manau Kot a pwon ngeni chokewe mi echeni i. 13 Are eman aramas a tolong lon sosot, esap fokun apasa, “Ei sosot a feito seni Kot.” Pun Kot esap tongeni küna sosotingau, i esap pwal sotuningauei eman. 14 Nge eman me eman aramas a tori sosotun ren püsin an mochenia mi atekini o pani letipan. 15 Iwe, are än eman mochenia a liapeni letipan, a fis an tipis, nge are an tipis a unusela, a fis an mäla.
16 Ämi pwii kana mi achengicheng, ousap tupula! 17 Lifang mi mürina meinisin me feiöch mi unusöch meinisin ra feitiu seni läng, ra feitiu seni ewe Sam mi föri ekewe Saram lon läng, ewe esap siwil, esap pwal fis rochopwak ren an kul. 18 Ren püsin letipan a afisikich ren ewe kapas mi let, pwe sipwe nöün mwänichi lein förian kana meinisin.
Sipwe rong o föri kapasen Kot
1.19-27
19 Ämi pwii kana mi achengicheng, oupwe chechemeni ei: Aramas meinisin repwe müttir ngeni rong, mang ngeni kapas pwal mang ngeni song, 20 pun än aramas song esap apwönüetä ewe pwüng Kot a mochen. 21 Iei mine oupwe likitätiu sokun limelimengau me sokun föföringau meinisin. Oupwe atekisonakemi mwen mesen Kot o oupwe etiwa ewe kapas a fot lomi, a tongeni amanauakemi.
22 Oupwe chon föri kapasen Kot, nge ousap chon rong chök, pwe ousap püsin atupukemi. 23 Are eman a rong ewe kapas, nge esap föri, a wewe ngeni eman aramas mi ori lon eu kilas o a küna lapalapen inisin. 24 Mürin an küna püsin inisin, a feila o müttir manlükala lapalapen inisin. 25 Nge eman mi likitü le nenelong lon ewe allük mi unusöch, ewe a angasakich, o sopwela le föri ei, nge esap manlükala rongean, pwe a apwönüetä pwüngün, ei aramas epwe feiöch lon met a föri. 26 Are eman a ekieki pwe i eman souläng, nge esap nemeni chönawan, ewe aramas a püsin atupu i, nge an souläng a lomotongau. 27 Än eman souläng limöch me pwüng mwen mesen Samach Kot a fis are epwe iei usun: epwe tümwünü ekewe mi mäsen me ekewe fefin mi mä pwülüer lon ar riaföü, epwe pwal püsin tümwünü i, pwe esap limengau ren ngauen ei fanüfan.