1 “Nge iei, Hiop, kopwe aüselingaei,

kopwe rongorong ngeni ai kewe kapas meinisin.

2 Iei üa molotä pwe üpwe apasawu mine a nom lon lelukei.

3 Ai kei kapas ra towu seni wenecharen mefien letipei,

üa apasa elletin mine üa silei.

4 Ngünün Kot a föriei,

nge ngasangasen Ewe mi Unusen Manaman a fang ngeniei manau.

5 Kopwe pälüeniei are ka tongeni.

Kopwe amolokotä o apälüaei.

6 Nengeni, ngang üa usun chök en me fän mesen Kot.

Pwal ngang üa för seni pwül.

7 Esap wor och popun om kopwe niuokusitiei,

üsap mochen pwe kopwe mefi weires rei.

8 Ewer, en ka fosolong lon selingei,

üa rongorong ngingin om kapas.

9 Ka apasa, ‘Üa limöch, esap wor ai pupungau.

Üa wesewesen limöch, esap wor ai tipis.

10 Nge Kot a chök kütta och popun mine epwe ü ngeniei ren,

a atolongaei lon tettelin chon oputan.

11 A anüküchara pechei lefilen irä

o mamasafichi mwökütüküti meinisin.’ ✡ Hiop 13.27

12 Nge üpwe kapas ngonuk, Hiop, pwe lon ei ka mwäl.

Kot a tekia seni aramas meinisin.

13 Pwota ka anini ngeni Kot

o üra pwe esap fokun pälüeni än aramas kapasen lalangau?

14 Pun Kot a kapas lon sokopaten lapalap.

Are aramas resap rongorong lon eu,

a filätä pwal eu, nge aramas resap afäli.

15 Lepwin, lupwen aramas ra möürüchou,

Kot a kapas ngeniir lon ar tan me künaer. ✡ Hiop 4.13

16 Mürin a suki selingen aramas

o eniweer ren an kapasen amirit,

17 pwe epwe akulu aramas seni ar föför mi ngau

o pinei ar resap lamalamtekia.

18 A amwöchü manauer seni peias

o tümwünüür seni feiengauen ketilas.

19 Kot a pwal amiriti eman aramas ren an atolonga lon samau

o aura inisin ren metek,

20 pwe a now anan,

esap mwo nge mwon mongö mi fokun anö.

21 A üttüla fitukan pwe sise chüen küna,

nge chün sise küna me mwan ra pwäwu.

22 Iwe, manauan a kan ngeni peias,

pwal ngeni ekewe chon künö mi awarato mäla.

23 Nge are epwe wor eman chon afför ren seni lein nöün Kot kewe ngeröün chon läng,

epwe pwäri ngeni ewe aramas mine a pwüng fän itan,

24 epwe ümöümöch ngeni o üreni,

‘Kopwe angasa ätei seni an tolong lon peias.

Üa küna och penmanauan.

25 Mürin inisin epwe wiliti inisin eman alüal,

epwe liwiniti pöchökülan lealüalün.’

26 Mürin, ewe aramas epwe iotek ngeni Kot,

nge i epwe etiwa.

Epwe feito fän mesen Kot fän pwapwa,

nge Kot epwe ngenisefäli an pwüng.

27 Iwe, epwe feito fän mesen aramas o pwärätä,

‘Üa tipis o tok seni mine a pwüng,

nge Kot esap liwini ngeniei.

28 A angasa manauei seni ai tolong lon peias,

üa künasefäli saram.’

29 Nengeni, Kot a föri ekei föför ngeni eman aramas fän ruu ika fän ülüngat,

30 pwe epwe aliwinisefäli manauan seni peias

o küna ewe saramen manau.

31 Hiop, kopwe fokun aüselingaei.

Kopwe mosonoson, nge ngang üpwe kapas.

32 Are mi wor mine ka mochen apasa, kopwe pälüeniei.

Kopwe kapas, pun üa fokun mochen pwe epwe pwä om pwüng.

33 Nge are esap wor och, kopwe aüselingaei.

Kopwe mosonoson, nge ngang üpwe aiti ngonuk tipachem.”