1 Ren ei föün ngasangasei a chechech o mwöküt seni lenian.

2 Oupwe fokun aüseling ngeni osomongun mwelien Kot,

pwal ngeni üngüngün mwelian mi towu seni lon awan.

3 Unusen fän läng a öpüngü ewe chopulap

o tinala an inefi ngeni ekewe lesopun fanüfan.

4 Mürin ei, möngüngün a fokun osomong.

A ngüngü ren mwelian mi osomong usun püngün chopulap.

A atowu ekewe inefi, lupwen aramas ra rong mwelian.

5 Fän alon Kot mettoch mi echipwör ra fis.

A föri föför mi amwarar kich sisap tongeni weweiti.

6 A kapas ngeni sno pwe epwe püngütiu won fanüfan,

nge a apasa ngeni chimwo me üt, ‘Oupwe püngümong.’

7 A aükätiu än aramas angang,

pwe ir meinisin repwe silei än Kot angang.

8 Mürin, ekewe manmwacho repwe feila lon pwanger o nonom lon.

9 Ewe mölümöl a feito seni ör,

nge patapat a feito seni efeng.

10 Ais a fis seni ngasangasen Kot,

nge ekewe koluk mi chölap ra föüla ren.

11 A amasoua ekewe kuchuchol ren koluk

o atoropasa an kewe inefi rer.

12 Ekewe kuchu ra kukulufeil fän emwenien Kot,

pwe repwe apwönüetä meinisin

mine a allük ngeniir me won unusen fanüfan.

13 A tinato ekewe kuchu pwe repwe amiriti aramas,

ika repwe achöchönü fanüfan o pwärätä an tong.

14 Hiop, kopwe aüselingaei, kopwe üla

o ekieki usun än Kot angang mi amwarar.

15 Ifa usun, ka silei usun än Kot allük ngeni ekewe inefi

me an afifirewu seni lon an kewe kuchu?

16 Ifa usun, ka silei usun än ekewe kuchu äs?

Ei eu angang mi amwarar än Kot ewe mi unus lon an silelap.

17 En ka pwichikar lon ufom,

lupwen ewe fanü a nom fän pwichikaren ewe asepwälin ör.

18 Ifa usun, ka tongeni ameresala läng usun i

o föri pwe a pöchökül usun mächä mi misimis?

19 Kopwe aiti ngenikem mine aipwe üreni Kot.

Esap wor och mine aipwe apasa, pun aia tiparoch.

20 Ifa usun, eman epwe üreni Kot pwe ngang üa mochen fos?

Ifa usun, eman aramas epwe älälei an epwe feiengau?

21 Iei aramas resap tongeni küna tinen akkar mi pwölüla ren kuchu.

Nge lupwen ewe asepwäl epwe pönala, epwe pwäla.

22 Seni efeng a tineto eu saram mi molupolup usun kolt.

A wor ling mi aniuokus pwelin ünükün Kot.

23 Sisap tongeni küna Ewe mi Unusen Manaman.

I a tekia lon an manaman me an pwüngüöch.

Ewe mi unusen pwüng esap sorei pwüng.

24 Iei mine aramas ra meniniti i,

nge i esap nenengeni aramas mi püsin ekieki pwe ra tipachem.”