1 Iwe, ewe Samol mi Lapalap a ngeni Moses ekei allük: 2 Are eman a tipis ngeni ewe Samol mi Lapalap ren an atupu chon arun, pun esap mochen aliwini mine a wisen tütümwünü are amwöchü, ika ren an soläni och, ika ren an ariaföüü chon arun, 3 are a küna och mine a pöütüla, nge a chofana won, are a akapelmwäl won och ika a föri sokopaten tipis aramas ra föri, iei usun mine epwe föri: 4 Are eman a tipis, epwe aliwini mine a soläni, are mine a angei seni aramas fän pöchökül, epwe pwal aliwini mine eman a awisa pwe epwe tütümwünü, are mine a pöütüla, nge a küna, 5 pwal ekewe mettoch meinisin a akapelmwäl won. Iwe, epwe aliwini unusan, nge epwe pwal apacha ngeni eu lelimu o ngeni mine än ewe mettoch lon ewe ränin a eäni an asoren pupungau. 6 Iwe, epwe uwato ren ewe souasor eman ätemwänin sip esap wor terin, pwe an asoren pupungau ngeni ewe Samol mi Lapalap. Nge liwinin ewe mönün asor me reöm epwe usun chök liwinin ewe mönün asoren pupungau. 7 Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas. Iwe, an kewe tipis meinisin a föri repwe musala. ✡ Num 5.5-8

8 Iwe, ewe Samol mi Lapalap a üreni Moses, 9 pwe epwe ngeni Aaron me nöün kewe mwän ekei allükün asoren kek: Ewe asoren kek epwe nom won ewe rongen asor unusen pwin tori lesosor, nge ekkeiin won epwe chök kükü. 10 Iwe, ewe souasor epwe üföüfolong üfan mi pwechepwech o aealong an raueses mi pwechepwech. Mürin epwe tukei falangen ekkeiin ewe asoren kek mi nom won ewe rongen asor o iseis ünükün. 11 Mürin epwe siwili üfan kewe o uwawu ewe falang lon eu leni mi limöch lükün ewe ia ra nonom ie. 12 Iwe, ewe ekkei won ewe rongen asor epwe chök kükü, nge esap fokun kunula. Iteiten lesosor ewe souasor epwe sosoni ewe ekkei, epwe pwal atettelöchü ewe mönün asoren kek o kenala kirisin ekewe mönün asoren kinamwe won. 13 Iwe, ekkei epwe chök kükü fochofoch won ewe rongen asor, esap fokun tongeni kunula.

14 Nge iei allükün ewe asoren mongö: Nöün Aaron kewe mwän repwe uwato ewe asoren mongö ngeni ewe Samol mi Lapalap mwen ewe rongen asor. 15 Iwe, eman leir epwe angei ekumwuch pilawa mi amas o mürina seni ewe asoren mongö me ewe apüra seni föün olif, pwal unusen ewe apach mi pwokus mi nom won, o kenala me won ewe rongen asor, iei asisilan pwe a asor meinisin. Iei eu asor ewe Samol mi Lapalap a efich pwoon. 16 Nge lusun ewe asoren mongö Aaron me nöün kewe mwän repwe mongö. Iwe, repwe mongö ewe asoren mongö esap wor iis lon me lon eu leni mi pin lon ewe leni lükün ewe imw mangaku ia aramas ra churi Kot ie. 17 Iwe, resap tongeni umuni ewe pilawa fiti iis. Ewe Samol mi Lapalap a ngeniir pwe inetir seni ewe asoren mongö. Iei eu asor mi unusen pin usun chök ewe asoren tipis me ewe asoren pupungau. 18 Iteiten mwän me lein ekewe mwirimwirin Aaron repwe mongö seni. Iei inetir seni ewe asor ngeni ewe Samol mi Lapalap, seni eu täppin aramas tori eu täppin. Esap fokun wor eman lükür epwe atapa ekewe asor, pun iö a atapa epwe feiengau ren pinin.

19 Iwe, ewe Samol mi Lapalap a ngeni Moses ekei allük 20 fän iten afeiöchün eman souasor i mwirimwirin Aaron: Lon ewe rän, lupwen eman leir a kepit, epwe eäni asor ngeni ewe Samol mi Lapalap ruu paun pilawa mi amas o mürina usun chök ükükün ewe asoren mongö ra eäni iteiten rän. Esop seni ewe asor epwe eäni asor lesosor, nge esop lekuniol. 21 Iwe, epwe nokopuni fiti apüra lon eu furaipan, epwe aipwötü o kinikisietiu usun eu asoren mongö. Mürin epwe eäni asor pwe epwe eu asor ewe Samol mi Lapalap a efich pwoon. 22 Ewe souasor mi kepit me lein nöün Aaron kewe mwän pwe epwe siwili Aaron, epwe eäni ei asor ngeni ewe Samol mi Lapalap fansoun meinisin. Iwe, unusen ei asor epwe kek. 23 Iteiten än eman souasor asoren mongö epwe kek meinisin. Esap wor eman epwe tongeni mongö seni.

24 Iwe, ewe Samol mi Lapalap a pwal kapas ngeni Moses, 25 pwe epwe ngeni Aaron me nöün kewe mwän ekei allükün asoren tipis: Lon ewe leni ia ra niela ie ewe mönün asoren kek repwe pwal niela ie ewe mönün asoren tipis fän mesen ewe Samol mi Lapalap. Ei asor a unusen pin. 26 Ewe souasor mi föri ei angangen asoren tipis epwe pwal mongö seni ewe asor lon ewe leni mi pin lükün ewe imw mangaku ia aramas ra churi Kot ie. 27 Iwe, iö a atapa fituken ewe mönün asor epwe feiengau ren pinin. Nge lupwen chan ewe mönün asor a sükiti echö üf, kopwe limeti me lon eu leni mi pin. 28 Are fituken ewe mönün asor a kuk lon eu sepi mi för seni pwül, ewe sepi epwe ömmök. Nge are a kuk lon eu sepi mi för seni piras, ewe sepi epwe töttölöch o chichi lon koluk. 29 Iteiten mwän mi wiseni ewe wisen souasor ra tongeni mongö seni ewe asor. Ei asor a unusen pin. 30 Nge resap tongeni mongö seni ewe sokun asoren tipis ra uwala chan lon ewe imwenfel seni mangaku, pwe repwe föri asoren amusamusen tipis lon ewe leni mi pin. Ei asor epwe kekila.