1 Iwe, ewe Samol mi Lapalap a kapas ngeni Moses mürin mälan nöün Aaron kewe ruoman mwän, ra mäla lupwen ar eäni asor mine esap pin fän mesen ewe Samol mi Lapalap. 2 Iwe, ewe Samol mi Lapalap a üreni Moses, “Kopwe asile ngeni Aaron pwiüm we, pwe esap tolong inet chök a mochen lon ewe leni mi unusen pin pekilan ewe cheech mwen ewe öppüng mi nom won ewe pworofel, pwe esap mäla. Pun üpwe pwä lon ewe kuchu asen ewe öppüng. ✡ Ipr 6.19 3 Iei usun pwüngün än Aaron epwe tolong lon ewe leni mi unusen pin: Epwe uwato eman nienifön ätemwänin kow fän iten asoren tipis, pwal eman ätemwänin sip fän iten asoren kek. ✡ Ipr 9.7 4 Iwe, epwe üföüf ewe üf mi pin o pwechepwech, pwal ewe rauesesin lon mi pwechepwech, epwe peliti ngeni ewe pelit mi pwechepwech o imweimw ewe akkau mi pwechepwech. Ikkei ekewe üf mi pin. Iwe, epwe tütü, mürin epwe üföüfolong ekewe üf mi pin. 5 Aaron epwe pwal angei seni ekewe aramasen Israel ruoman ätemwänin kuuch fän iten asoren tipis me eman ätemwänin sip fän iten asoren kek.

6 Iwe, Aaron epwe eäni asor ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis. 7 Mürin, epwe angei ekewe ruoman kuuch o anomuur fän mesen ewe Samol mi Lapalap leasamalapen ewe imw mangaku ia aramas ra churi Kot ie. 8 Ikenan Aaron epwe asisil won ekewe ruoman kuuch, eman fän iten ewe Samol mi Lapalap, nge ewe eman fän iten Asasel * Asasel eli iten eman anün fanüapö, nge wewen ewe it asüela. 9 Iwe, Aaron epwe uwato ewe kuuch mi kuw ewe asisil fän iten ewe Samol mi Lapalap o eäni asoren tipis. 10 Nge ewe kuuch a kuw ewe asisil fän iten Asasel Aaron epwe pwal uwato fän mesen ewe Samol mi Lapalap, nge men manau. Mürin epwe tinala ewe kuuch lon fanüapö ren Asasel, pwe epwe uweala än ekewe aramas tipis.

11 Iwe, Aaron epwe uwato ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis. Epwe niela ewe ätemwänin kow pwe asoren tipis fän püsin itan. 12 Mürin epwe angei eu sepien asoren ötüöt mi masou ren molien ekkei seni ewe rongen asor mi nom fän mesen ewe Samol mi Lapalap. Epwe pwal angei ruukumuch apach mi pwokus o kinikisitiu. Iwe, epwe uwala ekei mettoch pekilan ewe cheech lon ewe leni mi unusen pin 13 o isetä ewe apach mi pwokus won ewe ekkei mi nom fän mesen ewe Samol mi Lapalap, pwe ötüötün ewe apach mi pwokus epwe pwölüela ewe öppüng mi nom won ewe pworofel, pwe esap mäla. 14 Iwe, epwe angei ekis chan ewe ätemwänin kow o äsupu ren aütün ngeni lepekin me fän mesen ewe öppüng, epwe pwal äsupu fän fisu ngeni mwen ewe pworofel.

15 Mürin, epwe niela ewe kuuch pwe asoren tipis fän iten ekewe aramas o uwalong chan lon ewe leni mi unusen pin. Iwe, epwe föri ngeni chan ewe kuuch usun mine a föri ngeni chan ewe ätemwänin kow. Epwe äsupu ewe cha ngeni won ewe öppüng pwal ngeni mwen ewe pworofel. ✡ Ipr 9.12 16 Iei usun Aaron epwe föri asoren limelim fän iten ewe leni mi unusen pin pokiten limengauen ekewe aramasen Israel, pwal pokiten ar pupungau me ar tipis meinisin. Iei usun epwe pwal föri fän iten ewe imwenfel seni mangaku mi nom rer lon lenier mi limengau. 17 Iwe, esap wor eman epwe nom lon ewe imwenfel seni mangaku, lupwen Aaron a tolong lon ewe leni mi unusen pin pwe epwe föri asoren amusamusen tipis, tori an epwe towu wesin an föri asoren amusamusen tipis fän püsin itan, fän iten an famili, pwal fän iten ekewe chon Israel meinisin. 18 Mürin epwe towu ren ewe rongen asoren kek mi nom fän mesen ewe Samol mi Lapalap, pwe epwe föri asoren limelim fän iten ewe rong. Iwe, epwe angei ekis chan ewe ätemwänin kow, pwal ekis chan ewe kuuch, o tofätä won mächän ewe rong. 19 Iwe, epwe pwal äsupu ren aütün ekis chan ekewe mönün asor fän fisu won ewe rong, pwe epwe alimöchü seni limengauen ekewe aramasen Israel o apini.

20 Are Aaron a wes me föri ewe asoren limelim fän iten ewe leni mi unusen pin, ewe imw mangaku ia aramas ra churi Kot ie, me ewe rongen asor, epwe uwato ewe kuuch mi manau. 21 Mürin, Aaron epwe anomu pöün me ruofoch won möküren ewe kuuch mi manau o pwärätä won än chon Israel föföringau meinisin, ar pupungau me ar tipis meinisin. Iwe, epwe anomu ekewe tipis won möküren ewe kuuch o tinala lon fanüapö ren eman mwän mi fil fän iten ewe angang. 22 Iwe, ewe kuuch epwe uweela ar föföringau meinisin ngeni eu leniapö. Nge ätewe mi emwenala ewe kuuch epwe chök likitala lon leniapö.

23 Mürin, Aaron epwe tolong lon ewe imwenfel seni mangaku o pwilitawu ekewe üf mi pwech a üföüf lupwen an tolong lon ewe leni mi unusen pin. Iwe, epwe likitiir ikenan. ✡ Is 44.19 24 Epwe tütü lon eu leni mi pin o üföüfolong üfan kewe. Mürin, epwe towu o eäni an asoren kek me än ekewe aramas asoren kek, pwe epwe föri asoren amusamusen tipis fän itan pwal fän iten ekewe aramas. 25 Iwe, kirisin ewe mönün asoren tipis epwe keni me won ewe rongen asor. 26 Nge ätewe mi afeilai ewe kuuch ren Asasel epwe sopuni üfan o tütü. Mürin epwe tongeni tolong lon ewe leni ia ra nonom ie. 27 Iwe, repwe uwala lükün ewe ia ra nonom ie ekewe mönün asoren tipis, iei ewe ätemwänin kow me ewe kuuch, mine char ewe Aaron a fen uwala lon ewe leni mi unusen pin pwe asoren amusamusen tipis. Iwe, silir me fituker pwal tarer repwe kek. ✡ Ipr 13.11 28 Nge ätewe mi wisen keniir epwe sopuni üfan o tütü, mürin epwe tongeni tolong lon ewe leni ia ra nonom ie.

29 Iwe, ei epwe eu allük ngenikemi oupwe apwönüetä fansoun meinisin. Lon aengolun ränin ewe afisuen maram oupwe echikefel, ousap pwal föri och angang, sap ämi are ekewe chon ekis mi nom remi. 30 Pun lon ewe rän epwe fis asoren amusamusen tipis fän itemi pwe oupwe limöch. Mürin oupwe limöch fän mesen ewe Samol mi Lapalap seni ämi tipis meinisin. 31 Iwe, ei ränin sapat epwe eu ränin asösö remi, nge ämi oupwe echikefel. Iei eu allük oupwe apwönüetä fansoun meinisin. 32 Nge ewe souasor mi kepit o apinipin ngeni wisen souasor lon lenien saman epwe föri asoren amusamusen tipis, nge epwe üföüf ekewe üf mi pwechewech o pin. 33 Iwe, epwe föri asoren limelim fän iten ewe leni mi unusen pin, fän iten ewe imw mangaku ia aramas ra churi Kot ie, pwal fän iten ewe rongen asor. Epwe pwal föri asoren amusamusen tipis fän iten ekewe souasor me ekewe aramas meinisin. 34 Ei epwe eu allük oupwe apwönüetä fansoun meinisin, pwe epwe fis asoren amusamusen tipis fän eu lon eu ier fän äsengesin aramasen Israel pokiten ar tipis kana.” Iwe, Moses a föri usun mine ewe Samol mi Lapalap a allük ngeni. ✡ Lif 23.26-32; Num 29.7-11