Malakai
Kapas akom
I. Iten ei puk: Malakai, pun mine a mak lon an kapasen osuni. Wewen ei it Malakai: Nei chon künö.
II. Chon makei ei puk: Malakai
III. Itelapemongen ei puk: Oupwe ekieksefäl o liwinsefäliti Kot.
IV. Kapas aüchean ei puk: Kot epwe apwüngü nöün aramas pokiten ar kul seni o apiningaua ar angangen fel ngeni.
V. Masouen ei puk Malakai: Ei puk a mak arapakan ngeni ewe ier 425 mwen Kraist (B.C.) mürin kaüsefälin ewe imwenfel lon Jerusalem. Ekewe kapas aüchea me lon än ewe soufos pworaus, pwe ekewe souasor me ekewe aramas repwe anüküchara ar pwon ngeni Kot fän allükülük. A fat pwe nöün Kot kewe aramas ra apwangapwang lon manauen ar souläng o föföringau. Ekewe souasor me ekewe aramas ra soläni och seni Kot pokiten ar resap uwala ren ekewe asor mi afat, pwe repwe eäni asor ngeni, resap pwal föri usun mine Kot a aiti ngeniir. Iei mine ewe Samol mi Lapalap epwe war pwe epwe apwüngü o alimöchü nöün aramas, nge epwe tinala akom nöün chon künö pwe epwe amolätä efoch al me mwan o arongafeili an pwon.
VI. Tettelin masouen ei puk:
Än chon Israel tipis 1.1–2.16
Än Kot apüng me an ümöümöch 2.17–4.6
1
Kot a echeni chon Israel
1.1-5
1 Iei pwärien Malakai we, a asile ngeni chon Israel fän alon ewe Samol mi Lapalap. 2 Iei alon ewe Samol mi Lapalap ngeni nöün aramas, “Üa echenikemi.” Nge ämi oua ais, “Ifa usun om echenikem?” Iwe, ewe Samol mi Lapalap a pälüeni, “Ifa usun, Esau sap pwin Jakop? Üa echeni Jakop, 3 nge üa oput Esau. Üa ataela fanüan mi chukuchukutä o likitala fanüan seni saman ngeni ekewe manmwachon lon fanüapö.” ✡ Rom 9.13 4 Are chon Etom repwe apasa, “Äm kewe telinimw ra tatakis, nge äm aipwe aüsefäliretä,” mürin ewe Samol mi Unusen Manaman epwe apasa, “Repwe tongeni aüretä, nge ngang üpwe ataretiu, tori aramas repwe aita ngeni: Ewe fanü mi ngau, pwal eu mwichen aramas ewe Samol mi Lapalap a song ngeniir tori feilfeilachök.” 5 Püsin mesemi repwe küna ei, nge oupwe apasa, “Ewe Samol mi Lapalap a tekia, an iteüöch a tori lükün kiännin Israel.” ✡ Ais 34.5-17; 63.1-6; Jer 49.7-22; Is 25.12-14; 35.1-15; Am 1.11-12; Op 1-14
Kot a apwüngü ekewe souasor
1.6–2.9
6 Iei alon ewe Samol mi Unusen Manaman ngeni ekewe souasor, “Eman nau a asamolu saman, nge eman chon angang a asamolu an samol. Are ngang sememi, pwota ousap asamoluei? Nge are ngang nöümi samol, pwota ousap meninitiei? Ämi souasor oua turunufaseei. Nge oua ais, ‘Met aia turunufaseek ren?’ 7 Ren ämi eäni asor mongö mi limengau won ai rongen asor. Nge ämi oua ais, ‘Met aia alimengaua ren?’ Ren ämi apasa pwe ai rongen asor a aücheangau. 8 Ifa usun, lupwen oua eäni asor ekewe man mi chun, esap ngau? Nge ifa usun, lupwen oua eäni asor ekewe man mi ter ika samau, esap ngau? Are oupwe fang ngeni nöümi kepina ei sokun man, ifa usun, epwe pwapwa ngenikemi ika kirikiröch ngenikemi? ✡ Tut 15.21 9 Nge iei oua tüngor ngeni Kot pwe epwe kirikiröch ngenikemi. Ifa usun, epwe kirikiröch ngenikemi ren ena sokun lifang mi nom lepöümi?” 10 Iei alon ewe Samol mi Unusen Manaman, “Amwo epwe wor eman me leimi epwe apüngala ekewe asamalap, pwe ousap akümwäli ekkei me won ai rongen asor. Üsap pwapwaitikemi, üsap etiwa eu asor seni lepöümi. 11 Pun seni ewe ia akkar a töta me ie tori ewe ia a tuputiu me ie chon ekewe mwü ra asamolu itei. Ekis meinisin ra eäni asor apach mi pwokus ngeniei, eu asor mi limöch. Pun chon ekewe mwü ra asamoluei. 12 Nge oua apiningaua pinin ewe rongen asor, lupwen oua apasa pwe ai rongen asor a limengau, nge ewe mongö mi nom won a anioput. 13 Oua apasa, ‘Aia chipwang ren ei lapalap,’ oua pwal oputaei. Ämi oua uwato pwe ämi asor mine oua fen soläni ika mine a ter ika mine a samau. Ifa usun, oua ekieki pwe ngang üpwe etiwa ei sokun asor seni lepöümi? 14 A anümamau eman chon atuputup mi pwon pwe epwe eäni ngeniei asor eman ätemwänin sip seni nöün pwiin man, nge mürin a eäni asor eman mi wor terin. Pun ngang eman king mi lap, nge chon ekewe mwü ra meninitiei.”