1 “Iwe, iei usun ewe Mwün Läng a wewe ngeni: A wor eman mwän a ukkosorola an epwe kütta nöün chon angang pwe repwe angang lon an tanipin wain. 2 A tipeeu ngeni pwe epwe möniir won ükükün eföü moni silifer, iei liwinin eman chon angang lon eu rän. Mürin a tiniirela pwe repwe angang lon an tanipin wain. 3 Iwe, kulok tiu a feilasefäl ngeni ewe lenien amömö o küna pwal ekoch mwän ra ütämwäl, nge esap wor met ra föri. 4 Iei mine a üreniir, ‘Oupwe pwal feila o angang lon ai tanipin wain. Iwe, ngang üpwe ngenikemi ükükün pwüngün liwinimi.’ 5 Iei mine ekewe chon angang ra feila. Iwe, kulok engol me ruu me kulok ülüngat a pwal föri usun chök mine a föri me mwan. 6 Iwe, ina epwe arapakan kulok limu lekuniol, lupwen a pwal feila lon ewe lenien amömö, a küna ekoch mwän ra chök ükütä ikenan. Iwe, a aisiniir, ‘Pwota oua chök asolapa unusen ei rän ren ämi ükütä chök ikei, nge ousap föri och?’ 7 Ra pölüeni, ‘Esap wor eman a mönikem.’ Iwe, a üreniir, ‘Oupwe pwal feila o angang lon ewe tanipin wain.’ 8 Nge lupwen a tori lekuniol, ewe mine an ewe tanipin wain a üreni nöün we chon souwan, ‘Kopwe köri ekewe chon angang o ngeniir liwinin ar angang. Kopwe popuetä ren ekewe amüchülan chon angang mi kükümwir le tolong tori chokewe mi akom le tolong.’ ✡ Lif 19.13; Tut 24.15 9 Iwe, lupwen ekewe mwän mi kükümwir le popuetä ar angang kulok limu ra feito, ra angei eföü moni silifer pwe liwiniir. 10 Iei mine lupwen ekewe mwän mi akom le tolong lon ewe angang ra war pwe repwe angei liwiniir, ra ekieki pwe repwe angei lap seni. Nge pwal eman me eman leir a chök angei eföü moni silifer. 11 Iwe, ra angei liwiniir kewe o popuetä le lal ngeni ewe mine an ewe tanipi. 12 Ra apasa, ‘Ekei mwän mi tolong le sopolan ra chök angang lon ükükün eu awa, nge äm aia angang weires fän akkar lon unusen eu rän, nge ka chök anönnöü liwiniir me liwinim.’ 13 Iwe, ewe mine an ewe tanipin wain a üreni eman leir, ‘Pwii, kopwe rongorong. Ngang üsap föri och mi mwäl ngonuk. En ka tipeeu ngeniei pwe kopwe angang lon unusen eu rän fän iten eföü moni silifer. 14 Iei kopwe angei liwinum o feila le imwom. Ngang üa mochen ngeni ei mwän mi tolong lesopolan liwinin won ükükün met üa liwini ngonuk. 15 Ifa usun, esap wor ai pwüüng ai üpwe föri ngeni nei moni mine üa mochen? Ika ka lolowo pokiten üa kirikiröch?’ ” 16 Iwe, Jesus a pwal apasa, “Iei mine chokewe mi kükümwir repwe akom, nge chokewe mi akom repwe kükümwir.” ✡ Mat 19.30; Mark 10.31; Luk 13.30

17 Iwe, lupwen Jesus a feitä Jerusalem, a emwenala ekewe engol me ruoman chon kaiö, pwe epwe kapas ngeniir lupwen ar fetal. 18 Iwe, a üreniir, “Oupwe rongorong. Ousipwe feitä Jerusalem. Nge ikenan Nöün Aramas epwe tolong lepöün ekewe souasor mi lap me ekewe Sensen Allük. Repwe apwüngü pwe epwe mäla, 19 mürin repwe atolonga lepöün ekewe chon lükün Israel. Ir repwe urumwotei, repwe wichi o iräpengesi. Nge mürin ülüngat rän epwe manausefälitä.”

20 Mürin pwülüen Sepeti a feito ren Jesus fiti nöün kewe ruoman alüal, a fotopwäsuk me mwan o uwei an tüngor ngeni. 21 Iwe, Jesus a aisini, “Met ka mochen?” Neminei a üra, “Kopwe pwon ngeniei, pwe nei kei ruoman alüal repwe mot ünükum, eman lepelifichum, nge eman lepelimöngum, lupwen ka nom lon wisom wisen king.” 22 Nge Jesus a üreni ekewe ruoman alüal, “Ämi ousap silei mine oua tüngor. Ifa usun, oupwe tongeni ün seni ewe kapen riaföü ngang üpwe ünümi?” Ra pölüeni, “Ewer, äm aia tongeni.” 23 Jesus a üreniir, “Ewer, oupwe fokun ün seni ai we kap. Nge esap wor ai pwüüng ai üpwe filätä iö epwe mot lepelifichi me lepelimöngi. Ekei leni Semei a amolätä fän iten chokewe i a filiiretä.”

24 Iwe, lupwen ekewe engol chon kaiö ra rongorong ei pworaus, ra chou ngeni ekewe ruoman pwipwi. 25 Iei mine Jesus a körifengeniir meinisin o üreniir, “Ämi oua silei, pwe ätekewe mi nemeni chon lükün Israel ra samoluniir fän pwora, nge ekewe nöüwis mi lap ra nemeniir fän pöchökül. 26 Nge esap iei usun lefilemi. Pun iö a mochen lap leimi epwe chon angang ngenikemi. ✡ Luk 22.25-26 27 Nge iö a mochen epwe chon akom mwemi, epwe nöümi chon angang, ✡ Mat 23.11; Mark 9.35; Luk 22.26 28 usun chök Nöün Aramas esap feito pwe aramas repwe angang ngeni, nge a feito an epwe angang ngeniir o fangala manauan fänäsengesin chomong aramas pwe möön manauer.”

29 Lupwen Jesus me nöün kewe chon kaiö ra towu seni Jeriko, eu mwichen aramas mi chomong a tapwela mürir. 30 Iwe, ruoman mwän mi chun ra mot lepekin ewe al o rongorong pwe Jesus a fetal won ewe al. Iei mine ra popuetä le kökkö fän leüömong, “Äm samol, nöün Tafit, kopwe tongekem!” 31 Nge chomong aramas ra song ngeniir o üreniir pwe repwe fanafanala. Nge ir ra chök alapala ar kökkö, “Äm samol, nöün Tafit, kopwe tongekem!” 32 Iwe, Jesus a üla o kökköriireto. A aisiniir, “Met oua mochen pwe üpwe föri ngenikemi?” 33 Ra pölüeni, “Äm samol, äm aia mochen pwe aipwe küna mwem.” 34 Jesus a fokun tongeer o atapa meser. Lon ewe chök otun ra tongeni küna mwer o tapwela mürin Jesus.