Nöün Paulus Toropwe ngeni
Filimon
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ewe souläng Filimon.
III. Itelapemongen ei toropwe: Usun än souläng repwe amusala tipisin aramas.
IV. Kapas aüchean ei toropwe: Lon Kraist echök a wor enletin pwipwifengenin sokun aramas.
V. Masouen ei toropwe: Filimon eman souläng mi iteföüla, eli i eman chon ewe mwichefel lon Kolose, a nöüni eman amanau itan Onesimus. Ei amanau a sü seni an ei masta. Nge mürin a churi Paulus mi nom lon imwen fötek lon ena fansoun. Paulus a alisi Onesimus an epwe soulängila. Lon nöün Paulus ei toropwe ngeni Filimon a tüngor ngeni Filimon an epwe chäsefäl ngeni nöün ei amanau, ätei Paulus a tinsefäliela ren. A tüngor ngeni an epwe etiwa nöün ei amanau o amusala an tipis, nge epwe pwal etiwa usun eman pwiin souläng.
VI. Tettelin masouen ei toropwe:
Kapas akom 1-3
Än Paulus mwareiti Filimon 4-7
Än Paulus tüngor fän iten Onesimus 8-22
Kapasen lesopolan 23-25
1
Kapong
1-3
1 Ngang Paulus eman chon fötek fän iten Kraist Jesus, pwal pwiich ei Timoty, aia kapong ngonuk en achengicheng Filimon, en chienach we chon angangen Kraist. 2 Aia pwal kapong ngeni fefinach Appia, ngeni Arkipus chienach we sounfiu fän iten Kraist, pwal ngeni chon ewe mwichefel mi chufengen lon imwom: ✡ Kol 4.17 3 Samach Kot me ach Samol Jesus Kraist epwe fang ngenikemi ümöümöch me kinamwe.
Än Filimon tong me lükülük
4-7
4 Pwii Filimon, fansoun meinisin üa kilisou ngeni ai Kot lupwen üa chechemenuk lon ai iotek, 5 pun üa rongorong usun om tong ngeni ekewe chon pin meinisin, pwal usun om lükü ach Samol Jesus Kraist. 6 Üa iotek pwe ach chiechifengen me en lon ach lükü Jesus epwe atoto watten ach weweöchiti ekewe sokopaten feiöch sia eäni lon Kraist. 7 En pwii achengicheng, om tong a atoto ngeniei watten pwapwa me watten chip, pun en ka apwapwai leluken ekewe chon pin meinisin.
Eu tüngor fänäsengesin Onesimus
8-22
8 Iei popun üa tongeni pwora lon Kraist, pwe üpwe allük ngonuk mine kopwe föri. 9 Nge pokiten ai echenuk üpwe le tüngor ngonuk. Ngang üa föri ei, inamwo ika ngang Paulus üa chinlap, nge pwal lon ei fansoun üa eman chon fötek fän iten Kraist Jesus. 10 Iei mine üa tüngor ngonuk fänäsengesin Onesimus, i wesewesen nei lon Kraist, pun lupwen üa nonom lon fötek üa wiliti eman semelapan lon ngün. ✡ Kol 4.9 11 Me lom i a lomotongau ngonuk, nge iei a fokun lomotöch ngonuk, pwal ngeniei.
12 Ngang üa tinsefäliela reöm iei, nge lelukei a pwal etala i. 13 Ngang üa mochen amwöchü i, pwe epwe nom rei lupwen üa nom lon imwen fötek fän iten ewe Pworausen Manau, pwe epwe tongeni siwiliik le alisiei. 14 Nge ngang üsap mochen arianuk om kopwe alisiei, pun üa mochen pwe kopwe föri ei seni mochenin letipom. Iei mine üsap föri och are kosap tipeeu ngeni.
15 Eli a fis pwe Onesimus a toau senuk lon eu fansoun mochomoch, pwe kopwe angesefäli pwe epwe nom reöm fansoun meinisin. 16 Iwe, iei esap chüen chök eman amanau, nge a kon aüchea seni eman amanau, pun i eman pwiich mi achengicheng lon Kraist. A men fokun aüchea me rei! Nge epwe le fen ifan me aüchean me reöm, pwe i eman amanau nge pwal eman pwiich lon ach Samol.
17 Iei mine are ka ekieki pwe ngang eman chienom, kopwe etiwasefäli Onesimus usun chök om etiwaei. 18 Nge are Onesimus a föri och mi mwäl ngonuk, are a liwinimang ngonuk won och, kopwe makkei itei won pwe üpwe wisen mönätiu. 19 Ngang Paulus üa makkei ei ren püsin pei, pwe üpwe mönisefäli ngonuk meinisin. Nge enlet, üsap wisen achema ngonuk pwe en ka liwinimang ngeniei ren püsin manauom. 20 Iei mine en pwii, kose mochen kopwe apwönüetä ai ei tüngor fän iten ach Samol. Kopwe apwapwai letipei, pun en pwii lon Kraist.
21 Lupwen üa makkei ei toropwe ngonuk, üa silei pwe kopwe aleasochisi mine üa tüngor. Enlet, üa silei pwe kopwe fen föri lap seni mine üa tüngor. 22 Iwe, pwal och: Kose mochen kopwe amolätä eu ruum fän itei, pun üa apilüköch pwe Kot epwe apwönüetä mine oua tüngor lon ämi iotek pwe üpwe liwinsefälila remi.
Kapongen lesopolan
23-25
23 Epafras mi nom rei lon imwen fötek fän iten Kraist Jesus a tinala an kapong ngonuk, ✡ Kol 1.7; 4.12 24 pwal Markus, Aristarkus, Temas me Lukas chienei kewe chon angang ra kapong ngonuk. ✡ Föf 12.12,25; 13.13; 15.37-39; 19.29; 27.2; Kol 4.10,14; 2.Tim 4.10,11 25 Ümöümöchün ach Samol Jesus Kraist epwe nonom remi meinisin.