1 Mürin üa küna pwe ewe Lam a ülei ewe aeuin pwau seni ekewe fisu. Iwe, üa rongorong pwe eman me lein ekewe föman mönümanau a apasa ren mwelian mi wewe ngeni chopun chopulap, “Etto!” 2 Iwe, üa nenengeni o üa küna eman oris mi pwechepwech, nge ewe mi mot won a amwöchü efoch likapich, a pwal angei epa mwärämwär. Iwe, a feila, a pwora o win. ✡ Sek 1.8; 6.3,6

3 Mürin ewe Lam a ülei ewe aruen pwau. Üa rongorong pwe ewe aruomanün mönümanau a apasa, “Etto!” 4 Iwe, pwal eman oris mi parapar a towu, nge ewe mi mot won a mwümwü ngeni an epwe aworato maun won fanüfan, pwe aramas repwe nifengeniir. A angei efoch ketilas mi langatam. ✡ Sek 1.8; 6.2

5 Mürin ewe Lam a ülei ewe aülüngatin pwau, iwe, üa rongorong ewe aülümanün mönümanau a apasa, “Etto!” Iwe, üa nenengeni o üa küna eman oris mi chochol, nge ewe mi mot won a amwöchü eu kilo lon pöün. ✡ Sek 6.2,6 6 Iwe, üa rongorong och mi wewe ngeni eu möngüngü mi feito seni lein ekewe föman mönümanau a apasa, “Liwinin ruu paun pilawa mi amas seni föün wiich iei ükükün peiofen eman chon angang lon eu rän, pwal liwinin wonu paun pilawa mi amas seni föün parli iei ükükün peiofen eman chon angang lon eu rän. Nge kosap afeiengaua ekewe irä olif me ekewe irän wain!”

7 Mürin ewe Lam a ülei ewe arüanün pwau, iwe, üa rongorong ewe afömanün mönümanau a apasa, “Etto!” 8 Iwe, üa nenengeni o üa küna eman oris mi sawepwech, nge ewe mi mot won a iteni mäla o ewe lenien sotup a tapw me mürin. A wor ar nemenem won eu lerüanün chon fanüfan ar repwe niirela ren maun, mailengita, samau me manmwacho. ✡ Is 14.21

9 Mürin ewe Lam a ülei ewe alimuen pwau. Iwe, üa küna fän ewe rongen asor ngünün chokewe mi ninnila pokiten ar arongafeili än Kot kapas o eäni allükülük lon ar pwärätä itan. 10 Ra kökkö fän mwelier mi leüömong, “Äm Samol mi Unusen Manaman, ka pin o let. Ifa langatamen fansoun tori om kopwe apwüngü ekewe aramas won fanüfan o kopwe ngeniir chappen ar nikeemila?” 11 Mürin Kot a ngeni eman me eman leir echö üf mi pwechepwech o a üreniir, pwe repwe mwo asösö ekis chök fansoun mochomoch, tori epwe unus iteiten chiechier kewe chon angang me pwiir kewe repwe ninnila usun chök ir.

12 Iwe, üa nenengeni pwe ewe Lam a ülei ewe awonuen pwau. A fis eu chechechin fanü mi fokun lapalap. Akkar a fokun rochola usun chök mangaku mi chol seni tuk, nge ewe maram a fokun parala usun chök paren cha. ✡ Pwär 11.13; 16.18; Ais 13.10; Sow 2.10,31; 3.15; Mat 24.29; Mark 13.24-25; Luk 21.25 13 Iwe, ekewe fü ra turutiu won fanüfan usun chök föün ewe irä fiik resamwo nup ra turutiu, lupwen eu asepwäl mi pöchökül a amworeretiu. ✡ Ais 34.4 14 Läng a numufengen usun chök echö toropwe a numufengen o morola, nge ekewe chuk meinisin me ekewe fanüen leset ra mwöküt seni lenier. ✡ Pwär 16.20 15 Mürin ekewe kingen fanüfan, ekewe sounemenem me meilapen sounfiu, ekewe chon pisekisek me ekewe mi wor maner, pwal ekewe aramas meinisin, ekewe amanau me ekewe mi ngas ra aopeer lon ekewe föüimw pwal fän säpereperen ekewe achau won ekewe chuk. ✡ Ais 2.19,21 16 Ra kökkö ngeni ekewe chuk me ekewe achau, “Oupwe turutiu wom o aopakem seni mesen ewe eman mi mot won ewe lenien motun king, pwal seni än ewe Lam song. ✡ Os 10.8; Luk 23.30 17 Pun ewe rän mi lap a war, ewe ränin ar song, nge iö epwe tongeni ü ngeni?” ✡ Sow 2.11; Mal 3.2