1 Mürin ewe alimanün chon läng a ettiki nöün rappwa. Iwe, üa küna eföü fü a turutiu won fanüfan o a angei kien ewe pwang mi alolol lon fanüfan. 2 Lupwen ewe fü a suki ewe pwang mi alolol, ötüöt a ötütä seni lon, usun ötüötün eu um mi watte. Akkar me enienin asepwäl ra rochola ren ewe ötüöt seni lon ewe pwang mi alolol. ✡ Ken 19.28 3 Mürin lifichimas ra towu seni lon ewe ötüöt o sotiu won fanüfan. Iwe, ra angei ewe chök sokun manaman inenmönükam ra eäni. ✡ Eks 10.12-15 4 Iwe, Kot a allük ngeniir pwe resap afeiengaua ekewe fetil ika ekewe petewöl ika ekewe irä, nge repwe chök afeiengaua ekewe aramas resap eäni än Kot we pwau won chamwer. ✡ Is 9.4 5 Esap mwüt ngeni ekei lifichimas pwe repwe niela ekewe aramas, nge repwe chök ariaföüür lon ükükün limu maram. Weiresin ar riaföü a wewe ngeni weiresin riaföün eman ren küüwen eman inenmönükam. 6 Lon fansoun ekei limu maram aramas repwe äneänei ar repwe mäla, nge resap tongeni mäla. Repwe mochen mäla, nge mäla epwe sü seniir. ✡ Hiop 3.21; Jer 8.3

7 Iwe, lapalapen ekewe lifichimas ra wewe ngeni oris mi molotä ngeni maun. Won mökürer a wor och mi usun chök mwärämwär seni kolt, nge won meser ra wewe ngeni won mesen aramas. ✡ Sow 2.4 8 Meten mökürer ra usun chök meten möküren fefin, nge ngiir ra wewe ngeni ngiin laion. ✡ Sow 1.6 9 Leupwer a pwölüla ren och cheech mi usun chök chechen leupw seni mächä, nge üngüngün pöükässiir ra wewe ngeni üngüngün chomong wokenin maun, oris ra nuki lupwen ra sälong lon maun. ✡ Sow 2.5 10 A wor wüküür me fölüür usun chök ekewe inenmönükam, o ren wüküür a wor manaman lon, pwe repwe tongeni afeiengaua aramas lon ükükün limu maram. 11 Iwe, a wor eman nöür king mi nemeniir, i ewe chon läng mi nemeni ewe leni mi alolol. Itan lon kapasen Ipru Apaton, nge itan lon kapasen Krik Apolion (wewen “Ewe chon Kata”).

12 A wes ewe aeuin feiengau, nengeni, a chüen wor ruu feiengau repwe war.

13 Mürin ewe awonomanün chon läng a ettiki nöün rappwa. Iwe, üa rongorong eu möngüngü a feito seni ekewe rüanü pwokukun ewe rongen asor seni kolt mi nom mwen mesen Kot. ✡ Eks 30.1-3 14 Ewe möngüngü a apasa ngeni ewe awonomanün chon läng mi wor an rappwa, “Kopwe apichala ekewe föman chon läng mi fötek arun ewe chanpupu mi watte Oifrat.” 15 Iei usun ekewe föman chon läng ra pichila, pun ra fen molotä fän iten ei chök awa, ei chök rän, ei chök maram pwal ei chök ier, pwe repwe niela eu leülüngatin chon fanüfan meinisin. 16 Üa rongorong pwe iteiten ekewe sounfiu mi wawa oris ükükün ruupükü million. 17 Iwe, lon künaei we üa küna ekewe oris me ekewe chon wawa, a iei usur: a wor chechen leupwer mi parapar usun ekkei, a arauarau usun ewe fau aüchea itan safaia, a pwal oleol usun primston, nge mökürer ra wewe ngeni möküren laion. Iwe, seni lon awer a towu ekkei, ötüöt me primston. 18 Iwe, eu leülüngatin chon fanüfan ra mäla ren ekei ülüngat feiengau: ewe ekkei, ewe ötüöt me ewe primston mi towu seni awen ekewe oris. 19 Iwe, manamanen ekewe oris a nom lon awer pwal lon wüküür kewe, pun wüküür kewe ra wewe ngeni serepenit mi wor mökürer ra aea le afeiengaua aramas.

20 Iwe, ekewe lusun aramas resap mäla ren ekei feiengau resap aier seni mine ra föri ren pöür. Resap ükütiu le fel ngeni ekewe anün rochopwak me ekewe uluulun anümwäl mi för seni kolt, silifer, piras, fau me mwüch, ir ekewe uluulun anümwäl resap tongeni küna ika rongorong ika fetal. ✡ Kölf 115.4-7; 135.15-17; Tan 5.23 21 Resap pwal aier seni ar niela aramas, ar föri angangen rong me föri föförün lisowu ika ar solä.