1 Tsan josanan, nula weyanla itsantiminla joe: Tsanque seiton quinaminlaca duque casticaquintsan joe timinla joe. Yalaca duque culpa quichi timinla joe. Tsantitulajona! Uyanlaca culpa quinatonan, nulanan jun tsanquenan jutsa quiminla joe. Uyanlaca culpa quinato, tencachiquenan culpa ilainae. Nula culpa polarino podeilaitue. 2 Diosi mantimini jutsa quiminlaca culpa quinato, tuca miitobi culpa quimin joe. 3 Junni Diosi tuca miitobi culpa quimin jonari, nulanan culpa ilaichunae. Nulanan seiton jotonan, uyanlaca culpa quiminla joe. Tsanquinun tenchi Diosiri duque sen joto nulacanan culpa quichunae.

4 Uyanlaca culpa quinatonan, jutsa quiminla joe. Tsan josanan, Diosi duque sen joto, nulaca castica caquitue. Pa jotonan wantainae. Junni epenan wantaitue. Nula jutsa quinunca telaquepoto, casan tala tenca mancasa tinae. Jun tenchi nulaca casticaquituto wantainae. Nula mantimini Diosi wantainaminca yape tito tennatuminla joe. 5 Junni Diosica tennatuto, casan tenca mancatutori, junto fécari duque culpa ide ide jinilaichunae to yucapiyarino ma fecári. Diosi jun mate tsachilaca tuca miichunae. Junto jun mate nantari wantaituto, nulaca duque paito casticaquichunae.

6 Diosi jeralela ti quica jonunca mirato, yalaca niyaque quintsan jonunca miito quichunae. 7 Weyanla peleituto senla joe. Yala duque tenfeminla joe Diosichi cale sen jochun. Diosi yalaca tsaracari sen suwanan, sen jolajoe tin, tisa tenfeminla joe. Diosi yalaca numatotiya sonnasa carisa tenfeminla joe. Junni Diosi yalacari numatotiya sonnato polesa carichunae. 8 Weyanla mantimini pa muquintsanla joe. Diosichi tsarasi sen fiquica merátuto, seiton fiquica meráminla joe. Yalacari Diosi duque paichunae. 9 Jerale seiton quiminlaca casticaquichunae casale israelítalaca, jun benete uyanlaca. 10 Sen quiminlacari tsaracari sen suwato, yalaca sen jolajoe tichunae. Yalaca pansi chularasa carichunae. Casale israelítalaca, jun benete uyanlacanan tsanquichunae.

11 Israelítala, israelita itonla, titiya Diosibe jun tsannan jolajoe. 12 Matu tote Moisés Diosichi mantaca chutenue. Junni israelítalari jun mantaca miraminlae jonan, Diosi yalaca jun mantate miichunae culpa talaranunca o itolajonunca. Uyanla jun mantaca miratunan, Diosi jun mantaca tennatuto yalaca miito casticaquichunae. 13 Israelítala Diosichi mantaca miratonan, titiya quino cajolajoe. Jun mantaca miratonan meralaquitunari, Diosi yalaca sen jolajoe tituchunae. Jun mantaca meráminlacari Diosi sen jolajoe tichunae. 14 Israelita itonla Diosichi mantá chutecaca miitolajoe. Tsan josanan, weyanlari tenca mántanan Diosichi mantate nenamin jolajoe. Junni mantá chutecaca miitotonan, yalachi tencabi Diosi niyaque nenasa munaranunca miralarae. 15 Yalari ti quilaquinanunca quirato tenhintsan joe yalachi tencabi miraminla jonunca. Diosichi mantá chutecaca miratutonan, yalachi tencabi miralarae Diosi tica munaranunca. Junto seque nenatori, seque nenalarayoeque tenhilaichunae. O seitonque nenatori, seitonque nenalarayoeque tenhilaichunae.

16 Junni miino mate Jesucristo tsachilaca miichunae sen jolajonunca o seiton jolajonunca. Diosichi mantate yalaca miichunae. Tsachila nosa seiton quicaca jun mate jera miintsan jochunae. La micarinanun sen fiquibe tsachilaca miichinae.

17 Israelítala tala pachinayoe. Israelítala Diosichi mantá chuteca jonunca talarayoe. ¿Diosi israelítalaca wenteca joco? yape yachi tsachila jolajosa. Junni Diosi wenteca jonun tenchi nula itsanlatichunae: Israelítala joto, fe sen jolajoyoe tilatichunae. 18 Nula miralarayoe tilatichunae Diosi tsachilaca niyaque nenasa tinanunca. Yachi mantá chuteca jonunca mirato, ti sen jonunca, ti seiton jonunca jera mirato, sencari quintsan joe timinla jochunae. 19-20 Weyan tsachila tenca iton joto, quirano podeitonla cuwenta epele nenaminla jochunae. Junni nulari yalaca mantucarino podeilaiyoe tilatichunae. Weyanlanan miitoto, yalachi tencabi nemen cuwenta jolajochunae. Junni nulari yalachi tenca tenchi tseno cuwenta jolajoyoe latichunae. Diosi yachi mantá chutesa carito, ¿tica jera mirano jonuncatiya jun pilabi chutesa carinuco? Junni jun pilaca tato, jeralelaca seque micarino podeiyoe tilatichunae.

21 Junni nulari uyanlaca jun pilaca micarinato, nula tencachiquenan jun pilabe miinola joe. Uyanlaca tarinlaquitusa micarinatonan, nulanan tsanminla joe. 22 Uyanlaca leyan sona talaratusa micarinatonan, nulari leyan sona talarae. Epe diosi joe tinun moldeca seiton joe titonan, jun moldechi cuwanacaca tarinminla joe. 23 Diosichi mantá chuteca junca mirato fe sen joyoe tinatonan, jun mantaca merátuminla joe. Tsanque nenato, nulari Diosica lucariminla joe. 24 Diosi yachi pilabi junca chutesa carinue. Itsantica joe: Israelita itonlari nula seiton quinaminlaca quirato, junto yala Diosichi tsachilaca seitonla joe tito, Diosicanan seiton patariminla joeque chuteca joe. Nulachi tenchi Diosica seiton patariminla joe. Nula tsanque Diosica lucariminla joe.

25 Chiquila israelítalari quidoca poraicala joyoe. Israelítalachi mite quidoca poraica joto Diosichi tsachila jolajoyoe timinla joyoe. Junni meralaquede! Quidoca poraica joto, Diosichi mantá chuteca jonunca merátori, Diosichi tsachila jolajochunae. Tsan jotonan, jun mantaca jera merátutori, yachi tsachila itolajochunae quidoca poraica jototiya. 26 Quidoca poraituca junlari jun tsannan jolajochunae. Diosichi mantate nenatori, Diosichi tsachila jolajochunae quidoca poraicala cuwenta. 27 Nula Diosichi mantá chuteca junca tatonan, quidoca poraicala jotonan, jun mantaca merátuminlae. Uyanla quidoca poraitucala jotonan, Diosichi mantaca meráto nenaminlae. Junni yalari nulaca quirato, seitonla joe tilatichunae.

28-29 Diosichi tsachila iyoe tito, jamoleri tsantuntsan joe. Tencabi Diosichi tsachila jonola joyoe. Matu mate Diosi israelítalaca mantanue quidoca porailaisa. Junto yalachi tsachi pucabi uyan quiran suwachun tsanque mantatue. Te, casan tenca joyoeque tenhichun quidoca porainola jominue. Tsachi pucari canbiyaino itominue; tenca canbiyaino jominue. Tsanhiminlaca Diosi sen joe tichunae tsachilari yalaca seitonla joe tinasatiya.