1 Dwasianu bidama gana, nosali te Filistia dabe augwa ami bidi dabe sisinama, te Israel dabeba hwįgi painu yai. Tama Akisgo Devitba te tama po wali, “Te nago koneani, te nage dali te naga hani bidi dabe te ena dali pelama, te Israel dabe dali hwįgi painu homu ebo, agawe?”

2 Tama Devitgo agabolo te po wali, “Eno koneanio. Ena nago sę bidi da, tama nosali nago eno wiegi yai sę ebo sueibao.”

Tama Akisgo te po wali, “Wiegi yai mu dao. Te eno nago nogi ugwaba siyu, nagebolo te ena sesemane sogo tonaluabo sę mawaibao,” wali.

3 Polobadu te Samuel isibaso, tama tigidali Israel te agade gela olama, tama augwaligo aga te Ramade pubulali, te aga taunde digi. Tama te sogo Solgo te tigidali bidi me we te isali bidi dabe noma bidi dali po mibo we bidi augwali ela gudulali. Tama agai te bidi dabe te Israelde bidimainu me ebeo. * Prs 20:27; Bom 18:10-11; 1 Sml 25:1

4 Te Filistia dabego te Israel dabe dali hwįainu yai. Tialima, te Filistia ami dabe te not pedai badu pelama, tama te augwa osogo bidabo pesage te Sunem taun pąde nigai. Tama Solgo te Israel ami bidi dabe sisinama, tama augwali pelama, te augwa bidabo pesage te bulu du Gilboade nigilama bidali. 5 Te Solgo te Filistia ami bidi dabe suali sogo, te aga wi dwai mu yai. 6 Tama tiyu, agai te Genuai Bidiba te tama po hanalu wali, “Te eno mena tama sę yagawe?” Tiali goli, Genuai Bidigo te nade agabolo te po wei ponisiąyu, ma te Godigo homu konea pabo masigi me, ma te profet dabego pedauwalide me, te po wei me ponisiąwai. Genuai Bidigo te po me deli te wei me ponobeo. Mu menio. * Nam 27:21 7 Tialima, Solgo te aga ofisa dabebolo te tama po wali, “Dage pelama, te isai bidi noma dali po mibo we me deli gegegi pelama, tama te eno aga dali po migi paibao.” Tama augwaligo agabolo te po wai, “Te me deli te taun Endorde bidibao,” wai.

8 Tialima, Solgo te kingo mubo ugwa muani te hasegelama, tama gasagi yai tobage ugwa bulali, te bidi dabego aga te king da weyu koneidali weyu te tama tiali. Tama agai te aga ofisa bidi si selama, tama hulide augwali pelama, te we sugi pali. Augwali sabolama da, tialima Solgo te tiwai po te webolo wali, “Eno homugo nago te isai bidi noma bidi dali po mimainu homu ebao, tama te mena sę pedelabo po te enabolo omainu yaibao. Eno homugo te bidi nogi elama, tama nago aga noma bidi i obaso, te hania hanilagasomainu yaibao,” wali.

9 Tialima, te wego te po wali, “Nago te king Solgo yali sę koneani. Agai te isali bidi noma bidi dali po mibo we bidi tigidali sela sąyu, ela gudulali. Magi baso nago ena usu sagasu, tama te Solgo ena ela mumainu yabo sunumi te hanilagasobawe?” wali.

10 Tama Solgo agaba te tiwai bomai po me deli dąų waliyu, te tiwai po wali, “Te Genuai Bidigo nogide eno te mu po nageba dąų walu obao, nago te sę ebaso da, teda augwaligo nageba te dwai dene me iligobeo,” wali.

11 Tama te wego Solba hanalu wali, “Tialima, nago homugo eno de i omainuwe?” Tama Solgo te po wali, “Nago te Samuel i wao.” 12 Tialima, te wego te Samuelba i wali, tama agai te Samuel pedalubo sogo sulama, aga te i dwai mu weyu, tama te Solbolo te tama po wali, “Magi baso nago ena usu sobawe? Naga digi nage te king Sol dao!” Te wego te po wai.

13 Tama kingo te po wali, “Tagalao, nage wi me elamuo. Nago magi nai sualiwe?”

Tialima, te wego te po wali, “Eno te bidi noma me deli te tǫ daidu asobo sualio.”

14 Tama Solgo agabolo hanalu wali, “Te noma bidi te magi nai dawe?” Tama te wego te po wali, “Te monu dabe tiwai te bobage ugwa gudama, tama asalio.” Tialima, Solgo koneani, te Samuel tama da homu elama, tama Sol te kidu sugunama, tama aga tobolu te tǫba basi gulama, te Samuelba genuai nogi mayu tama tialio.

15 Tama Samuelgo Solba te tiwai po wali, “Magi baso nago ena hodolama, tama ena ma asomainu i obawe?”

Tama Solgo te tama po Samuelba wei ponani, “Eno sęgę genuai mu elalubao. Magi baso meni, te Filistia dabego enaba hwįagasobo side, tama Godigo ena tagalalio. Te agai enaba te profet dabego pedauwalide me, ma te nade me, te po ena dali me wabeo. Te eno mena sę elama te eno homugo konemainu ebao. Tama tiyu, te nago enabolo omainu te eno nage i wali,” Solgo te po wali.

16 Tialima, Samuelgo agabolo te po wali, “Odao. Genuai Bidigo nage tudiba muyu, tama nago boi bidi pedelalio. Tama tialima, magi baso nago ena i waliwe? Eno nage tau me sogobeo. 17 Genuai Bidigo nageba te sę yali, te nagede po agai eno pedauwalide polobadu wali. Agai nage te king sęde sela sąyu, tama nago te Israel munu ma tonalugio po wai. Tama agai te sę te nago abagi Devitba mawai dao. * 1 Sml 15:28 18 Nago te Genuai Bidigo po sela sąwani. Polobadu Genuai Bidigo te Amalek dabe dali haliga sębę ebaso, tama nagebolo weyu, te Amalek tigidali dolao po walali, tiali goli nago agai po wali pabeo. Tama megi Genuai Bidigo te sę nageba ebao. * 1 Sml 15:3-9 19 Tama te sę naga nageba me egobeo. Menio. Aga te nage dali, te gasa Israel dabe dali, te Filistia dabego nogoba mawaibao. Do da, te nage dali, te naga ogwa dabe dali, te isama, tama ena dali te isali bidi dabe bidibo pesageba bidagasaibao. Tama Genuai Bidigo te Filistia ami dabego te dage Israel aiyaba elalumainu elama, tama dage aiyaba mu elalueibao,” Samuelgo te po wai.

20 Solgo te po odama, tama aga wi dwai mu elama, tama polo tama mu aga te tǫba degasa dulama, tama pila muani. Tama aga bomo kimi meni yani, magi baso meni, aga te sogode nai me tusiąwai.

21 Tialima, te we te Solba pelama, tama aga te wi dwai mu ebo suali. Tama te wego Solba te tiwai po wali, “Genuai bidi, odao. Eno nago po wali pali. Ena te augwaligo ela muaiba homu me ebeo. Menio. Eno nago po odama, te sę yalio. 22 Tama tialima, megi eno homugo te nago eno po odama, te sę me deli emainu obao. Eno te nai meba nage menama, tama eno homugo te nago tumainu homu ebao. Nago te nai tulama da, te nago bomo sabo si da, tama nage ma pobaso te usu dao,” wali.

23 Tiali goli, Solgo te po wali, “Woo, menio. Ena nai tubo hagela ebuo,” wai. Tialima, aga te ofisa bidi si badi te wego me, augwa bomo eyu, Solgo te nai tuao wali. Tama agai augwaligo po odama, tama hogodama, te pibo bet saiba duagulali. 24 Tama polo tama te wego te aga ogwa bidi nisai bulmakau elama, tama te bulmakau mi ulai. Tama aga te plaua meba selama, tama te yis meni yai bret meba polo nigilama, tama ulali. 25 Te nai sisi ela silama da, teda te wego te nai te Solba me, te aga ofisa dabe daliba, sela asama tama augwali tuali. Augwa tula silibo si da, teda te sogo hulide naga augwa te we taga soyu, tama soalio.