1 Te dageba nosali asali bidi dabe augwaligo augwa digi augwa nogi ugwaba siyu, tama homu kolesaga meni yani po wali goli, dagego augwali tede tagalao wabeo. Tama tibaso, eno homugo dagego ena me gogolama, tama eno te homu kolesaga meni yai po dwasianu waio. Awe, dagego ena gogolao. 2 Te gasa bidi dabe augwaligo te dagego Krais wali pabo kolesaga dolidali weyu, eno augwalide dwai homu ebo dao, te Godigo augwalide dwai homu ebo tiwai gilama. Magi baso meni. Bidigo aga penani sę munu me isąwai wiegi yai bidibo gesi wegi noma te bidi delibolo naga mabo tiwai, te eno dage te bidi deligo naga somainogo eyu sa muanio. Eno dage Kraisbolo maiabo homu ebo dao. 3 Tiali goli ena wi ebao. Dago koneani, te dwai hasamani tiwai bidibo bidi Satan agai tibo po wabo mu koneani homu elama, tama polobadu agai te we Iv dago auwa tibo po ola menama tama aga tulaluali. Te dagego tiwai me dage, te dageba tamadi asali bagego po odolama, te tiwai kolesaga dageba pedalobuo. Tiyu, dagego homu mu eyu Krais dali naga wadolama tama wali pabo wiegi yai kolesaga tagalidali homu eno ebao. Ena tede wi ebo dao. * Gag 3:1-5, 13 4 Magi baso meni. Te bidi meba augwali dage pageba pedalama, tama Jisasde gasagi yai po pusubao, augwaligo wabo po te dago te Jisade pusubo po tiwai me wabo meni, te gasagi yai tedali dao. Tama te kolesagade dagego te gasagi yai mobo sabo, te dagego polobadu sali te Tedali Mobo Bidi tiwai meni. Tama dagego gasagi yai po augwalidu odobao, te dagego dade sali te wiegi yai gesi po tiwai meni, te gasagi yai tedali dao. Te bidi me deligo te tobage kolesaga dage tomode me ebaso da, teda dagego dwagi yai homu eyu, agai te tobage kolesaga emainogo gogolobo dao. Tiali goli te dolo menio. 5 Te bage augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo te homu ebo dao. Odao. Eno homu augwaligo ena te dwasianu sę me delide aiyaba elalubo menio. 6 Mu tama, eno te Grik dabego po bugagia pusubo kolesaga te me konesiąwani, tiali goli te magigo menio, eno te Kraisde homu kolesaga me sǫą pabeo. Mu menio. Tigidali sę ebode dago dagebolo hania ola mawai dao, dago Kraisde kuna mu konebo dao.

7 Dagego koneani, eno te Godigo wiegi yai gesi po dagebolo ola mani sogo, tede eno masigi me sabeo. Te kolesagade ena digi ena aiyaba elaluama te dage ugwaba siyu yai. Magi yaliwe? Dagego homu eno te yali kolesagade te ena sęgę sali, agawe? 8 Eno masigi dabe te gasa bulude bidibo Godigo po odobo we bidi mebade sali, te ena dagede sę emainogo eyu augwaligo ena tama tau sai. Te kolesagade te eno augwaligo nai anoma elama olo sabo tiwai yai dao. 9 Ena dage dali polobadu bidali sogo ena nai me sǫą pali, te sogo eno dagede bidi me deli dali aga nai anoma eyu sęgę me mabeo. Menio. Te ama dede dabe augwaligo te Masedonia tǫ tagalama tama Korin hanuba pedaliyu, augwaligo ena sǫą pali nai usu nani. Tama tigidali nai eno bugagia tonaluama, tama dagego duga masigigo ena tau sabode eno dwasianu sęgę dagebolo me mabeo. Tama sesemane sogo eno te tiwai bugagia tonaluaibao. * Fil 4:15-18 10 Te Kraisgo mu po enade elalubao. Tama tibaso, eno tibo po wasiąbo, e mu po naga obao, te tigidali Akaia moni tǫ badu te bidi me deligo te eno dagede masigi sisąbo kolesagade ena nogi ugwaba sabo te bidi mego tų palibo usu me egobeo. 11 Magi baso eno tama obawe? Eno te dagego masigi sisąbo kolesaga ebogo te eno dage dali dwagi yai homu isąyu godolo mu isąyu bidibo te waselebo dawe? Menio. Eno dage dali dwagi yai homu eyu godolo ebo kolesaga ebo, te Godigo koneai dao.

12 Meba bidi augwaligo homugo eno me te eno ebo sęde dagede masigi sao, augwaligo te masigi dagede sabo tiwai yao, augwaligo te homu ebao. Magi baso meni, augwaligo homugo eno te tiwai eyu da, teda augwali da tiwai si bidibaso, augwa digi augwa nogi ugwaba sabo tų elaluaibao. Tiali goli menio, eno te dagego masigi sisąyu te tų palibo sę augwaliba ebao. Tama eno tiwai sę naga me iduaibao. 13 Magi baso meni. Te tobage sę ebo bidi dabe augwali te Godigo po sela pabo bidi dabe mu menio, augwali te tibo po wabo sę ebo bidi dabe naga bidibao. Augwaligo augwa kolesaga hasegelama, tama tigigo naga augwali te Kraisgo po sela pabo bidi dabe tiwai bidibao, we bidigo gedude. 14 Tama dage tede moni midigi me selamuo. Dago koneani, Satango digi aga tigi hasegelama, tama tigigo naga aga te dwai sę isąwai wiegi yai ensel mobo bidi tiwai pedalobo dao. 15 Tama tibaso, aga sę ebo bidi dabe augwaligo me te augwa kolesaga tibo hasegelama, tama te bidi dabe augwali gedude te augwali doloba pai kolesagade sę ebo bidi dabe tiwai pedalobaso da, teda da tede moni midigi me selamuo. Nosali augwali te augwa sę yali usu nama tiwai dwai dene mu saibao.

16 Hasia eno po wali, tama megi eno po ma obao, bidi mego ena te konesiąwai bidi da te homu munu me elamuo. Tiali goli, dagego homu ena te homu kolesaga meni yai bidi da homu ebaso da, teda dagego ena gogoliąo, tama ena me ena nogi ugwaba dwasianu sainogo yaibao, te homu kolesaga meni yai bidi tiwai. 17 Eno dago Genuai Bidigo homu kolesaga wali pelama, eno e po me wabeo. Menio. Eno po te konesiąwai bidigo po wabo tiwai eyu, tama ena nogi ugwaba sabo bomo ena digi ebo dao. 18 Bidi hauwa augwaligo te tǫde kolesaga wali pelama, tama augwa nogi augwa digi ugwaba sabo dao. Tama eno me te kolesaga osogo wali pelama, tama ena digi ena nogi ugwaba sabo po dwasianu obao. 19 Dagego te eno te tobage kolesaga ebo sę ilali. Magi baso meni. Dagego wiegi yai koneani kolesaga elalubao, tama dagego te konesiąwai bidi gogola sula tagalabo homu godolo elama, te konesiąwai bidigo po dagebolo momainogo yali! 20 Awe, te bidigo dage te aga dologoba mubaso, ma agai dagego nai tigidali silibaso, ma agai dage dali hagoma ebaso, ma agai dage gesabidide elibaso da, teda agai tama temainogo te dagego gogolobo dao, po meni! 21 Mu tama, augwaligo te tebo kolesagade dago te sę yabo bomo me elalubeo! Tama eno te kolesaga igi sogo da, teda eno sęgę siyu tama hale egi da.

Megi eno po te aga digi nogi ugwaba sabo po wabo kolesaga meni yai bidigo po tiwai obao, te bidi mebago augwa ebo kolesaga po te bomo elama pusubaso da, teda eno me eno bomo elama tama augwali aiyaba elaluabo po pusaibao. 22 Augwali te Hibru dabe da wida, teda ena me te Hibru bidi dao. Augwali te Israel hani bidi dabe da, agawe? Teda, ena me ena te Israel hani bidi da. Augwali te Abrahamgo bulai wai hani da, agawe? Teda, ena me ena te Abrahamgo bulai wai hani bidi mu dao. 23 Augwali te Kraisgo sę ebo bidi dabe da wida, agawe? Megi eno po te aga digi nogi ugwaba sabo kolesaga meni yai polobo bidigo po tiwai mu obao. Eno augwali te Kraisgo sęde aiyaba mu elaluali. Te sę dene idu gealigo eno edelama ugwanu igulali. Te eno Kraisde po pusubaso, te boi bidi dabego ena kalabus beba hauwa sogo muani. Tede eno te tibo po ola mabo bidi dabe ela holai dao. Te boi bidi dabe augwaligo ena hauwa sogo mu elali, bidigo nedebo usu egobeo, tede eno e bage augwali aiyaba mu elaluali. Hauwa sogo ena pąde isabo tiwai yai. * Tpi 16:23 24 E tiwai yai. Te a naga sogo Juda dabe augwaligo ena te dwai kibu waligo nigai bigo elali, te nedali te bidi sese deli olama, nogo si olama, nogo me badu a naga me si me si, te 39 tama sogo dąį egi pai. A naga sogo te tiwai ena elali. * Bom 25:3 25 Te sela sogo te Rom dabego ena keloago elali. Deli sogo te Juda dabe augwaligo ena ela mumainogo eyu masigi sąnama ena elali. Sela sogo moni geba sip dabe doloyu, ena te tamu ąįde hagawai. Tama tiyu, sip me deli tama dolali sogo te deli sogo hulide me giligade ena te tamu ąį daide bidali. * Tpi 14:19; 16:22 26 Te hauwa sogo ena digibulu tųdu bilali. Ena te pabo ąį hauwade hagawainogo yali. Ena te tųdu bilibo bidi elebo aga nai wi sabo dwai bidi dabe augwaligo nogode dolainogo yali. Te eno hani bage, te Juda hani dabe augwaligo me ena dolainogo homu yali, tama Juda hani isąwai bidi dabe augwaligo me ena dolainogo homu yai. Ena te haniani hanude dolainogo yali, tama te bidi meni yai bulude me ena dolainogo yai. Ena te tamu ąįde dolainogo yai. Ena te tibo po wabo abagi dede dabe augwaligo nogode me elainogo yai dao. * Tpi 9:23; 14:5 27 Eno sę dene haniani mu yalio. Hauwa sogo ena hulide sę eyu, tama ena godege me pibe. Ena nai sili bidali, tama ena ąį nogonego sali. Hauwa sogo eno nai gisilali. Ena kedaugo me siyu, tama ena ugwa me meni yai bidai dao. 28 Tama te naga me ebeo. Menio. Te tigidali deli deli sogo eno te haniani bulude bidibo Godigo po odobo we bidi tigidali tonalubo sę eyu, tama tede genuai sęgę mu enabolo mubo dao. 29 Te bidi me deli bomo meni ebawe? Teda, ena me te bomo meni yai tiwai bidaibao. Te bidi me deli te dwai sęba tulaluai dawe? Teda, eno te aga te dwai sę tomoba kegali bidi dali dwai homu mu yaibao. Awe, tigidali haniani sę ebode eno te dagebolo tibo po ola mabo bage augwali eno aiyaba elalubo dao.

30 Te gasa tų me meniama, tama ena nogi ena digi ugwaba sobaso da, teda eno te ena bomo meni da po olama, tama tede ena homu pemene yaibao. 31 God, te God tama dago Genuai Bidi Jisasgo Aya, dago sesemane sogo aga nogi ugwaba siyu tama bidada peyu bidada pomainao. Agai koneani, eno tibo po te enaba pedalali sęde me wagobeo. 32 Te polobadu eno Godigo sę edubadi, me sogo ena te Damaskus moni hanude bidibadi, te tobolu bidi me deli aga te tuni bidi Aretas dologode bidali. Tama te tobolu bidi agai te Damaskus hanu buluba pabo tųde tonalubo bidi muani. Agai ena selama kalabus ilainogo yali. 33 Tiali goli meba ama dede augwaligo ena moni basket wade munama, tama te hanu genuai masigigo nigai bobage obo te windodu augwaligo ena buluba aba bonogo tagalama, tama ena buluba dilama teda soali. Tama ena te tobolu bidi nogode muani tagalama, tama ena sana pelama wi pai dao. Te sogo te sęde ena bomo meni yai bidi mu bidali. Tialima Godigo ena tau sali. * Tpi 9:23-25