1 Tama Mosesgo po geninama weyu, te po wali, “Nosali dage Genuai Bidi dago God agai mawainogo ebo te tǫba sabolama, bidiyu da, 2 teda dagego te bulude hasia inabo gide nai dabe sabo sogo, dage deli deligo te Genuai Bidibolo magasao. Tama te basket wade bulama, tama Godigo sa munama elaluabo te pesageba selasa pao. * Sai 23:19 3 Dagego te ofa ebo tonalubo pris bidi bidibo pesageba te pris bidi te sogo bidibo bidi pageba sela pao, tama agabolo te po wao, ‘Megi da, eno mu koneani, Genuai Bidi nago God agai te dąų wali te po mu tama te pedelali dao, tama agai dago wąįbolo da mawaibao wali te tǫba da agai odasa asai dao,’ te po wao.”

4 “Tialima, te pris bidigo te basket wa nai dagego nogode selama, tama agai Genuai Bidi dago God agai alta pąba mugi paibao. 5 Tialima, Godigo gesabidide dagego e tama po wao, ‘Eno wąį da, te aga te Aram bidi dao, tama aga page bulu mu tagalama, subigila bilai dao. Tama nosali aga we wai puluba selama, augwali Isip buluba bidigi pai dao. Augwali te Isip buluba pali sogo, augwali te dwasianu hani naga dao. Tiali goli, augwali genuai hani mu pedelama, tama augwali boma pai hani mu pedelalio. 6 Te Isip dabego da selama, tama da dali dwai sę elama, dene menama, tama da te olo sę ebo bidi tiwai nigimainogo ilali. 7 Tama tibaso, dago te Genuai Bidi, dago wąį dabego God, dago aga i wali, te da tau somainogo. Agai dago gela wali odali, tama me agai suali, dago tigide dene ebo, me bomai sę dabe, me dwai sogo dade posobo me agai suali. 8 Tama tialima, Godigo genuai bomai sę mu yali, da te Isip bulude ma dobola sainogo. Godigo gasagi yai boma pai sę dabe elama, tama haniani dwai sę augwalide pedalomainogo ilali. 9 Tama agai da odasa aselama, tama agai da e wiegi yai ili yai tǫ da mani. 10 Tama tialima, Genuai Bidi, eno te nago enabolo mani te tǫde hasia inawani nai megi nage e sesali dao,’ te po dagego wao.”

“Dagego po ola silama da, dagego te nai basket wa te Godigo gesabidiba pąba muagasao. Tama te pesagede lotu po wao. 11 Tama dagego Genuai Bidi dago Godiba wiegi yai homu pemene iyąo, te aga wiegi yai sę dagebolo me duga haniba yali pode. Tama te Livai hani, me te gasa bulu hani bidi dage tomode bidibo me, dage dali wiegi yai homu pemene emainogo yao, te dage dali deliba sisinama.” * Bom 14:28-29

12 “Te tigidali kibu be sela wabode, dagego duga gide nai sesao, tama nogo si tama 10 bugulama wialao. Tama dagego te nai pesage me deli te Livai hani dabebolo mao. Me te gasa bulu bidi hani dage dali bidibo, te hani sibolo te nai mao, me te tiana wai pulubabolo, me te wilawe we dabe, te bagebolo te bugulali nai pesage me deli dobola mao. Tialima, dagego tama tiyu da, teda te we bidi nai usu elama mu bidaluaibao. Dagego te sę dabe elama, silibo sogo da, 13 teda dagego Genuai Bidi dago Godiba te tama po walao, ‘Tigidali nai eno nagebolo momainu yali, te nai dabe sese eno nagebolo mani dao. Te eno polo dobola silama, tama eno bede me munalubeo. Eno te nai dabe te Livai dabebolo mayu, te we bidi gasa hani bulu we bidibolo mayu, me te tiana wai puluba mayu, me te wilawe we dabebolo mayu, ela silai dao. Eno nago po tigidali sese wali pela silalio. Eno nago po sela sąyu o gegeda peyu me ebeo. Mu menio. 14 Eno bidi isali sogo gela wali sogo eno nago nai dali me tuai menio. Te ena nago gedude meda yai bidali sogo, eno te nai dabe eno be buluba pali me eno me selama, tuai menio. Tama eno meba selama, te isai bidiba ofa me yai menio. Genuai Bidi, eno God, eno nago naga te nai dabego nago enabolo yao wali, te sę dabe dolo tama yai dao. 15 Nage naga wiegi yai bulu dagalude bidiyu, tama eno homugo nago da Israel dabeba eba tonama, dabolo wiegi yai sę yao. Tama te tǫ wiegi yai ili hauwa yai, te tǫ nago dabolo mani tǫ wiegi yai ilao. Te naga digi dago wąį dabebolo mawaibao wali gilama tama,’ te tama po wao,” Mosesgo te we bidibolo te po wai.

16 Tama Mosesgo po geninama weyu, te po wali, “Megi da, Genuai Bidi dago God agai te po wali, dagego agai tigidali bomai po wali pao po walio. Tama tialima dage godolo mu elama, tama homu dąų olama, mu te bomai po wali pabo homu yao. 17 Megi da, dagego haninama te po wali dao, Genuai Bidi da, te dagego God dao, te po wali dao. Tama dagego agai tigidali po dabe me agai tigidali bomai po wali paibao po duga polo dąų wali dao. Tama me, agai tigidali ya wali sę dabe po me yaibao wali. 18 Tama megi da, Genuai Bidigo dage aga we bidi mu tiwai te sali dao, te aga digi dagebolo wali gilama. Dage da, te agai dila pai wiegi yai nai mu tiwai dao. Tama agai dagebolo agai tigidali bomai po wali piąo po te wali dao. * Sai 19:5; Bom 4:20; 7:6; 14:2; Tai 2:14; 1 Pi 2:9 19 Agai dage hani bidi geninama mu pedelemainogo yaibao, te tigidali agai e tǫde nigali we bidi hani edelama, mu elaluaibao. Tama augwaligo dagego wiegi yai kolesaga sulama, tama augwali Godiba genuai nogi mu mawaibao. Tama dage God aga we bidi hani mu bidaiba, te aga te po hasia polo dąų wali gilama,” Mosesgo te po wali.