Hibru Dabeba Tolali Pas
Hasia nedebo tau sabo po
Te e pas nogi Hibru, te nogi page e dao: te pas bidi me deligo asęani te Godigo po wali pabo hani me deli augwa konealubo homu tagalainu ebaso, te haniba asęai pas dao. Magi baso meni, te bidi hani mebago augwali aiyaba elaluama, te augwaliba sęgę mani. Te Hibru po wabo Juda hani we bidi dabe, augwalibolo bidi me deligo e pas asęna tolali. Dego e pas asęaniwe, te dago konebeo, agai aga nogi e pas tomode asębeo. Tama augwali te Juda we bidi bidali goli, augwaligo te Kraisde gesi wiegi yai po odama, tama te Krais wali pabo we bidi hani pedelali. Tama e pas asęani bidi agai augwaliba te genuai po peni page sela ola mani. Te pogo me deli e dao. (1) Te Jisas Krais aga te wiegi yai mu tama, te Godigo Ogwa dao. Te Jisas e tǫde bidali sogo, agade te sęgę hauwa me dene dali tolali, tama te tiali kolesagade Godigo Jisas te polalubo bidi mu pedalumainu elama, te we bidi dabe augwali tau sali. Te po te Dąį 2:10 tede elalubao. Te bidi Jisas agai te Juda dabego polobadu elaluali nai tigidali aiyaba mu elaluai dao. Krais agai te ensel mobo bidi dabe me, te bidi Moses me, te bidi Arongo hani pris bidi sę ebo me, te bidi Melkisedek me, te tigidaligo nogi te Godigo Ogwa Jisas Kraisgo nogigo ela solama aiyaba elaluali. (2) Godigo digi Jisas sa munama, te pris sesemane sogo bidimainu yali, tama agai te Juda pris bidali bidi dabe aiyaba elaluai dao. (3) Jisas te dagalude polalubo pris me bidada pidu bidaibao. Tama agai te agaba konealubo homu dąų wabo we bidi ma dobola sobaso, te usu yaibao. Te bidi Mosesgo lotu po ola mayu pusali bomo yai po dabe, te Jisasgo yabo sę ola mabo sę ebo kolesaga naga yali.
Te pasgo te we bidi augwaligo konealubo homu dąų walobo po asęani, tama agai te polobadu bidali Israel we bidi dabego boma pai konealubo po dąų wali te po te Dąį 11 tede hauwa elalubao. Agai tame po wali, te mena tiwai sęgęgo augwali gegebaso, te augwa konealubo po dąų ola selama elaludu te augwa isiboba usu nubaso, te usu dao. Augwaligo te Jisasba naga tonono elalua pedu te agai kolesaga wali pobaso da, teda tebogo te augwalide tolobo sęgę me dene te dagala sąwaibao. Tama tibaso, augwali aga dali homugo kęą pai we bidi mu bidiąo, e pas asęani bidigo te po obao.
Jisasgo te ensel dabe aiyaba elaluali
1
(Dąį 1–2)
Godigo Ogwago po dabolo mani
1 Te polobadu mu hauwa sogo me, te haniani kolesaga hauwago me, te Godigo agai po pusali bidi profet dabego pedauwalidu agai po meba te dago wąį dabebolo mena mena pai dao. 2 Tiali goli megi e sogo da, te nosali pedalobo sogo tiwai mu yali, te Godigo aga Ogwago pedauwalidu agai po dabolo pusai dao. Te aga Ogwago nogogo me te Godigo te tǫ dali dagalu dali te tigidali nai nigai dao. Tama Godigo agai te tigidali nai nosali somainogo aga sa muai. 3 Te Ogwa agai te Godigo wiegi wiegi yai homu kolesaga te dabolo hania ola mabo bidi dao, tama aga te God tiwai gagawai mu tama. Agai po da te genuai bomo elalubo, tama te bomai pogo agai te tigidali bidibo nai me bidaluao odubadi tama te bidalubo dao. Agai te we bidigo sęgę sali sela sąbo sę te silama, tama megi da te Tigidali Bomo Elalubo Tuni Bidi, te God dolo nogo badu dulalubao, aga genuai bidi mu dao.
Te Godigo Ogwago nogigo te ensel mobo bidi dabego nogi aiyaba elalubo dao
4 Te aga Ayade sali nogigo te ensel mobo bidi dabego nogi te aiyaba elaluama, tama wiegi yai mu yali. Tama tiwai yaligo da, aga digi te mobo bidi ensel dabe augwaligo Genuai Bidi mu pedalama, tama augwali aga dologoba pali. 5 Magi baso meni. Polobadu Godigo aga Ogwa dali te po wai,
“Nage eno Ogwa dao. Megi tama ena digi nago Aya
pedalomainogo yai.”
Tama agai po ma wai,
“Te ena digi agai Aya bidiyu,
tama aga te eno Ogwa bidaibao.”* 2 Sml 7:14; 1 Sto 17:13; Tib 2:7
Te me sogo Godigo te po si te ensel mobo bidi me deli dali wai dawe? Menio. 6 Tiali goli agai aga gomunai Ogwa te e tǫba tamadi tagala palobo sogo tama agai te po wai,
“Tigidali eno sę ebo ensel mobo bidi dabe, dage
kidu sugunama, tama dagego aga nogi ugwaba
sao,” wali. * Bom 32:43
7 Tama God agai te ensel bidi dabe augwalide te po wai,
“Godigo te aga ensel mobo bidi dabe augwali te wali
tiwai pedalomainogo ilibo dao.
Te agai aga sę ebo bidi dabe augwali te moni
posolo ebo sia tiwai pedalomainogo ilibo dao.”* Tib 104:4
8 Tiali goli aga Ogwabolo agai te tiwai po wai,
“Nage God dao, nage tuni bidi sesemane sogo bidada
peyu, bidada paibao.
Nago naga we bidi te doloba pai kolesagago tonalubo
dao, tama te kolesaga naga ebode nago genuai
wiegi yai nogi elalubao.
9 Nago te doloba pai kolesaga ebo te godolo mu
eyu, tama te bomo yai po sela sąbo te nago hagela
mu ebo dao.
Tama tibaso, ena nago God bidiyu, tama eno
nago nogi ugwaba somainogo eyu, te wel nago
toboluba gelali, tama tebogo nage te wiegi yai
homu pemene ilali.
Te naga hai namu dabe augwaligo te nago wiegi yai
homu pemene ebo tiwai me egobeo.” * Tib 45:6-7
10 Tama agai po agabolo ma weyu te po wai,
“Genuai Bidi, polobadu mu nago e tǫ nigilama
tama aga bomo elalubao. Te dagalu me, te naga
nogogo nigai.
11 Te dagalu de tǫ si te tigidali dolaibao, tiali goli
nage da me dologobeo. Menio. Nage da sesemane
sogo bidaibao.
Te dagalu de tǫ si da te tigidali te badia paibao, te
poloba ugwa badia pai tiwai yaibao.
12 Te nago augwali pedeyu, te bidigo badia pai
ugwa pedebo tiwai yaibao.
Te nago augwali hasegeleyu, te bidigo ugwa
hasegelebo tiwai yaibao.
Tiali goli, nage da, tama naga bidibo dao. Nage
me hasegelegobeo.
Tama nage bidibo sogo te munu me siligobeo.”* Tib 102:25-27
13 Polobadu Godigo te po wai,
“Nage genuai bidi ena dali hodobo bidimainogo eyu,
tama eno dolo nogo badu duayao.
Tama dualubadi, te eno nago boi bidi dabe augwali
te nago sągą dologoba muaibao.” * Tib 110:1
Tiali goli me sogo Godigo te po te ensel mobo bidi me deli dali waliwe? Menio. 14 Te ensel mobo bidi dabe augwali da, te noma bidi, tama augwaligo te Godigo sę ebo dao. Te Godigo augwali tagala palaibao, te aga augwaligo sęgę sali sela sąnama ma sainogo ebo we bidi dabe tau somainogo tebo dao.