Profet Joelgo Buku
Hasia nedebo po
Te e bukude te profet Joelgo pusali po dabe te elalubao. Tiali goli, te po dabede te profet bidi aga te aga mena tiwai bidi dawe te po pusubeo. Teda aga te kantri Persia bomo elama bidali sogo bidai bidi tonobo ąǫ ebao.
Teda te Israel we bidi dabe augwali te kantri Babilon tagalama, augwali te Juda tǫba ma asali sogo, Joelgo dwai sogo mu deli te kantride pedalubo suali. Te moni giliga posologo te tigidali nai dabe sasilibo suali.
Tama moni genuai mano sibi aselama, te tubo nai yabe dabe sese tula silibo suali. Joelgo te sę dabe suali, te bidigo Godiba boi bidi homu yainogo ebo bidiba dua dao wabo tiwai suali. Augwaligo augwa dwai kolesaga dabe yaibao. Tiali goli, nosali da, Genuai Bidigo be posobo si asaibao. Teda te Godigo te dwai sogo pedalaibao wali, te be posobo sogo agai te dwai kolesaga yali we bidiba dene mayu, me agai te sogo te wiegi yai kolesaga yali we bidiba wiegi yai kolesaga iyu yaibao wali sogo pedalaibao, te aga kolesaga wali pali we bidiba te wiegi yai sę yaibao.
Joelgo te we bidi homu begelama, tama Godigo augwali hobede emainao po wali. Dąų walai po genuai deli Joelgo profet po tomode deli elalubao. Te po te Dąį 2:28-32, tede te elalubao. God aga Mobo Bidi te we bidiba tagala palaibao wali. Te monu dabeba, me gesi bidi dabe, sese tama agai Mobo Bidi mawaibao wali. Te Godigo te Mobo Bidi te Jisas wali bilali bidi dabeba tagala palai madi, Pitago te po wali, teda te profet Joelgo profet poba te usu nani dao po wali. Te Tagala Palali 2:1-42 tede suao.
1
Te we bidi dabego nai tigidali doado bage dolobaso, tama augwali gela wai
1 Te e po da, Genuai Bidigo Joelbolo mawai, te Petuelgo ogwa dao.
2 Dage monu dabe we bidigo, odiąo.
Te dage tigidali Judago, odao.
Eno dageba megi te pedelali nai po hanalu obao.
Te tobage nai te polobadu dage bidali sogo
me pedelai dawe?
Te duga wąį nǫų bidali sogo me pedelai dawe?
Eno homugo te menio.
3 Dagego duga wai dabebolo te sę yali po waiąo.
Augwaligo te augwa wai dabeba te po omainao,
tama te wai dabego te nosali pedalubo
haniba omainao.
4 Te me si me si te tobage kuli mano hani pedelama,
tama te tigidali nai yabe mu silalio.
Tama hasia te polasa pali kuli mano hanigo
te taga pali nai yabe,
te si wali nosali asobo kuli mano hanigo tula silali.
Tama te sela wali, me te me si me si wali hani,
te hani sigo te tama tiwai naga yali,
tama te tigidali nai mu silalio.
5 Dage te bomai ąį tulama, gęǫ page ebo
bidi dabe, hogodama gela waiąo.
Dage te wain wę tubo bidi dabe, dage me gela waiąo,
magi baso meni, te kuli mano dabego
dagego te gesi wain ąį nigabo bono du
tigidali te dolali dao.
6 Genuai kuli mano hani te genuai
ami hani me deli tiwai yali,
te dago tǫ kantri tigidali mu halua sigulali.
Augwali bomai mu, te hauwa umabo,
te nedabo usu egobeo.
Te augwaligo kele te laiongo kele tiwai
te mu poa pai dao. * Ped 9:8
7 Augwaligo te dago ni wain dabe dolama,
te dago ni kaya fik me tula silali.
Augwa te tigidali ni kaya wale me ni
nologo tula silama,
wa pelama, te tedela yai elaluai dao.
8 Dage we bidi dabe, dage gela waiąo,
te gesi wegi aga sainu yali bidi isibaso,
te aga gela wabo tiwai iyąo.
9 Te nai me wain te God aga beba
ofa yabo nai meni yai.
Te pris dabe augwa Genuai Bidiba
ofa yabo nai meni baso,
tibaso te augwali gela obao.
10 Te gi dabede nai meniama, olo mu elalubao.
Tama tǫ digi me gela obao, magi baso meni,
tigidali gide nai dolali,
te wain du wai tigidali sasia pelama,
te oliv ni dabe me sasia palio.
11 Dage te gide sę ebo bidi dabe,
dage te homu dene eyu, gela waiąo.
Tama dage te wain gide sę ebo bidi dabe,
dage gela waiąo.
Magi baso meni, tigidali wit, me bali,
me tigidali nai dolalio.
12 Te ni wain dabe dali,
te ni kaya fik dabe me, sasia palio.
Tama te gasa tobage du walobo ni dabe tigidali,
augwali mu sasia pali.
Tialima, te we bidi dabego wiegi yai
homu pemene ebo tigidali te sia salio.
13 Dage te altaba ofa ebo pris dabe,
dagego te homu dene ebo side gudubo
ugwa gudama, tama dage gela waiąo.
Te hulide dagego te homu dene ebode
gudubo ugwa gudama,
te Godigo be tomoba pelama, tama gela udubadi,
te be posoboba usu nao. Magi baso meni,
te dena Godiba ofa yabo nai me wain meni yai dao.
14 Dagego te tigidali we bidiba wao,
augwa te nai habu selemainao.
Tama tigidali we bidi sisinagasomainu i olama,
te lotu wagasomainao wali.
Te polalubo tobolu bidi, me tigidali Juda we bidi,
tama dage te Godigo be tomoba pelama,
te dena Genuai Bidi, agaba i waiąo.
15 Magi baso meni,
te Genuai Bidi asabo side bodolu te pąba yagasalio,
tama te bodolu side te Tigidali Bomo Elalubo
Godigo te dolabo genuai sę daba tagala palaibao.
Hobede da, te side te dwai mu dao. * Ais 13:6
16 Te nai dabe dolali, te dago magi sę deli me egobeo.
Te Godigo beba da paibao,
tiali goli dago wiegi yai homu pemene me egobeo.
17 Tǫde wę meni yai,
tama tiyu, te tǫ tomode nai wai dabe
isila pelama, te nai me holobeo.
Tialima, te nai mubo be olo elaluama, te dolalio.
18 Hobede dao, te bulmakau dabe nasi dwai mu ebaso,
te hou weyu, ga walio.
Augwali te homu kolesaga meni yani,
magi baso meni, te tuabo nosai me elalubeo.
Te sipsip hani me nasi eyu, te nomona salio.
19 Genuai Bidio, eno gedu haluasa po bomonama obao,
magi baso meni, te tigidali nosai me,
ni me, te sasia pelama,
te augwali isigo ulali tiwai yali dao.
20 Te uni hasa dabego me nageba i obao,
magi baso meni, tigidali ąį sula siyu,
tigidali nosai me wa pai dao.