Rutgo Po Elalubo Buku
Hasia nedebo po
Rut te genuai tǫ pedai Moap we me deli dao. Aga te Israel bidi me deligo sai, tiali goli nosali aga bidi isai. Te aga bidigo ida te Israel we, tama te Israel bidigo sai, tama aga bidi me isai. Tialima, nosali Rut te aga bidigo ida dali te Israel tǫba bidigi palio. Rutgo te aga auwa mosi we godolo mu elama, te aga bugagia tonaluai. Te auwa wego te Israel dabego Godiba lotu po wai, tama Rutgo me te kolesaga selama, tama agai God godolo mu edubadi geai. Te nosali mu te Israel dabe augwaligo te Rutgo po nedelama augwaligo koneani, te gasa tǫ pedai we bidi augwaligo te God wali pobaso da, teda agai augwali godolo mu yaibao. Tama Godigo Rut sula tagalali, te gasa bulu tǫ pedai we, te Israel hani isiąwai we, te nosali bidabo bidi Devit aga auwa mosi pedelali, te Israel dabego bomai gavman tuni bidi king dao.
1
Elimelek aga we wai puluba dali augwali pelama, Moap tǫba bidigi pai
1 Tama te tobolu bidi dabego te Israel dabe augwali tonalubo sogo, tama augwaligo te augwali tonaluabo tuni bidi king me deli nigilisiąbadi, tama genuai nasi te tǫba pedelai. Tama te Betlehem hanu bidi me deli, aga te Juda hani me deli dao, aga pelama, te Moap tǫ pedaiba kibu be meba bidigi palio, aga augwaligo tǫde bidai. Agai te tǫ abeliyu mone me sabeo. Te bidi aga we dali, aga ogwa si dali pai. 2 Te bidi aga nogi Elimelek, tama aga we nogi Naomi. Aga ogwa si nogi e dao, Malon me Kilion. Augwali te Efrata hani, tama te hanigo bulu te Betlehem, te genuai tǫ hani Juda. Tama augwali pelama, te Moap tǫ pedaiba bidigi palio. 3 Tama augwali te Moap tǫ pedaide bidali sogo, te bidi Elimelek isali, tama aga we Naomi naga aga ogwa si dali bidai. 4 Nosali Naomigo ogwa sigo te Moap tǫ we si sai. Te we si nogi e dao, Orpa, me Rut. Augwali we selama, tama augwali te Moap tǫde kibu be nogo si bidali homu yai dao. 5 Tialima, te sogo te Malon de Kilion si me isalio. Tama megi da, te Naomi agaduba deli bididuali, magi baso meni, aga bidi dali, aga ogwa si me, augwali isai dao.
Naomi de Rut si te Betlehem buluba ma soali
6 Tama Naomi te Moap tǫde bidibadi, te sogo agai e tiwai po odai, Genuai Bidigo wiegi yai sogo aga we bidi Israel augwalibolo menama, tama nai augwaligo gide ma holobo po odalio. Tama Naomi aga auwa we si dali, augwaligo te Moap tǫ taga painogo sisi elalualio. 7 Megi da, augwali hogodolama, te Juda tǫba ma painogo yali, tiali goli augwali tųdu pidu digi, 8 tama Naomigo augwali sibolo te po wai, “Dage si ma geasa pelama, duga si ida dali duga page buluba bidigi pao. Dage sigo wiegi yai kolesaga ena dali me eyu, te isali bidi dabe dali me tialio. Tama eno homugo te tiwai sę naga te Genuai Bidigo wiegi yai sę dage si dali emainao. 9 Tama eno homugo te Genuai Bidigo dage si tau sobaso, tama dage sigo bidi me gegebaso, tama dage si bidigo ma selama, tama dage si bugagia ma bidaibao,” te po wai.
Naomigo te we sibolo dage si tao wali, tiali goli, te we si dwai gela mu walio, 10 tama te we sigo e tiwai po te Naomi dali wai, “Menio, dago nage taga pogobeo. Da tigidali nago hani bidibo madi pinao,” wai.
11 Tiali goli, Naomigo te po wai, “Eno auwa we o, te dage si ma geasa pao. Magi baso dage si ena dali painogowe? Dage sigo homugo eno ogwa meba ma ame nenama, dage si ma somainogo homu eyuwe? Menio. 12 Ena mosi dabe yalio. Ena bidigo selama, wai ma ame nabo usu me egobeo. Duga si buluba ma geasa pao. Ma, ena megi hulide naga bidigo selama, tama ena haliga elama, tama wai meba ame nobaso da, 13 teda dage si augwaligo somainogo tonalubo usu me egobeo. Teda dage si gasa bidi dali pabo homu yaibao. Dage sigo tonalubo usu me egobeo. Menio! Genuai Bidigo ena dolama, tama eno dage homu dene ebao, magi baso meni, duga si bidi isai digi, tama dage si olo naga bidibao,” Naomigo te po wai.
14 Agai po ola silibo si, tama Rut de Orpa augwali si gela ma wabo sę yalio. Nosali Orpago Naomi dali nage tao olama, tama aga taga palio. Tiali goli, Rut aga Naomi dali bidainogo homu yalio. 15 Tama Naomigo Rutbolo te po wai, “Suao! Naga we ama aga haniba me aga wąįgo godiba te geasa pobao. Nage aga dali pao,” wali.
16 Tiali goli, Rutgo te po wai, “Nago enabolo nage taga pabo po wagio, tama nago ena nage dali pabo te geligio. Tigidali bulu nago pabo madi, te ena me ena paibao. Tigidali nage bidibo bulude, te ena me ena tede bidaibao. Nago hani te eno hani mu pedelaibao, te nago God da, te eno God me pedelaibao. 17 Te nago isibo bulude, te ena me isimai yaibao, tama augwaligo ena te bulude pubulumai yaibao. Eno te magi nai me deligo dadi si tomode dąį ilainogo ebo te me gogologobeo. Isibogo naga dadi si tomode pedemainu yaibao. Mu tamao. Ma, eno te po wali te eno wali pisąyu da, teda Godigo enabolo dene genuai mu ilimainogo emainao,” Rutgo te po wai.
18 Naomigo koneani, Rut aga dali painogo bomo mu yali, tibaso agai po me wabeo. 19 Augwali si pidubadi genama, tama Betlehemba sabolali. Augwali si Betlehemba sabolobo si, tialima tede bidali we bidi augwali dwai noma mu sali. Tama te we dabe sibigo te po wai, “E ma te we Naomi dawe? Ma, aga bidi badi, aga ogwa si, te mena bidibowe?”
20 Naomigo po wei ponoyu, te po wai, “Dagego ena nogi te Naomi te tiwai te dwagi yai homu pemene ebo we nogi igio. Menio! God te Tigidali Bomo Elalubo Bidigo enabolo dwai homu dene ilalio. Tama dagego ena nogi te Mara wao, te tiwai te homu sęgę ebo we dao. 21 Magi baso meni, eno e bulu taga pali sogo, eno doado bage hauwa elaluali, tiali goli Genuai Bidigo ena eba ma odasa asali, te eno doado bage tigidali menio. Dagego ena nogi Naomi munu me ma nogi elamu dao. Magi baso meni, God Genuai Bomo Tigidali Elalubo Bidigo ena aiyaba elaluama, tama ena mu dolalio.” Naomigo te po wai.
22 Tialima, e po da te Naomigo Moap tǫ taga soali po pusali, tama Naomi aga Rut dali ma asali, te Moap tǫ we, aga auwa augwali si te Betlehemba sabolali, te bali togobo sogode sabolali. * Te nai nogi bali wabo, te nai ge te megi dago tubo nai rais ge tiwai me deli dao.