4
Laza Nene Initeꞌ Lamineꞌ Minamo Ha Misubo Somo Neꞌmine Noneꞌza Aꞌmine Misubo Somo Neꞌmi Lulouꞌ Nene Initeꞌ Lamineꞌ Tamineꞌ Gehepeve Minelidoꞌ O Neineꞌ Neꞌmino Leliꞌ Luteuꞌ nene Initeꞌ Lamineꞌ Tamineꞌ Adoꞌ Kilisitokisi Eiꞌ Monovo Danavaꞌve Lamineꞌ Masi Nene Neive Lo Pauloꞌ Lineꞌ Gamazi
1 Neꞌmino neineꞌ nenako Oꞌmosoꞌmo asiꞌve lulo lamineꞌ lemosa aꞌmine monoꞌ gono lamineꞌ mene lemavo do do vo minaaꞌ nouninguꞌ nene goseleꞌ ogo muludeuꞌ goloso ogavo ma hulosaꞌmune. 2 Laza nene monovo goloso sunoꞌ daaꞌ naaniꞌ neꞌminemuꞌ nene mo amolosune lo mo mehede emekune. Laza eveneꞌ ma nene goꞌine izo Oꞌmosoꞌmi gamazi lamineliꞌmo lidoꞌ lamo do atoꞌ ogo lo-ngemesaꞌmune. Asi eveneꞌ mukiꞌ leliꞌ monovote nene izeꞌ mili ningi hehe lilizangumuꞌ ve lo Oꞌmosoꞌmi veleloꞌ mino gamazi gihile laminekovoꞌ nene lo sotoꞌ ogo ngelebizaaꞌ noune. 3 Idoꞌ aꞌmine Oꞌmosoꞌmi gamazi lamineꞌ lo sotoꞌ noneꞌ nene ma hito nolineꞌ nene mo vi tolovo ilizadoꞌ mini mili nizavelavoꞌ nene hitosa mineleseive. 4 Aꞌmine me misubouꞌ aleve vi tolovo ilizave nene Oꞌmoso gihilelotiꞌ do eita medele-ngedavo gelekeleꞌ i-di nizave Satani neꞌmo nene Oꞌmoso gele vive gehepeve Kilisitoꞌnimuꞌ guveleꞌvesi minineꞌ gamazi lamineꞌ neꞌmo nene hize labanaꞌ ele-ngedavo labanaꞌve ningikelizave losa aꞌmine Oꞌmosomuꞌ gili hulaaꞌ aveti luꞌineꞌmi vele nene do like-ngidineꞌ ve. 5 Idoꞌ Izesuꞌnimuꞌ gamazi ve luvoniꞌ nene nemuꞌ luve. Laza leliꞌ nene leꞌmetilizave losa neꞌmine gamazi nene lo-lengemaaꞌ nounivoba asi Izesuꞌ Kilisitoꞌ nene Guvelesi ve ne neize. Eiꞌ nene eꞌmetilo losa nene lo-lengemaaꞌ noune. Idoꞌ laꞌlisetemuꞌ nene laza Izesuꞌnimuꞌ gelosa lengitoꞌ gelekeleꞌ izipe neꞌmine nene none losa lo-lengemaaꞌ noune. 6 Neꞌmine noluvoniꞌ nene nemuꞌ noluve. Oꞌmoso gozopoꞌ akaꞌmila litiꞌmuso izo mininguꞌ labanaꞌ sotoꞌ ilive live neꞌmo nene Oꞌmoso neniꞌ nemeni dameni nene Izesuꞌ Kilisitoꞌ velelotiꞌ sotoꞌ neivosa aꞌmidotiꞌ nene ningi gililizangumuꞌ ve losa luteuꞌ nene hize labanaꞌ ele-lidineꞌ ma neive.
7 Ne neiha aꞌmine gamazi lamineꞌ tamineꞌ luteuꞌ do nonive laza nene haza niteꞌ heneni milaaꞌ aniꞌ somo misubodunuꞌ liliꞌ aniꞌ neꞌmine nene none. Idoꞌ somo neꞌmino haza niteꞌ noneꞌ nene lelitoꞌ minineꞌ amuzo atoliꞌmine goloso neineꞌ neve nene lelitatiꞌ minamineꞌza asi Oꞌmosolatiꞌ neineꞌ nene sotoꞌ o minelive losa nene somo neꞌmino haza niteꞌ nene none. 8 Laza nene geni ato atoꞌ gehaaꞌ nouneꞌza neꞌmo nene aka vamaatoꞌ ma leleꞌmize molosaꞌmive. Idoꞌ geni initeꞌ lelita minaaꞌ neingumuꞌ nene gate mukiꞌ gelaaꞌ nouneꞌza aꞌmine neꞌmo lute gate do gopo gehepeve ogo ma hize tile-ledesaꞌmive. 9 Idoꞌ libililisasi nene viseꞌ i-lidaaꞌ naniꞌza Oꞌmoso neꞌmo ma hulo-ledesaꞌmive. Idoꞌ libilikevosasi nene lemo ongaaꞌ nouba goloso gehepeve nene ma dosaꞌmune. 10 Neve nene laza mo Izesuꞌ helaatoꞌ mine molo mino monaaꞌ ineꞌ maꞌminosa nene nomonune. Neꞌmine ogaꞌ nouneꞌ nene lelitotiꞌ nene Izesuꞌ minevoꞌ alevoꞌve neineꞌ ma nene eveneꞌ mukiꞌ ningilizave losa nene neꞌmine ogaꞌ noune. 11 Ee, laza nene vetesi ha nouneꞌza Izesuꞌni do minuningumuꞌ nene gamene gamene helaaꞌ akalokovoꞌ leleꞌmizi milaaꞌ navo minaaꞌ noune. Neꞌmine ogaꞌ nouneꞌ nene aꞌmine helaaꞌ neineꞌ okodelotiꞌ mene Izesuꞌ minevoꞌ alevoꞌve neineꞌ nene sotoꞌ ogavo ningilizangumuꞌ ve losa nene neꞌmine ogaꞌ noune. 12 Neꞌmino neinako helaaꞌ neꞌmo nene lelita gono nodaniꞌza neꞌmine idiꞌmo minevoꞌ minevoꞌ ogaꞌ monovo neꞌmo nene lengikuꞌ gono nodave.
13 Idoꞌ ve maliꞌmo gamazi ma lineꞌ monoꞌ godolouꞌ minineꞌ neꞌmo nene lelitokisi vo do neive. Aꞌmine gamazi nene tiꞌ lo lo neive:
Naza gele eleꞌvoleꞌ ogo nouvoniꞌ nenako nemuꞌ nene naza lo sotoꞌ nouve.
Lazasi nene aꞌmineꞌmine ogo Izesuꞌnimuꞌ gele eleꞌvoleꞌ o minosa nene lo sotoꞌ ogaꞌ noune. 14 Neꞌmine ogaꞌ nouneꞌ nene aꞌmine Guvelesi ve Izesuꞌni hilingutiꞌ do ote-dive neꞌmo nene Izesulesi makaꞌ do ote-ledo lengikisi nene do eiꞌ veleloꞌ o-ledeleseive lo gele minosa nene neꞌmine ogaꞌ noune. 15 Idoꞌ laza neꞌmino mulumo alumo geni initeꞌ geho noneꞌ nene ha lengiꞌ lamineꞌ ilizangumuꞌ ve losa nene neꞌmine ogo none. Idoꞌ neꞌmine ogo noneꞌ nene Oꞌmosoꞌmi nasahiliꞌ neꞌmo eveneꞌ mukita nene vokaꞌ vokaꞌ ogovoꞌ neivosa aꞌminete nene Oꞌmoso opoꞌni likaꞌ likaꞌ iꞌmi viivoꞌ nizavo eze guvele nene vo naba goloso oꞌmo vo minelive losa nene neꞌmine ogaꞌ noune.
Me Misubouꞌ Ningaaꞌ Nouneꞌ Initeꞌ Osuꞌ Laaꞌ Neineꞌ Maloꞌ Nene Lehete Amo Alingeꞌ Daloneꞌ Initeꞌ Osuꞌ Lamilineꞌ Maloꞌ Nene Gele Muꞌmusiꞌ Ogo Mino Geni Lelita Neivosi Nene Goseleꞌ Lebelamivosa Minaaꞌ Noune Lo Pauloꞌ Lineꞌ Gamazi
16 Neꞌmine o neineꞌ nenako nemuꞌ nene laza gono daakumuꞌ goseleꞌ osaꞌmune. Ee, okode losuvola amuzote neve nene labuluvo olosa apiꞌ oꞌmo novivosi gamene gamene lute nene gosohoꞌ okaꞌ okaꞌ oꞌmo novive. 17 Naza neꞌmine noluvoniꞌ nene laza neꞌmine manaꞌmine geni mukiꞌ leliꞌ geheloneꞌ o neineꞌ nene mo ngomo ha niteꞌ mino gamene liꞌnibemukovoꞌ ne neive. Idoꞌ aꞌmine neꞌmo nene initeꞌ naba aꞌmine geni mukiꞌ nene ivileꞌ ogo minineꞌ adoꞌ minevoꞌ alevoꞌ lamineꞌ goloso osuꞌ lamilineꞌ nene do sotoꞌ o-ledeꞌmo novive. 18 Ee, laza ninge noneꞌ initeꞌ mukiꞌ nene gamene liꞌnibemukovoꞌ minosa nene osuꞌ laaꞌ neineꞌza ningamuneꞌ Okulumokuꞌ initeꞌ nene minevoꞌ minevoꞌ initeꞌ nizave. Nemuꞌ nene ninge noneꞌ initetoꞌ nene lute gate molamo asi ningamuneꞌ initetoꞌ nene lute gate molaaꞌ noune.