IZESUꞌ ZUHO GALATIA MISUBOUꞌ MINANIꞌ NETI LUHUVO NITEꞌ PAULOꞌ GIZE-NGIDINEꞌ
Izesuꞌ Evenele Zuho Galatia Polovinisiuꞌ Minavemuꞌ Pauloꞌ Gizineꞌ Luhuvo Nitekumuꞌ Gomuꞌ Gataaꞌ Gamazi
Mene luhuvo niteꞌ nene Aposoloꞌ Pauloꞌ gizineꞌ. Eiꞌ monovoꞌvemuꞌ nene aposoloꞌ bukuuꞌ neive. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Pauloꞌ luhuvo niteꞌ mene gizineꞌ nene Loma vete gizebo aniꞌ polovinisi Galatia ve languꞌ Izesuꞌ evenele zuho miniꞌmi monangumuꞌ gize-ngidineꞌ ve. Galatia polovinisi nene idise gamenela Teki (Turkey) ve laaꞌ nouneꞌ neꞌmi olusota minineꞌ ve. Idoꞌ aꞌmine misubo neꞌmi gulive gohi ma nene Asia Mainoo (Asia Minor) ve. Aposolo bukuuꞌ nene Pauloꞌ aza tauni gulive Pisidia Adiokia idoꞌ Ikonio idoꞌ Lisitila idoꞌ Delebe ve laaꞌ nouninguꞌ nene gamene vaiꞌ mono ninge-ngidineꞌ. Aꞌmine tauni nene Galatia polovinisi neꞌmi ema gahevela (south) minaniꞌ. Ato atoꞌ aleve noꞌine ato atokisi Galatia misubouꞌ nene vaiꞌ goloso li minaniꞌ. nGiliki alevesi idoꞌ Loma alevesi idoꞌ Zuda vesi eveneꞌ linge ato atoꞌ mukikisi minaniꞌ. Vaita nene Zuda ve minamaniꞌ soza Oꞌmosoloꞌ monoꞌ laaꞌ ave minaniꞌ. Pauloꞌ aꞌmida vo Izesuꞌnimuꞌ lo-ngimidotiꞌ eveneꞌ linge ma nene Izesuꞌnidoꞌ gili eleꞌvoleꞌ aniꞌ. Pauloꞌ mene luhuvo niteꞌ nene me aleveloꞌ gizo hulineꞌ.
Pauloꞌ hulo-ngedo vidotiꞌ gamene haꞌna ogo vamivo Zuda ve linge gohi monoꞌ li-ngimaaꞌ aniꞌ tisaꞌ nene aꞌmine aleveliti vovoꞌninguꞌ aniꞌ. Ingine Pauloꞌni lovo i imaaꞌ ave minaniꞌ. Pauloꞌ monoꞌ apize ngemaaꞌ neineꞌ nene lisiheꞌ amive li laniꞌ. Izesuꞌnidoꞌ gele eleꞌvoleꞌ ogaꞌ neꞌmovoꞌ nene damive laniꞌ. Oꞌmosoꞌmi evenele gehepeve loloꞌ olone li ma nene aꞌmine aleve me ve nene okoꞌine lolovo huki Zuda veliti louꞌ gamazi mukitoꞌ nene eꞌmetilo li laniꞌ. Neꞌmine likevo Galatia ebekuꞌ Izesuꞌ evenele zuho ingine nene aꞌmidoꞌ gili eleꞌvoleꞌ aniꞌ.
Neꞌmine aniꞌ nene Pauloꞌ aza gelo mene luhuvo niteꞌ nene aꞌmine Izesuꞌ evenele mulise Galatia polovinisiuko miniꞌmi monaniꞌ nene gizo hulo-ngidineꞌ. Aꞌmine luhuvo niteꞌveuꞌ nene tiꞌ lo lineꞌ: Eiꞌ lo-ngimineꞌ monoꞌ gamazi neve nene monoꞌ gamazi gihile ne neivo gohi atoꞌ ma nomive lo lo-ngimineꞌ. Aꞌmine monoꞌ gamazi nene Izesuꞌ Kilisitoꞌ aꞌsiꞌve lo-dineꞌ ve. Eveneꞌ malotiꞌ damuve lo lineꞌ. Idoꞌ aꞌmine apize ngimineꞌ monokumuꞌ aposoloꞌ mala lo-ngimineꞌ nene ingine aꞌminemuꞌ muluꞌine mili hamoꞌ igi gamazi gohi atoꞌ ma lilive li li-damaniꞌ ve lo lineꞌ. Oꞌmosoꞌmi veleloꞌ lisiheꞌ gehepeve ikeve do nguꞌ izelineꞌ aka hamoꞌ nene Izesuꞌ malipo zaloꞌ neniꞌ lihimeꞌne do hulolosa helave li gili eleꞌvoleꞌ ilizadotikovoꞌ ne neive lo lineꞌ. Eveneꞌ ma louꞌ gamazi eꞌmeto minelidotiꞌ nene Oꞌmosoꞌmi veleloꞌ ve lisihetoꞌ ve loloꞌ ogavo do uꞌ izamoloseive lo lineꞌ. Idoꞌ eveneꞌ neꞌmine ma ilizaniꞌ nene Izesuꞌ aza hazamuꞌ hilineꞌ geleleseive. Louꞌ neꞌmi gonoꞌve nene eveneꞌ gizebo o-ngedo do akaloꞌ o-ngedo neivo Izesuꞌ alingumuꞌ ne neive. Abalahamuꞌnisi nene Oꞌmosoꞌmo ve lisihetoꞌ ve ve lo-dineꞌ nene eitoꞌ gele eleꞌvoleꞌ ingumuꞌ neꞌmine lo-dineꞌ ve. Louꞌ eꞌmetelonidiꞌmo nene Oꞌmosoꞌmi veleloꞌ lisiheꞌ olosune lii neꞌmine igaꞌ nave nene louliꞌmi agoveꞌve neꞌminisa ne nizave. Ne neineꞌza Izesuꞌ evenele laza nene agove nomune. Izesuꞌ aza louliꞌmi agoveꞌve minunidotiꞌ nene do kululuꞌ ize-ledave. Idoꞌ do kululuꞌ ize-lidineꞌ nene gohi monovo goloso oloningumuꞌ nomive. Asi monovo lamineꞌ oloningumuꞌ ve. Adoꞌ ge luka neme ne luka geme idoꞌ ne hize eleꞌ o-gede ge hize eleꞌ o-nede lolone. Neꞌmine oloneꞌ nene louliꞌmo neꞌmine ilo lo neidoꞌ olosune. Ne neineꞌza okode neꞌmo nene initeꞌ goloso mukiꞌ olosa gelaaꞌ neinako nemuꞌ laza hulo-mikunivo leliꞌ nene gizebo o-ledamilive. Neꞌmine amivo leliꞌ nene Oꞌmosoꞌmi Sikalahuliꞌmo lelebizelidokovoꞌ eꞌmetelone. Neꞌmine okunivo Oꞌmosoꞌmi Sikalahuꞌ neꞌmo nene lelikuꞌ gihile lamine tamineꞌ vaiꞌ izelive.
Pauloꞌ aza mene gamazi lo osuꞌ lo Galatia ve tiꞌ lo lo-ngimineꞌ. Ve ma initeꞌ goloso nodavo ningi ma alahaꞌ igi aꞌmine ve nene gohi eleꞌmize aka lisiheta ilo. Idoꞌ okoꞌine lolovo hukilizave lii li-ngidi minangumuꞌ gohi gaꞌine daniꞌ. Ve ma okoꞌno lolovo huko nolihe hukamo nolihe neuꞌ nene initeꞌ ma nomive. Eveneꞌ gosohoꞌ gehepeve loloꞌ ilineꞌ nevoꞌ nene initeꞌ naba ve. Neꞌmine ogo luhuvo niteꞌ ve nene noꞌnohoꞌ gamazitunuꞌ gize osuꞌ lineꞌ.
1
Pauloꞌ Aza Izesuꞌ Evenele Noꞌnohoꞌ Ize-ngedo Lo-ngimineꞌ Gamazi
1-2 Aposolo Pauloꞌ naza idoꞌ leze zuho Izesuꞌ aleve ingine mukikisi noneꞌ nesi nene lingine Izesuꞌ Kilisitoꞌ zuho mulise mukiꞌ Galatia misubouꞌ miniꞌmi monangumuꞌ nene luhuvo initeꞌ gize lengemelone loosa naza mene nogize lingimuze. Ningilo. Naza aposolo gono daaꞌ nouvoniꞌ nene haza evenelite neꞌmine gono nimi neleꞌmizi milaniꞌ nevoba asi Izesuꞌ Kilisitoꞌ asiꞌve nesi hilingutiꞌ do ote-dive meleho Oꞌmoso nesi neleꞌmizi milasineꞌ nenako nemuꞌ aposolo nouve noluvoniꞌ nene mo laminetoꞌ noluve.
3 Idoꞌ Oꞌmoso metehosi Guvetesi ve Izesuꞌ Kilisitokisi engiꞌ nasahiliꞌ i-lidaaꞌ nasineꞌ monovoꞌine nesi idoꞌ hongu lo lamino minaaꞌ monovoꞌine nesi nene lengita minelive lo Oꞌmosola noluve.
4 Meteho Oꞌmosoꞌmo lavo eiꞌ luloloꞌ eꞌmeto Guvetesi ve Izesuꞌ Kilisitoꞌ aza idise minaniꞌ alevetinguꞌ goloso ogo noningutiꞌ nene do luꞌ izelove lo eze okoꞌno hulo lihimete apaso hilineꞌ. 5 Nemuꞌ nene Oꞌmoso opoꞌni lovoꞌ lovoꞌ ogo mino mo izo huko-ledamivo minevoꞌ minevoꞌ ogo minelive lo mo aꞌminemuꞌ neꞌminovoꞌ miniliho lo noluve.
Izesuꞌ Kilisitoꞌ Gamaziꞌve Lamineꞌ Lo-lingimuvoniꞌ Nene Eveneꞌ Malite Neꞌmino Nomive Li Ma Li-lingimilizaniꞌ Nene Mo Gilikelizave Lo Pauloꞌ Lo-ngimineꞌ
6 Lingine Kilisitoꞌ nasahiliꞌ o-lengedavo neꞌmo Oꞌmosoꞌmo eiꞌ evenele ve lo lengeleꞌmize molavo minangutiꞌ liteꞌ li mehedine imi evenelite monoꞌ gamazi lamineꞌ ve li gamazi atoꞌ li-lingimaniꞌ gili ngimaaꞌ naniꞌ nemuꞌ nene naza upuhoꞌ ogo aizo lo nogiluve. 7 Ne neiha Kilisitoꞌ gamaziꞌve lamineꞌ neꞌmine nene atoꞌ ma nomineꞌza eveneꞌ ma ingine nene lengiꞌ lutinguꞌ hizi di gopoꞌ napa i-lingidi Kilisitoꞌ gamaziꞌve lamineꞌ nene di atoꞌ igi di goloso ilisa laaꞌ nave. 8 Ingine neꞌmine igi Kilisitoꞌ gamaziꞌve lamineꞌ gomuꞌ vomila lo-lingimuneꞌ nene li-lingimami ma di gopo igi atoꞌ ma li-lingimilizave ingine nene Oꞌmosoꞌmo usiꞌ ize-ngedavo mo vi tolovo ilisave lo noluve. Mo nazasi neꞌmine ma olonikisi nene mo vo tolovo olosuve lo noluve. Idoꞌ Okulumokutiꞌ Oꞌmosoꞌmi angeloꞌ neꞌmineꞌmosi neꞌmine ma ilineꞌ nene Oꞌmosoꞌmi angeloꞌ noliha aꞌminesi mo vo tolovo oloseive. 9 Gomuꞌ lo-lingimuneꞌ nene idise gohi tiꞌ lo nolo-lingimuve: Ve ma ingine laza monoꞌ gamazi lo-lingimuneꞌ gili eleꞌvoleꞌ aniꞌ gamazi neꞌmine li-lingimami atoliꞌmine ma li-lingimilizave nene Oꞌmosoꞌmo usiꞌ ize-ngedavo vi tolovo ilisave.
10 Idoꞌ eveneꞌ malite nenikumuꞌ nene aza laminetoꞌ lamo ha eveneꞌ laniteꞌ gililizadokovoꞌ lo-ngemaaꞌ neive laaꞌ aniꞌ nene naza neꞌmine ogaꞌ uvodoꞌ ladiniko idise eveneꞌ ma vi tolovo ilisave noluvoniꞌ nene ngelo lo-ngimuvodibe. nGelo ma lo-ngemamuvodine. Nemuꞌ nene eveneꞌ laniteꞌ gililizadokovoꞌ lo-ngemamo Oꞌmosoꞌmo ninge lamineꞌ dalidokovoꞌ lo-ngemaaꞌ nouve. Ee, Kilisitoꞌ gelekeleꞌ ve loloꞌ oo minuvoniꞌ neꞌmo evenelite neniꞌ ngeli ninge lamineꞌ damilizadoꞌ nenako evenelite neniꞌ ninge lamineꞌ dalizave losa idisesi neꞌmine ogo ha minuvodiniko Kilisitoꞌ gelekeleꞌ ve loloꞌ ogo ma minamuvodine.
Pauloꞌ Aposolo Loloꞌ Ogo Monineꞌ Monovo Lo-ngimineꞌ
11-12 Neze zuhokizo, naza Kilisitoꞌ gamaziꞌve lamineꞌ lo-lingimuvoniꞌ mamuꞌ lo-lengemeloze. Gililo. Aꞌmine gamazi nene eveneꞌ malitidatiꞌ giluvoba evenelitesi apizi nimamavo Izesuꞌ Kilisitoꞌ asiꞌve lo sotoꞌ ogo lo-nimineꞌ ve. Nemuꞌ nene evenelite di sotoꞌ milaniꞌ gamazi nomive li gililizave losa nolo-lingimuve.
13 Idoꞌ Kilisitoꞌ gamaziꞌve lamineꞌ nene eveneꞌ malitesi li-nimamavo Kilisitoꞌ asiꞌve lo sotoꞌ ogo lo-nimive luvoniꞌ nene nemuꞌ luze. Gililo. Naza gomuꞌ Zuda veti monovoloꞌ eꞌmeto mino ogo molo minaaꞌ uvoniꞌ monovoꞌne nene lingine mo li-lingimikevo mo gili nizave. Naza nene neꞌmine noogo Oꞌmosoꞌmi evenele zuho do goloso palasa ogo osuꞌ lo-ngedelove lo neꞌmine olosa do goloso ogosa goboni molo-ngedaaꞌ uvoniꞌ ve. 14 Idoꞌ naza nene avotemotidatiꞌ monovo ngomoꞌ nabaꞌ nene lemo ongalive lo aꞌmine avotemotidatiꞌ gamazi nene amuzo goloso molo gele do mino neze gonoꞌnemote leliꞌ Zuda veutiꞌ minaniꞌ mukiꞌ nene ngivileꞌ ogo Zuda veti monokuꞌ nene dize veletoꞌ okaꞌ okaꞌ oꞌmo vo minuvoniꞌ nene lingine mo gili nizave. 15-16 Neꞌmino mino neꞌmine ogaꞌ uvoniꞌza izeꞌnehi mulunouꞌ olihe ha minuvonguꞌ do kegese-nedo nasahiliꞌ o-nidineꞌ neꞌmo aposolo loloꞌ iline lo neleꞌmize molave Oꞌmoso aza gala gelavo lamineꞌ ogavo eze gamaziꞌve lamineꞌ nene do vo Zuda ve minama veti zuho ato atoꞌ nene vo lo-ngemeꞌmo moneline lo eiꞌ gipeleꞌmi monovo nene lo sotoꞌ ogo nelebizavo naza neꞌmi monovo nene imineꞌ mili li-nimilizave lo aꞌmine gamazi nemuꞌ eveneꞌ hamokisi ma lo gele ha gele amo 17 idoꞌ Zelusalemi ebeta olihe aposolo loloꞌ amuvo gomuꞌ mili aposolo liliꞌ igi minave engitasi nene vamuvoniꞌza naza liteꞌ lo eveneꞌ vaiꞌ minamaniꞌ misubo Alabia nela vo mino alingeꞌ nene Damasiko numuno ebeta tineꞌ molo vo minuvoniꞌ ve. Idoꞌ neꞌmine ogo evenekisi gamazi lo gele ha gele amuvoniꞌ nemuꞌ nene naza monoꞌ gamazi lo-lengemaaꞌ nouvoniꞌ nene evenetatiꞌ nomineꞌ ve. Asi Kilisitodatiꞌ neineꞌ neive li lingine gililizave losa nolo-lingimuve.
18 Idoꞌ tineꞌ molo Damasiko numuno ebeta vo hetelo mino kilisimasi seto hamo hulosa Petoloꞌni ningo gamazi lo-emo eze gamazi gelelove lo Zelusalemi ebeta dizo vo salele sitakisi gamene hamokisi nene ezesi makaꞌ minusive. 19 Neꞌmino minuvoniꞌza aposolo linge ma nene ningamo Guvelesi ve Izesuꞌ nakunolo minive Zakoboꞌnivoꞌ nene ninguve. 20 Idoꞌ naza aꞌmine me gamazi nogize-lingiduvoniꞌ nene gosohoꞌ nasahaꞌ lo-lengemamo Oꞌmosoꞌmi veleloꞌ laminetoꞌ monoꞌ gamazi lo-lengemaaꞌ nouvoniꞌ nene evenetatiꞌ gelamo Kilisitodatiꞌ giluvoniꞌ nene nolo-lingimuve. 21 Nelotiꞌ Zudaia misubouꞌ minamo gohi alingeꞌ nene Silia misuboukosi Kilikia misuboukosi vuvoniꞌ ve. 22 Vuvoniꞌza Zudaia misubouꞌ Kilisitoꞌ evenele mulise ato atoꞌ minaniꞌ ingine nene nenikumuꞌ ma ningi gilamaniꞌ ve. 23 Ee, ingine nene neniꞌ monovoꞌnemuꞌ nene veꞌinedunuꞌ ma ningami gaꞌinedunukovoꞌ nene eveneꞌ malite li-ngimikevo tiꞌ li gilaniꞌ ve: Leliꞌ monoꞌ gamazite osuꞌ lilive lo leliꞌ goboni molo-ledaaꞌ ive maꞌmo idise nene aꞌmine monoꞌ gamazi nene gamazi lamineꞌ ve lo lo-ngemeꞌmo nomonive. 24 Nemuꞌ nenikumuꞌ nene Oꞌmoso opoꞌni li minaniꞌ ve.