1 Neze zuhokizo, lingine ve malite lihime nidavo ningi ma nene Oꞌmosoꞌmi Sikalahuꞌ neꞌmo aka lengelebizidoꞌ lisiheꞌ gehepeve igi eꞌmeti vaaꞌ nave nete lingine nene amuzonga li-ngimami zou li lamini mini di hehe li-ngidi gohi ngeleꞌmize akaloꞌ ilo. Neꞌmine igi mini lengita lengemenguꞌ sotoꞌ o lengemelinguꞌ nene linginesi aꞌmineꞌmine igi lihime diisa limi ingikelizaze. Gizebo lamineꞌ igi minilo. 2 Idoꞌ geni initeliꞌmi lulouꞌ minii ma nene ge hize eleꞌ o-nede ne hize eleꞌ o-gede li minilo. Neꞌmine igi minilizaniꞌ nene Kilisitoꞌ lo huko lineꞌ louꞌ gamazi maloꞌ nene mo eꞌmeti osuꞌ lilisave. 3 Idoꞌ lengiꞌ okodidoꞌ gizebo lamineꞌ igi mini ge hize eleꞌ o-nede ne hize eleꞌ o-gede li minilo luvoniꞌ nene ve maliꞌmo eveneꞌ mukiꞌ minaniꞌ neꞌmino haza minelidotiꞌ nene aza eikumuꞌ gelavo eveneꞌ linge ngivileꞌ ogo dizo minelineꞌ nene eiꞌ luloꞌve golo izosa mo lemo ongalidoꞌ mineleseinako nemuꞌ nene luvoniꞌ ve. 4-5 Nemuꞌ nene Oꞌmosoꞌmo leliꞌ hamo hamoꞌ gonote limineꞌ nene daloningutiꞌ olovoꞌ amo hamo hamoꞌ mukitoꞌ leliꞌ gonote geheloneꞌ nenaze. Nemuꞌ nene lingine hamo hamoꞌ langisetine igi mili minaaꞌ naniꞌ monovotine nene lamineꞌ nolihe goloso nolihe izeꞌ mili ningiꞌ nalo. Idoꞌ ve ma gaza eveneꞌ maliti monovomuꞌ nene izeꞌ molo gele guno o-ngedamo asi geiꞌ monovokamukovoꞌ nene ningo gelanivo lamineꞌ o neivo ma nene aꞌminemuꞌ golize izo minelinidoꞌ o neive.

6 Idoꞌ monoꞌ gilaaꞌ naniꞌ aleve lingine aꞌmine monoꞌ apizi lingimaaꞌ nave nene lengitatiꞌ initeꞌ matatine lamineꞌ nevo ma nolingutiꞌ nene izeꞌ mili lingela ngimilo.

7 Lingine mo gili nizave. Minguꞌ initeꞌ zuhoꞌ ikevo neꞌmi gihileꞌve nene mo initeꞌ zuhoꞌ aniꞌ initeꞌ neꞌmine gehepeve izaaꞌ neineꞌ neꞌminisa lingine igi mili ilizaniꞌ monovo nene monovo lamineꞌ nolihe goloso nolihe alingeꞌ aꞌmineꞌmi gihileꞌve gehepeve nene lengita izeleseinako lingine initeꞌ amaaꞌ iliza initekumuꞌ nene leliꞌ luteloꞌ nene ha ogo molo Oꞌmoso golo izelone li gililizadiꞌmo lengiꞌ lutine nene golo izikelizave. Oꞌmoso nene golo ngeli izamilisave. 8 Ve ma ingine gomuꞌ ngemeni dameni golosoꞌmi monovoloꞌ igi mili ilizaniꞌ nene aꞌmine gomuꞌ ngemeni dameni golosoꞌmi gihileꞌve nene mudise vo ladise ogaꞌ nene dalisave. Neꞌmine ilisaha Oꞌmosoꞌmi Sikalahuꞌ neꞌmi emeni dameniloꞌ eꞌmeti igi mili minilizaniꞌ neꞌmi gihileꞌve nene aꞌmine Oꞌmosoꞌmi Sikalahutatiꞌ nene minevoꞌ minevoꞌ ogaꞌ ngemeni dameni nene dalisave. 9 Ee, laza monovo danava lamineꞌ ogo molo minakumuꞌ nene goseleꞌ lebelamivo aꞌmine monovo nene hulamo hazavoꞌ ogo molo mineloneꞌ nene Oꞌmosoꞌmo molaniꞌ gameneloꞌ aꞌmineꞌmi gihileꞌve nene do sotoꞌ molosoꞌ nenako nemuꞌ laza initeꞌ mataꞌ lamineꞌ nene ogo molo minelo ma goseleꞌ aseleꞌ amo amuzo molo ogo molo minelone. 10 Nemuꞌ nene neꞌmine ogo laza nene eveneꞌ do lamineꞌ o-ngedo nasahiliꞌ o-ngedelonidoꞌ o neivo ma nene laza eveneꞌ mukiꞌ nene neꞌmine o-ngedelone. Idoꞌ eveneꞌ neꞌmino do lamineꞌ o-ngedeloningutiꞌ linge nene Izesuꞌ evenele minikevo ma ingine nene leliꞌ zuho nizanako gomuꞌ nene engiꞌ do lamineꞌ o-ngedeloneꞌ aka do sotoꞌ ogo do lamineꞌ o-ngedelone.

11 Gamazi mene imineꞌ molo nogize-lingiduvoniꞌ mene naꞌniseꞌne neniꞌ aꞌnedunuꞌ nogize-lingiduze. Nabaꞌmine luhuvo nogizuvoniꞌ mene ningilo. 12 Aꞌmine gatine hizaaꞌ nave ingine okoꞌine losuvolotikovoꞌ igi mili igaꞌ naniꞌ initeꞌ nene di sotoꞌ ikevo neꞌmo Izesungumuꞌ gili eleꞌvoleꞌ amaniꞌ Zuda vete engikumuꞌ gilikevo lamineꞌ ilive li gili lengikumuꞌ nene okodine lolovo huki hulilizave li gatine hizaaꞌ naniꞌ nene aꞌmine gatine hizaaꞌ nave nene Zuda vete goboni mili-lidikelizave li giladiꞌmo nene neꞌmine igaꞌ nave. Ee, Kilisitoꞌ aza leliꞌ lihimetemuꞌ hilineꞌ nenako nemuꞌ laza okode lolovo huko hulakumuꞌ nene gele hulo eikumuꞌ gele eleꞌvoleꞌ okunivo neꞌmo Oꞌmosoꞌmo do luꞌ izeleseive lo Kilisitoꞌ evenele laza neꞌmine laaꞌ nouneꞌ nemuꞌ Zuda vete goboni malaꞌ malaꞌ i-lidaaꞌ naniꞌ nenako nemuꞌ gili neꞌmine i-lidikelizave li ingine gatine hizi okodine lolovo huki hulilizave li li-lingidaaꞌ nave. 13 Idoꞌ okoꞌine lolovo hukave ingine nesi nene Moseꞌ louꞌ gamazi linge maloꞌ nene gili di osuꞌ lamaniꞌza aꞌmine ve ingine nene linginesi okodine lolovo huki huli lelita igi giꞌmizi minikevo neꞌmo nene leliꞌ guvete vilive lisa engiꞌ okoꞌine di dizilisa nene lengiꞌ gatine hizi okodine lolovo huki hulilizave li li-lingidaaꞌ nave. 14 Ingine neꞌmine igaꞌ naha neniꞌ nene initeꞌ mamukisi okoꞌne ma do dizesaꞌmuve. Asi Guvetesi ve Izesuꞌ Kilisitoꞌ do luꞌ izelesa lohotoꞌ zaloꞌ hilineꞌ nemukovoꞌ nene do naba ogo minaaꞌ nouve. Kilisitoꞌ lohotoꞌ zaloꞌ hilineꞌ neꞌmo naza me misubouꞌ monovote goloso okode losuvolotiꞌ nene eveneꞌ lamineꞌ none lo okode do dizaaꞌ monovo goloso nevoꞌmine nene mudise hulosa aꞌmine monovomuꞌ giluvo mo hele osuꞌ laniꞌ nenako neniꞌ luꞌneuꞌ nene gohi ma minevoꞌ dovoꞌ amilidoꞌ neive. Idoꞌ Kilisitoꞌ lohotoꞌ zaloꞌ hilinguꞌ nene nazasi hiluvoniꞌ gelavo aꞌmine me misubouꞌ monovo goloso neꞌmo neniꞌ luꞌne nene gohi ma do ote-nedamilidoꞌ o neive. 15 Laza nene okode lolovo huko hulosa noneꞌ nolihe huko hulamo noneꞌ nolihe neꞌmo initeꞌ gihile aꞌminguꞌ ma nomive. Asi gosohoꞌ lemeni dameni lamineꞌ do otuho minaaꞌ neꞌmo nene initeꞌ gihile neive. Nemuꞌ nene naza okoꞌne losuvolotiꞌ nene eveneꞌ lamineꞌ nouve lo okoꞌne do dizamo Kilisitoꞌ lohotoꞌ zaloꞌ hilineꞌ nemukovoꞌ nene do naba ogo minaaꞌ nouve. 16 Idoꞌ nemuꞌ nene aꞌmine noluvoniꞌ gamaziloꞌ nene eꞌmeti igi mili minilizave nene lengita Oꞌmosolatiꞌ hongu nesi idoꞌ mangi gatulo nesi nene mino Isilaeleꞌ zuho gihile Oꞌmosoꞌmi evenele mukitasi nene mine do vo miniliho lo noluve.

17 Gamazi nene mo osuꞌ nolivo naza tiꞌ lo noluve: Izesuꞌnimuꞌ gele eleꞌvoleꞌ uvoniꞌ nemuꞌ goboni mili-nidi neniꞌ okoꞌneloꞌ nibilaniꞌ huꞌne nene Izesuꞌ eiꞌ nosoꞌve neꞌmino asiꞌve molo-nedavo nouvoniꞌ nenako nemuꞌ nene gohi lihiteheꞌ initeꞌ igi geni nebeleli akaloꞌ neleꞌmize milalizave lo gelamuve. 18 Idoꞌ neze zuhokizo, leliꞌ Guvetesi ve Izesuꞌ Kilisitoꞌ do lamineꞌ o-ledaaꞌ neineꞌ monovoꞌve lamineꞌ neꞌmo lutinguꞌ mine do vo minivo. Neꞌmino miniliho. Moda ve.