IZESUꞌ KILISITOꞌNIMUꞌ GAMAZI LAMINEꞌ MATAIOꞌ GIZINEꞌ
Mataioꞌ Gizineꞌ Luhuvo Nitekumuꞌ Gomuꞌ Gataaꞌ Gamazi
Mene buku neꞌmo nene Izesuꞌ Kilisitoꞌ monovo danavaꞌvemuꞌ lo sotoꞌ ogo nolo-limive. Eiꞌ Izesuꞌ avolomote zuholiti guliveꞌinesi lo sotoꞌ neive. Eiꞌ nene ebeꞌ zala sotoꞌ ihe idoꞌ nadiꞌ ogo sotoꞌ ihe nemukisi lo sotoꞌ neive. Monoꞌ noso holo-ngedaaꞌ ive Zohaneꞌ neꞌmo ogo Izesuꞌni nadiꞌ ogo aka vele-dihe nemukisi lo sotoꞌ neive. Idoꞌ Sataniꞌmo Izesuꞌni do nadiꞌ ogo emenguꞌ molahe nemukisi lo neive. Izesuꞌ izipahala zuho tuveluꞌa nene nadiꞌ ogo ngeleꞌmize molahe nemukisi lo neive. Idoꞌ eveneꞌ monoꞌ gamazi nadiꞌ ogo apize ngimihe idoꞌ siki gizi daniꞌ aleve nene do nadiꞌ ogo do lamineꞌ o-ngidihe nemukisi lo sotoꞌ neive. Aneza gamazi eveneꞌ lo-ngimingumukisi idoꞌ monovoꞌve mukikumukisi lo sotoꞌ neive. Idoꞌ Zuda ve nabalite Izesuꞌ monoꞌ gamazi eveneꞌ apize ngimidoꞌ meheꞌine imangumukisi idoꞌ eikumuꞌ gili goloso angumukisi lo sotoꞌ neive. Idoꞌ lovo velite aꞌninguꞌ Zudaꞌ Izesuꞌni molalingumuꞌ nadii gamazi li hukahe nemukisi loosa idoꞌ Lomavelite bili hililizangumuꞌ nadiꞌ igi ngeleꞌmizahe nemukisi lo neive. Helosa gohi nado otihe idoꞌ aposoloꞌve zuho nado ngeletavo numudoꞌ namadoꞌ ve moni monoꞌ gamazi lamineꞌ li-ngimahe nemukisi lo neive.
Mene buku gizive nene gulive ma sainimi amineꞌ ve. Neꞌmino sainimi amineꞌ neineꞌza gamene galaꞌmudatiꞌ vomine eveneꞌ nete aꞌmine buku nene aposolo Mataioꞌ gizineꞌ ve laniꞌ ve. Mataioꞌ aza Zuda ve minineꞌ. Idoꞌ Mataioꞌ aza gulive gohi ma nene Leviꞌ minineꞌ. Neꞌmine ogo tauni gulive Kahanaumi ve lo mininguꞌ nene ongo mono minineꞌ. Idoꞌ Izesuꞌ aza Mataioꞌni olihe izipahaꞌne zuho loloꞌ ilive lo asi lo-emamivo minineꞌ gamenela nene Lomavelite ngamaniloꞌ gono do Zuda aleve takisi moni do-ngedaaꞌ ineꞌ. Idoꞌ Izesuꞌ Okulumokuko dizo vidotiꞌ nene Mataioꞌ aza Zuda aleveliti ebekuꞌ kilisimasi vaiꞌ mino monoꞌ gamazi lo-ngemo minineꞌ ve li evenelite laniꞌza alingeꞌ nene ebeꞌ atoꞌ atota mono monoꞌ gamazi lo-ngemelesa vineꞌ. Idoꞌ Mataioꞌ buku mene gizineꞌ nene Oꞌmosoꞌmo lo huko-ngedo Guvetinesi ve naba dizo minelive ma imiselelesuve lo live nene Izesuꞌ neive lo Zuda ve ngelebizelesa gizineꞌ ve. Adoꞌ Izesuꞌ ogo molo minineꞌ initekisi idoꞌ initeꞌ eita sotoꞌ ineꞌ nesi nene gozopoꞌ polohetelite Guvelesi ve naba alingumuꞌ gizaniꞌ gamazi nene do gihile izingumuꞌ ngelebizo gizineꞌ ve.
1
Mataioꞌ Izesuꞌ Avolomoti Guliveꞌine Gizineꞌ
(Lukaꞌ 3:23-38)
1 Izesuꞌ Kilisitoꞌ avolomote mini di aniꞌ neti guliveꞌine nene neꞌmino neive:
Guvelesi ve Davidiꞌ aza Abalahamuꞌ aꞌvo minineꞌ.
Idoꞌ Izesuꞌ Kilisitoꞌ aza Abalahamungi Davidingi ngaꞌvo minineꞌ. 2 Abalahamuꞌ nene Isakaꞌni gidineꞌ.
Idoꞌ Isakaꞌ minosa Zakoboꞌni gidineꞌ.
Idoꞌ Zakoboꞌ minosa Zudaꞌnisi uvolomotine nakunolomotine nesi gidineꞌ.
3 Idoꞌ Zudaꞌ nene Tamalaꞌni do Pelezangi Zelangi gidineꞌ.
Idoꞌ Pelezaꞌ nene Hezeloniꞌni gidineꞌ.
Idoꞌ Hezeloniꞌ minosa Lamuꞌni gidineꞌ.
4 Idoꞌ Lamuꞌ minosa Aminadabuꞌni gidineꞌ.
Idoꞌ Aminadabuꞌ minosa Nasoniꞌni gidineꞌ.
Idoꞌ Nasoniꞌ minosa Salemoneꞌni gidineꞌ.
5 Idoꞌ Salemoneꞌ minosa Lahabaꞌni do Boaziꞌni gidineꞌ.
Idoꞌ Boaziꞌ aza Lutiꞌni do Obediꞌni gidineꞌ.
Idoꞌ Obediꞌ aza Zesaiꞌ meleho minineꞌ.
6 Idoꞌ Zesaiꞌ minosa guvelesi ve naba Davidiꞌni gidineꞌ.
Idoꞌ Davidiꞌ nene veneꞌ gonoꞌ ma Uliaꞌ elenahine do Solomoniꞌni gidineꞌ.
7 Idoꞌ Solomoniꞌ nene Lehoboamuꞌ meleho minineꞌ.
Idoꞌ Lehoboamuꞌ minosa Abiaꞌni gidineꞌ.
Idoꞌ Abiaꞌ nene Asaꞌ meleho minineꞌ.
8 Idoꞌ Asaꞌ nene Zehosohatiꞌni gidineꞌ.
Idoꞌ Zehosohatiꞌ nene Zolamuꞌ meleho minineꞌ.
Idoꞌ Zolamuꞌ nene Uziaꞌ avoloho minineꞌ.
9 Idoꞌ Uziaꞌ nene Zotamuꞌ meleho minineꞌ.
Idoꞌ Zotamuꞌ minosa Ahaziꞌni gidineꞌ.
Idoꞌ Ahaziꞌ nene Hezekiaꞌ meleho minineꞌ.
10 Idoꞌ Hezekiaꞌ minosa Manaseꞌni gidineꞌ.
Idoꞌ Manaseꞌ nene Amoniꞌ meleho minineꞌ.
Idoꞌ Amoniꞌ minosa Zosiaꞌni gidineꞌ.
11 Idoꞌ Babelonia ve nete igi lovo hizi ngimi Zuda ve ngivileꞌ igi ngeleꞌmizi Babelonia misubouko vaniꞌ gameneuꞌ nene Zekoniaꞌ ve uvele mele nene Zosiadatiꞌ sotoꞌ igi minaniꞌ.
12 Idoꞌ Babelonia misubouko vi mini adotiꞌ Zekoniaꞌ nene Sealetieleꞌni gidineꞌ.
Idoꞌ Sealetieleꞌ nene Zelubabeliꞌ meleho minineꞌ. 13 Idoꞌ Zelubabeliꞌ sotoꞌ ogo minavo ezelatiꞌ nene Abiudiꞌ sotoꞌ ineꞌ.
Idoꞌ Abiudiꞌ sotoꞌ ogo minavo ezelatiꞌ nene Eliakimiꞌ sotoꞌ ineꞌ.
Idoꞌ Eliakimiꞌ sotoꞌ ogo minavo ezelatiꞌ nene Azoloꞌ sotoꞌ ineꞌ.
14 Idoꞌ Azoloꞌ sotoꞌ ogo minavo ezelatiꞌ nene Zadokuꞌ sotoꞌ ogo minineꞌ.
Idoꞌ Zadokuꞌ sotoꞌ ogo minavo ezelatiꞌ nene Akimiꞌ sotoꞌ ineꞌ.
Idoꞌ Akimidotiꞌ nene Eliudiꞌ sotoꞌ ogo minineꞌ.
15 Idoꞌ Eliudiꞌ sotoꞌ ogo minavo ezelatiꞌ nene Eleazaleꞌ sotoꞌ ineꞌ.
Idoꞌ Eleazaleꞌ sotoꞌ ogo minidotiꞌ nene Mataniꞌ sotoꞌ ineꞌ.
Idoꞌ Mataniꞌ sotoꞌ ogo minavo ezelatiꞌ nene Zakoboꞌ sotoꞌ ineꞌ.
16 Idoꞌ Zakoboꞌ nene Zoseheꞌ meleho minineꞌ.
Idoꞌ Zoseheꞌ nene Izesuꞌ izeleho Maliaꞌ neꞌmi vanaho minineꞌ. Aꞌmine ve Izesuꞌnimuꞌ nene Oꞌmosoꞌmo leliꞌ do luꞌ izelive lo imiselelesa live ve lo laaꞌ noune.
17 Eveneꞌ guliveꞌine neꞌmino gizuneꞌ nene Abalahamuꞌ gulivelotiꞌ vo Davidiꞌ guliveloꞌ ivo nene guliveꞌine fotini (14) neꞌmine gizune. Idoꞌ Davidiꞌ gulivelotiꞌ Babelonia ve nete Zuda ve ngeleꞌmizi Babelonia misubouko vaniꞌ gizunida nene eveneꞌ guliveꞌine gohi fotini (14) neꞌmine nene gizune. Idoꞌ Babelonia misubouko vi mini tineꞌ mili aniꞌ gizunidotiꞌ vo Oꞌmosoꞌmo do luꞌ izelive lo imiselelesa live neꞌmi guliveloꞌ ivo nene guliveꞌine gohi fotini (14) neꞌmine nene gizune.
Oꞌmosoꞌmo Do Luꞌ Izelive Lo Imiselelesa Live Izesuꞌni Nene Maliaꞌ Gidineꞌ
(Lukaꞌ 2:1-7)
18 Oꞌmosoꞌmo do luꞌ izelive lo Imiselelesa live Izesuꞌ sotoꞌ ineꞌ monovo nene neꞌmino neive: Izesuꞌ izeleho Maliaꞌ nene Zoseheꞌ izeni elenaho minineꞌza olihe bizi minamasivo Oꞌmosoꞌmi Sikalahuꞌ neꞌmo Maliaꞌ mulunouꞌ lemo mino izipe molo imineꞌ. 19 Neꞌmine ogavo vanaho Zoseheꞌ aza aꞌminemuꞌ ningo gelo ve lisiheꞌ minineꞌ nenako nemuꞌ Maliaꞌni nene eveneꞌ mukilite nigilavo hulo-deloniꞌ nene ovozo helalive lo gelo zegeno haleko hulo-delove lo gilineꞌ. 20 Idoꞌ neꞌmino gala geleꞌmo nomonivo Guvelesi veꞌmi angeloꞌ maliꞌmo vamutoꞌ sotoꞌ o emo tiꞌ lo lo-imineꞌ: Zoseheꞌ gaza guvelesi ve Davidiꞌ aꞌvo make, veneka Maliaꞌni nene dalohe hulo-delohe lo gaka gopo nogelaineꞌ nene gelamozo. Izipahala nominineꞌ nene Oꞌmosoꞌmi Sikalahuliꞌmidatiꞌ nenako ne ha dalosane. 21 Neꞌmine oganivo gipe ma gedeleseive. Neꞌmine ogavo gulive Izesuꞌ ve lo molalosane. Aꞌmine gulive neꞌmi monovo nene do luꞌ izelive ve. Idoꞌ eze evenele zuho neti lihimeꞌine hulo-ngedo do nguꞌ izelineꞌ nenako nemuꞌ guliveꞌve nene Izesuꞌ ve lo molalosane. 22 Initeꞌ mukiꞌ neꞌmino sotoꞌ ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete maliꞌmo Guvelesi veꞌmo lineꞌ gamazi ma lo-ngimineꞌ nene gihile izelive losa sotoꞌ ineꞌ. Idoꞌ aꞌmine Guvelesi veꞌmo lineꞌ gamazi nene neꞌmino neive:
23 Zaha ningamineꞌ alu maliꞌmo izipahala mino gipele gedelineꞌ nene guliveꞌve Emanueliꞌ ve li milalisave. Aꞌmine gulive Emanueliꞌ neꞌmi monovo di velepeꞌ izaniꞌ nene neꞌmino neive: Oꞌmoso lelikisi neive.
24 Idoꞌ neꞌmine ogavo Zoseheꞌ aza okisetiꞌ otosa angeloꞌ lidoꞌ nene gele do elenahine Maliaꞌni nene eleꞌmize numuꞌveuꞌ molaniꞌza 25 okoꞌnoloꞌ damivo gipele ma gedavo gulive Izesuꞌ ve lo molaniꞌ.