IZESUꞌ KILISITOꞌNIMUꞌ GAMAZI LAMINEꞌ MALEKOꞌ GIZINEꞌ
Malekoꞌ Gizineꞌ Luhuvo Nitekumuꞌ Gomuꞌ Gataaꞌ Gamazi
Mene buku neꞌmo nene Izesuꞌ Kilisitoꞌ monovo danavaꞌvemuꞌ lo sotoꞌ neive. Izesuꞌ sotoꞌ ineꞌ gamenelotiꞌ apiꞌ ogo lo sotoꞌ amineꞌza asi monoꞌ noso holo-ngedaaꞌ ive Zohaneꞌ aza apiꞌ ogo eveneꞌ monoꞌ gamazi lo-ngemo alingumuꞌ aka vele-didotiꞌ nene apiꞌ ogo gize neive. Idoꞌ aza initeꞌ mukiꞌ ogo molo ingumukisi idoꞌ eveneꞌ apize ngimineꞌ initeꞌ malatikisi nene lo sotoꞌ ineꞌza Mataioꞌ nehe Lukaꞌ nehe Zohaneꞌ nehe nete li sotoꞌ aniꞌ neꞌmino vaiꞌ ma lo sotoꞌ amive. Zuda ve nabalite Izesuꞌni ningi goseleꞌ angumukisi lo sotoꞌ ogo idoꞌ alingeꞌ nene engiꞌ ebeꞌningutiꞌ Lomaveti ngamaniloꞌ gizebo ve naba nete bililizave li nadii li-ngidahe nemukisi lo neive. Idoꞌ helavo gamene seto hamo ogo vavo Oꞌmosoꞌmo nado do ote-dihe nemukisi lo neive.
Mene buku gizive nene gulive ma sainimi amineꞌ neineꞌza gamene galaꞌmudatiꞌ vomine eveneꞌ nete aꞌmine buku nene Malekoꞌ gizineꞌ ve laniꞌ ve. Monoꞌ noso holo-ngedaaꞌ ive Zohaneki idoꞌ aposolo Zohaneki guliveꞌine neꞌmino Malekoꞌ gulive gohi ma nene Zohaneꞌ minineꞌ ve. Idoꞌ eze izelehi gulive nene Maliaꞌ minineꞌ. Idoꞌ aꞌmine izelehi numuꞌve nene Zelusalemila minineꞌ (Aposolo 12:12). Idoꞌ Banabasiki Malekoki ingine hamoꞌ zuho minasineꞌ ve. (Kolosa 4:10) Idoꞌ eveneꞌ ma nete gilaniꞌ nene Izesuꞌni analoꞌ dave nete ve gosoꞌve ma nesi analoꞌ dalisa navo bakaꞌ mino golise lotiꞌ izo vive nene eiꞌ Malekoꞌ minineꞌ noloseive li gilaniꞌ (Malekoꞌ 14:51-52). Ganaꞌ apiꞌ igi monoꞌ gamazi lamineꞌ lilisa ebeꞌ mala vadaa nene Malekoꞌ aza Paulole Banabasilesi makaꞌ vaniꞌ. Makaꞌ vaniꞌza aza gonoꞌine nene olihe osuꞌ lamidoꞌ hulo-ngedo numuꞌvela tibizo vineꞌ. Neꞌmine ogavo Pauloꞌ aza gohi gamene ma eleꞌmizo volosa gelamineꞌ. Banabasiꞌ eleꞌmizo volosa gilinekisi Pauloꞌ aza eleꞌmizo volosa gelamineꞌ. Neꞌmine igi lolize gamazi lasidiꞌmo Pauloki Banabasiki ingine hoꞌlii mini eza ema asineꞌ (Aposolo 13:5-13, 15:37-39). Pauloꞌ aza Silasiꞌni eleꞌmizo Siliala vi Kilikia nivasingumuꞌ Malekoꞌ aza Banabasikisi Kipilo ailanila vasineꞌ.
Alingeꞌ nene Malekoꞌ aza Paulokisi monisa aꞌmidotiꞌ nene Petolokisi monasineꞌ (Kol 4:10, Hilemoniꞌ 24, 2 Timoteoꞌ 4:11, 1 Petoloꞌ 5:11). Gamene galaꞌmudatiꞌ vomine eveneꞌ nete tiꞌ li laniꞌ: Malekoꞌ aza Petolokisi bizi monaaꞌ asive mino Izesuꞌ gamazi lineꞌ idoꞌ initeꞌ ogo molo ingumuꞌ Petoloꞌ laaꞌ ineꞌ gamazi nene gizineꞌ ve laniꞌ.
Mene buku nene Zuda ve minamaniꞌ heta atoꞌ vemuꞌ Malekoꞌ gize-ngidive lo mo sotoꞌ o neive. Nanitekumuꞌ, aza nene Zuda veliti gamaziꞌinemukisi monovoꞌinemukisi neꞌmino neive lo laaꞌ ive minineꞌ ve. Eveneꞌ mukiꞌ nete gilaniꞌ nene Malekoꞌ aza Loma vetinguꞌ mino aꞌminguꞌ Izesuꞌ evenele zuho minaniꞌ nene Izesuꞌ amuzoꞌve ngelebizelesamuꞌ gizineꞌ ve laniꞌ.
1
Monoꞌ Noso Holo-ngedaaꞌ Ive Zohaneꞌ Monoꞌ Gamazi Lo-ngimineꞌ
(Mataioꞌ 3:1-12; Lukaꞌ 3:1-18; Zohaneꞌ 1:19-28)
1 Oꞌmosoꞌmi gipele Izesuꞌ Kilisitoꞌ ezemuꞌ gamazi lamineꞌ nene ganaꞌ apiꞌ ogo sotoꞌ ineꞌ ma tiꞌ lo neive: 2 Oꞌmosoꞌmi gamazi lo sotoꞌ o-ngemaaꞌ ive polohete ma gulive Isaiaꞌ aza luhuvo ma gizinguꞌ Oꞌmosoꞌmo guvelesi vemuꞌ gamazi lo-imineꞌ nene tiꞌ lo gize neive:
Gelezo. Naza neze gamazi lo-ngeme ngemeꞌ ilive imiselekuvo
aza do gomuꞌ molo akaka vele-gedeleseive.
3 Ebeꞌ hadivelatiꞌ ve maliꞌmo asi naba ma tiꞌ lo nolive:
Guvelesi ve alingumuꞌ ve li akaꞌve di vaꞌvaꞌ igi di lisiheꞌ i-dilo.
4 Aꞌmine neꞌmine lidoꞌ eꞌmeto eveneꞌ monoꞌ noso holo-ngedaaꞌ ive Zohaneꞌ aza misubo hadiveuꞌ vo sotoꞌ ogo eveneꞌ tiꞌ lo lo-ngimineꞌ: Oꞌmosoꞌmo lengiꞌ lihimetine hulo-lengedelingumuꞌ ve li lutine di velepeꞌ izi monoꞌ noso hilalo lo lo-ngeme ngemeꞌ ogo minineꞌ. 5 Minavo Zudaia misubokotikisi Zelusalemi numungutikisi eveneꞌ mukiꞌ ezela vi heteli lihimeꞌine li sotoꞌ ikevo Zodani nosouꞌ noso holo-ngidineꞌ. 6 Zohaneꞌ aza kamela ize zopovodunuꞌ liliꞌ aniꞌ geneganaꞌve izo ize losuvodunuꞌ liliꞌ aniꞌ leti ma gopololoꞌ izineꞌ. Idoꞌ nosoꞌ niteꞌve naaꞌ ineꞌ nene maꞌnabuso idoꞌ himoni novozo nesi no minaaꞌ ineꞌ. 7 No mino eveneꞌ tiꞌ lo lo sotoꞌ ogo lo-ngeme ngemeꞌ ogo minineꞌ: Eveneꞌ meheꞌnela alingeꞌ ma nave nene nezesi nivileꞌ o-nedosa ve naba ve. Naza aꞌneꞌmineꞌmine goboni gono do-do eiꞌ suuꞌvelotiꞌ nalaꞌve nesi nene gubiꞌ izo apase hulo-delodoꞌ nene mo lisiheꞌ amuve. 8 Naza noso holo-lingiduvoniꞌ nene haza nosotunuꞌ holo-lingiduve. Ne neiha aꞌmine ve neꞌmo noso neꞌmine holo-lengedelineꞌ nene Oꞌmosoꞌmi Sikalahukisi ne neive.
Zohaneꞌ Noso Holo-davo Sataniꞌmo Izesuꞌni Emenguꞌ Molaniꞌ Gamazi
(Mataioꞌ 3:13–4:11; Lukaꞌ 3:21-22; 4:1-13)
9 Aꞌmine gamene neuꞌ Izesuꞌ aza nGalilaia misubouꞌ numuno ngomo ma Nasalete nene hulo vo hetelavo Zohaneꞌ aza Zodani nosouꞌ holo-dineꞌ. 10 Holo-davo nosoutiꞌ dizosa aꞌmidoꞌ ningineꞌ nene okulumoꞌ ne ngoloꞌ lavo Sikalahuꞌ neꞌmo nama viluso neꞌmino lulouꞌ dizelesa nolimivo ningineꞌ. 11 Neꞌmine ogavo Okulumokutiꞌ gamazi tiꞌ lo limineꞌ: Gaza nene voꞌneloꞌ gipeꞌne hamoꞌ nene nane. Gezemuꞌ nene mo muluꞌneuꞌ lamineꞌ nogiluve.
12 Idoꞌ nelotiꞌ geto Sikalahuliꞌmo Izesuꞌni nene hadive misubouꞌ imiselavo vineꞌ. 13 Vavo aꞌmida nene Sataniꞌmo emenguꞌ moloꞌmo novivo gamene foti (40) vineꞌ. Idoꞌ aꞌmida nene Izesuꞌ aza loposo nama gaha minaaꞌ ada neivo angeloꞌ nete nasahiliꞌ i-dii hize eleꞌ i-di minaniꞌ ve.
Izesuꞌ Aza Gonoꞌve Apiꞌ Ogo Do Alahaꞌ Daaꞌ Ave Setaꞌve Setaꞌve Eiꞌ Eꞌmetilizave Lo Asi Lo-ngedo Do Giꞌmizineꞌ
(Mataioꞌ 4:12-22; Lukaꞌ 4:14-15; 5:1-11)
14 Idoꞌ Zohaneꞌni nalatoꞌ huli-dikevo neivo Izesuꞌ aza nGalilaia misubouꞌ vo Oꞌmosoꞌmi gamazi lamineꞌ lo sotoꞌ ogo tiꞌ lo lo-ngimineꞌ: 15 Gamene nene mo ogave. Oꞌmosoꞌmo gizebo o-ledelineꞌ gamene alitave. Nemuꞌ nene lingine lutine di velepeꞌ izi gamazi lamineꞌ mene gili eleꞌvoleꞌ ilo lo lo-ngimineꞌ.
16 Idoꞌ Izesuꞌ aza nGalilaia noso ohuno nabaꞌmi gahevela nomono Simoniki nakunolo Adeleaki ingine alahaꞌ daaꞌ asive minasinako alahaꞌ daaꞌ asineꞌ golalezeꞌine nene alahaꞌ dalisa nosouꞌ nihulasivo ningineꞌ. 17 Ningo tiꞌ lo lo-ngimineꞌ: Lingine igi neꞌmetilizo. Alahaꞌ daaꞌ nasineꞌ neꞌmini eveneꞌ di nenita igaꞌ ilisive lo lengeleꞌmize molaloze. 18 Neꞌmine lavo ingine liteꞌ li alahaꞌ daaꞌ asineꞌ golalezeꞌine hitiki eꞌmeti vasineꞌ.
19 Ve sitaꞌ nene do giꞌmizo ngomo ma novo aza Zebedaioꞌ gipele sitaꞌ Zakoboki nakunolo Zohaneki sipiuꞌ mini alahaꞌ daaꞌ aniꞌ golalezeꞌine nene ongoti di lamineꞌ nasivo ningo 20 asi lo-ngemavo gili meꞌnibo Zebedaioꞌnisi agoveꞌvesi sipiuꞌ huli-ngimiki eꞌmeti vasineꞌ.
Sikalahuꞌ Goloso Lulouꞌ Minive Izesuꞌ Do Lamineꞌ O-dineꞌ
(Lukaꞌ 4:31-37)
21 Ingine vi Kahanaumi numunguꞌ mini holiseꞌ gamene naba ogavo monoꞌ numunguꞌ dizi Izesuꞌ monoꞌ gamazi apize ngimineꞌ. 22 Idoꞌ apize ngimineꞌ gamazimuꞌ nene voꞌine vavo upuhoꞌ aniꞌ. Ee, aza monoꞌ apize ngimineꞌ nene avoꞌningeliti monoꞌ gamazi apizi ngimaaꞌ avete apizi ngimaaꞌ aniꞌ neꞌmino apize ngemamo asi gamazi meleho neꞌmineꞌmo apize ngimineꞌ gelavo nemuꞌ voꞌine vavo upuhoꞌ aniꞌ ve.
23 Neꞌmine nilavo aꞌmine monoꞌ numuꞌninguꞌ nene ve ma minineꞌ. Aꞌmine veꞌmi lulouꞌ nene eveneliti luteuꞌ do goloso ogaꞌ ive Satanilatiꞌ sikalahuꞌ nene minavo aza gekeꞌ lo tiꞌ lo lineꞌ: 24 Nasalete ve Izesuvo, leliꞌ nonida mene nanimuꞌ ane. Gaza do goloso o-ledelesa abe. Geze nene naza mo ningo gele nouve ma nene nane. Gaza nene Oꞌmosolatiꞌ kegeso lamineꞌ minanive ma nene nane. 25 Neꞌmine lineꞌza Izesuꞌ aza elemo tiꞌ lo lo-imineꞌ: Gamazi lamo zegeneꞌ oko mino eveneꞌ hulo-do lemo ogo vozo. 26 Neꞌmine lavo aꞌmine sikalahuꞌ goloso nene vauve elo eveneꞌ do upuhoꞌ ogo do gesevase ize-do gekeꞌ naba lo luloutiꞌ lemo vineꞌ. 27 Neꞌmine ogo lemo vavo eveneꞌ ingine ningi upuhoꞌ igi angise okoꞌninguꞌ longoꞌ i huli voleloꞌ meloꞌ igi tiꞌ li laniꞌ: Mene nani suno ve. Ve mene amuzo ve mino sikalahuꞌ goloso gamazi lo-ngemavo gamaziꞌve gili daaꞌ nave li li voleloꞌ meloꞌ aniꞌ. 28 Neꞌmine ikevo guvele nene hutileꞌ ogo nGalilaia misubouꞌ numudoꞌ namadoꞌ mone osuꞌ lineꞌ.
Petoloꞌ Elenahi Izelehine Izesuꞌ Do Lamineꞌ O-do Initeꞌ Gizi Dave Mukiꞌ Do Lamineꞌ O-ngidineꞌ
(Mataioꞌ 8:14-17; Lukaꞌ 4:38-41)
29 Neꞌmine ogavo monoꞌ numungutiꞌ limi Simoniki Adeleaki numuꞌninguꞌ Zakobole Zohanelesi dizaniꞌ. 30 Simoniꞌ elenahi izeleho nene okoꞌnoloꞌ oloꞌ ahuꞌ lavo ongo neivo nemuꞌ Izesuꞌni geti li-imaniꞌ. 31 Li-imikevo aza neida vo analoꞌ do do ote-davo okoꞌnoloꞌ oloꞌ ahuꞌ lineꞌ niteꞌ nene aꞌmidoꞌ geto hulo-davo lamineꞌ gelo nosoꞌ niteꞌ gize vataꞌ o-ngedo nasahiliꞌ o-ngidineꞌ.
32 Idoꞌ nivengaꞌ hoꞌ lemavo initeꞌ gizi davesi luꞌninguꞌ sikalahuꞌ goloso minivesi mukiꞌ ezela ngeleꞌmizi di ikaꞌ ikaꞌ aniꞌ. 33 Aꞌmine numudotiꞌ aleve mukiꞌ nene igi gatedoꞌ di geseꞌ aniꞌ. 34 Neꞌmine ikevo aza initeꞌ ato atoliꞌmine gizi dave mukiꞌ do lamineꞌ o-ngedo sikalahuꞌ goloso mukiꞌ eveneꞌ maliti luꞌningutiꞌ ngimiselo do hulineꞌ. Idoꞌ Sikalahuꞌ goloso ingine eze ningi lamineꞌ igi gili nizaniꞌ nenako gamazi lamilo lo lo-ngemo ngimiselo do hulineꞌ ve.
Izesuꞌ Monoꞌ Lo-ngeme ngemeꞌ Ogo nGalilaia Misubouko Moneꞌmo Vineꞌ
(Lukaꞌ 4:42-44)
35 Nedengaꞌ goꞌ olihe lamivo Izesuꞌ aza oto guviseuꞌ eveneꞌ nizamanguꞌ vo Oꞌmosola lo minineꞌ. 36 Tiꞌ neivo Simoniꞌ nene gonolomotesi ingine viseꞌ iꞌmi vaniꞌ. 37 Ningi tiꞌ li li-imaniꞌ: Eveneꞌ mukiꞌ gezemuꞌ viseꞌ nave. 38 Li-imikevo aza tiꞌ lo lo-ngimineꞌ: Naza monoꞌ lo sotoꞌ ogo lo-ngemelongisi numuno ebeꞌ avitoꞌ minaniꞌ nela vukeleꞌzo. Naza nene mo neꞌmine olove losa uvoniꞌ ve lo lo-ngimineꞌ. 39 Neꞌmine lo aza mono monoꞌ numuꞌninguꞌ monoꞌ lo sotoꞌ o-ngemeꞌmo vo idoꞌ sikalahuꞌ goloso eveneꞌ maliti luꞌninguꞌ dizi minaniꞌ nene ngimiselo huloꞌmo vo nGalilaia misubouꞌ minaniꞌ ebeꞌ mukikuꞌ nene mone osuꞌ lineꞌ.
Izesuꞌ Aza Ganadise Gize Dave Ma Do Lamineꞌ O-dineꞌ
(Mataioꞌ 8:1-4; Lukaꞌ 5:12-16)
40 Idoꞌ ganadise gize dave maliꞌmo ezela ogosa obuvolo hize emo amuzonga lo tiꞌ lo lo-imineꞌ: Gaza do lamineꞌ o-nedelineꞌ amuzokasi naineꞌ nene naza mo gele mino do lamineꞌ o-nedeline lo gele nouve. Gaza do lamineꞌ o-nedelesa gele nabe. 41 Neꞌmine lavo Izesuꞌ muluno hukavo ganadise gizi dave i-ngidisaꞌmaniꞌ initeꞌ o-do ana hulo molo okoꞌnoloꞌ hito tiꞌ lo lo-imineꞌ: Naza do lamineꞌ o-gedelesa gele nouve. Nemuꞌ gaza lamineꞌ ozo. 42 Neꞌmine lavo ganadise neꞌmo liteꞌ lo okoꞌnolotiꞌ hulo-do vavo lamineꞌ gilineꞌ. 43 Lamineꞌ gelavo Izesuꞌ aza geto gamazi amuzo molo lo-emo imiselo nohulo tiꞌ lo lineꞌ: 44 Gele nabe. Gaza lamineꞌ aineꞌ monovo nene eveneꞌ hamokisi lo-ngemamozo. Evenetoꞌ medelo mino Oꞌmoso initeꞌ lehize-daaꞌ ive neꞌmo ganadise okongalotiꞌ hulo-gedo vineꞌ nene ningo lo sotoꞌ ogavo gaza lamineꞌ aineꞌ nemuꞌ nene evenelite ningi gililizangumuꞌ ve lo neꞌmine ozo: Ganadise gizi dave ingine lamineꞌ igi ma ize initeꞌ neꞌmine neꞌmine Oꞌmoso imilisave lo Moseꞌ lo huko lidoꞌ nene eꞌmeto evenetoꞌ medelo mino Oꞌmoso initeꞌ lehize-daaꞌ ive nene initeꞌ ma Oꞌmoso olokuꞌ gize emelingumuꞌ nene do vo emezo lo lo-imineꞌ. 45 Neꞌmine lo lo-imineꞌza ve aza vo aꞌmine gamazi apiꞌ ogo veteteꞌ ogo do hutileꞌ ineꞌ. Neꞌmine ogavo nemuꞌ nene eveneꞌ gili Izesuꞌni lisilizaniꞌ o vivo aza nene numuno ebekuꞌ sotoꞌ vamilidoꞌ ogavo haza guvisela neivo numudoꞌ namadoꞌ ve nene ezela igivoꞌ minaniꞌ ve.