1 ሄዋ ቦላን ታናዳን ኣማኒያዋንቶ፥ ታኒ ሂንቴ ሃዋ ኤራና ማላ ኮያይ። ኑ ኣዎቱ ኡባይ ሻሪያፔ ጋርሳና ዴዔዲኖ፤ ኡባይካ ኣባ ጊዶና ፒኔዲኖ። ኬስ 13፡21-22፤ 14፡22-29 2 ኡንቱንቱ ኡባይ ሙሴና ኢቴፔ ጊዳናው፥ ሻሪያኒኔ ኣባን ፃማቄቴዲኖ። 3 ኡንቱንቱ ኡባይ ሄ ኢቲ ኣያና ቁማ ሜዲኖ። ኬስ 16፡35 4 ቃሲ ኡባይካ ሄ ኢቲ ኣያና ኡሻ ኡሼዲኖ። ኣዪሲ ጎፔ፥ ኡንቱንቱ ባሬንታ ካሌꬂያ ኣያና ዛላፔ ፑልቶዋ ኡሼዲኖ፤ ሄ ዛላይካ ኪሪስቶሳ። ኬስ 17፡6፤ ፓይ 20፡11 5 ሺን ፆሳይ ኡንቱንቱፔ ዳሪያ ባጋቱዋን ናሼቲቤና ዲራው፥ ኡንቱንቱ ኣኃይ ኣሳይ ባይና ሳን ላሌቴዳ። ፓይ 14፡29-30

6 ኡንቱንቱ ኢታባ ኣሞቴዳዋዳን፥ ኑ ዎዛናይ ቃሲ ኢታባ ኣሙዋፔ ናጌታናዳን፥ ሄዌ ኡባይ ኑሲ ቲሚርቴ ጊዴዳ። ፓይ 11፡4 7 ፆሳ ማፃፋይ፥ «ኣሳይ ማናዉኔ ኡሻናው ኡቴዲኖ፤ ቃሲ ዱሮ ዴንዲ ኤቄዲኖ» ያጊያዋዳን፥ ኡንቱንቱፔ ኢቱ ኢቱ ኤቃው ጎዪኔዳዋዳን፥ ሂንቴ ጎዪኖፒቴ። ኬስ 32፡6 8 ኡንቱንቱፔ ኢቱ ኢቱ ዎሹሜዳዋዳን፥ ኑኒ ዎሹማናው ቤሴና። ሄዋ ጋሱዋን ኡንቱንቱፔ ኢቲ ጋላሲ ላታማኔ ሄዙ ሻዓይ ሃይቄዳ። ፓይ 25፡1-18 9 ኡንቱንቱፔ ኢቱ ኢቱ ጎዳ ፓጪዴ፥ ሾሻን ዱኬቲ ሃይቄዳዋዳን፥ ኑኒ ጎዳ ፓጫናው ቤሴና። 10 ኡንቱንቱፔ ኢቱ ኢቱ ዙዙሚና፥ ዎꬊያ ኪታንቻን ኡንቱንታ ꬋዪሴዳዋዳን ዙዙሞፒቴ። ፓይ 16፡41-49

11 ሃዌ ኡባይ ሃራቱሲ ቲሚርቴ ጊዳናዳን ኡንቱንቱ ቦላ ጋኬዳ። ቃሲ ኑና ዎዲያ ዉርሴꬃይ ጋካና ማቴዳዋንታ ሴራናው ፃፌቴዳ።

12 ሄዋ ዲራው፥ ሚና ኤቃዲ ጊዴ ቆፒያ ኡራይ ኦኒኔ ኩንዴናዳን፥ ባሬና ናጎ። 13 ሂንቴንታ ጋኪያ ፓጪ፥ ኣሳ ኡባ ጋኪያ ፓጪያ ማላፔ ኣቲን፥ ኣይኔ ዱማቴና። ሂንቴንቱ ዎልቃይ ዳንዳዪያዋፔ ኣꬊያ ፓጪያን ሂንቴ ፓጬታናው ኮዬና ፆሳይ ኣማኔቴዳዋ። ሺን ሂንቴንታ ፓጪ ጋኪያ ዎዴ፥ ሄ ፓጪያ ኢ ሂንቴንታ ዳንዳዪሳና። ቃሲ ሄ ፓጪያፔ ሂንቴንቱ ኬሲያ ኦጊያካ ኢ ኢማና።

14 ሄዋ ዲራው፥ ታ ዶሲያዋንቶ፥ ኤቃው ጎዪኖፒቴ። 15 ሂንቴንቱ ዎዛናማ ኣሳ ጊዴዳ ዲራው፥ ታኒ ሂንቴንቶ ኦዳይ። ታኒ ጊያዋ ሂንቴ ፒርዲቴ። 16 ኑኒ ፆሳ ጋላቲዴ ሻኪያ ኣንጁዋ ፁዓይ ኪሪስቶሳ ሱꬃና ኢቲፔቴꬃይ ዴዒያዋ ጊዴኔ? ቃሲ ኑኒ ሜንꬂያ ኡኪꬃይ ኪሪስቶሳ ኣሹዋና ኢቲፔቴꬃይ ዴዒያዋ ጊዴኔ? 17 ኢቲ ኡኪꬃይ ዴዒያ ዲራው፥ ኑኒ ጮራ ጊዶፔካ፥ ኢቲ ኣሳቴꬃ። ኣዪሲ ጎፔ፥ ኑኒ ኡባይካ ሄ ኢቲ ኡኪꬃ ሻኬቴቶ።

18 ኢስራዔሊያ ኣሳ ፄሊቴ። ያርሹዋ ሚያዋንቱ ያርሺያሳና ኢቲፔቴꬃይ ዴዒያዋንታ ጊዲኪኖ? ዎግ 7፡6 19 ሲሚ ታኒ ዋጋይታ? ኤቃሲ ያርሼቴዳ ቁማይ ማዲ ዎይ ኤቃይ ማዲ? 20 ማዴና፤ ሺን ታኒ ጊያዌ ፆሳ ኣማኔና ኣሳቱ ኢታ ኣያናቱዋሲ ያርሺያዋፔ ኣቲን፥ ፆሳው ያርሺኪኖ። ኢታ ኣያናቱዋና ሂንቴ ኢቲፔ ዙፔታና ማላ፥ ታኒ ኮዪኬ። ዛር 32፡17 21 ጎዳ ፁዓፔ ኡሺዴ ቃሲ ኢታ ኣያናቱዋ ፁዓፔ ኡሻናው ሂንቴ ዳንዳዪኪታ። ጎዳ ጋይታፔ ሂንቴ ጊሼቲዴ ቃሲ ኢታ ኣያናቱዋ ጋይታፔ ማናው ዳንዳዪኪታ። 22 ሄዋ ኡዲዴ ኑኒ ጎዳና ፂኖታናው ኮሺ? ኑኒ ኣፔ ሚኔቶ? ዛር 32፡21

23 ሂንቴፔ ኢቱ ኢቱ፥ «ኡባባ ኦꬃናው ታና ዲጊያባይ ባዋ»፤ ሺን ኡባባይ ማዴና። «ኡባባ ኦꬃናው ዲጊያባይ ባዋ፤ ሺን ኡባባይ ጌሼና» ያጊኖ። 24 ኦኒኔ ሃራ ኣሳ ማዲያባ ቆፖፔ ኣቲን፥ ሃራይ ኣቶ ኢቱኔ ባሬና ማዲያባ ቆፖፖ።

25 ጌያን ኣፃሬ ታራን ዛሊዔቲያ ኣሹዋ ሂንቴ ዎዛና ቆፋን፥ ኣይኔ ሲꬌናን ሚቴ። 26 ኣዪሲ ጎፔ፥ ኣላሚኔ ኣኒ ዴዒያባይ ኡባይ ጎዳባ። ማዝ 24፡1

27 ኢቲ ኣማኔና ኣሳይ ሂንቴንታ ኢማꬃ ኡዲ ሾባናው ፄሲና ባናው ኮዮፔ፥ ሂንቴ ዎዛና ቆፋን፥ ኣይኔ ሲꬌናን ሂንቴ ሲንꬃ ኢ ኣꬂያባ ኡባ ሚቴ። 28 ሺን ኢቲ ኡራይ ሂንቴንቶ፥ «ሃዌ ኤቃው ያርሼዳዋ» ጎፔ፥ ሄ ሂንቴንቶ ኦዴዳ ቢታኒያ ዲራዉኔ ቃሲ ሂንቴ ዎዛና ቆፋ ዲራው፥ ሄ ቁማ ሞፒቴ። 29 ታኒ ጊያዌ ኔ ዎዛና ቆፋ ዲራሳ ጊዴና፤ ሺን ዮኮ ቢታኒያ ዎዛና ቆፋ ዲራሳ።

ታኒ ታ ሃናናው ዳንዳዪያ ታ ሃኖታ ሃራ ኣሳ ዎዛናይ ኣያው ፒርዲ? 30 ታኒ ፆሳ ጋላታዴ ቁማ ሞፔ፥ ፆሳ ጋላታዴ ሜዳ ቁማው ኣያው ቦሬታይታ?

31 ሲሚ ሂንቴ ኣያኔ ሞፔ፥ ዎይ ኣያኔ ኡሾፔ፥ ዎይ ሂንቴ ኣያኔ ኡዶፔ፥ ኡባባ ፆሳ ቦንቹዋሲ ኦꬂቴ። 32 ሂንቴንቱ ኣዪሁዳ ኣሳቱዋሲ ዎይ ጊሪኬ ኣሳቱዋሲ ዎይ ፆሳ ኣማኒያዋንቱሲ ꬉቦ ጊዶፒቴ። 33 ታኒ ቃሲ ጮራቱ ኣታና ማላ፥ ኡንቱንቱ ኡባ ማዳናዳኒፔ ኣቲን፥ ታ ሁጴው ማዱዋ ኮዬናን፥ ኣሳ ኡባ ኡባባኒ ናሼቺያዋዳን፥ ሂንቴንቱካ ሄዋዳ ኡዲቴ።