4
Jo-Israel otamore duogo ir Nyasaye
1 Winjuru wachni, un mond Samaria machwe ka dwesni ma Bashan,
un mon masando jochan, un muthago joma odhier,
kendo uwachone chwou niya,
“Kelnwa gik ma wanyalo madho!”
2 Jehova Nyasaye Manyalo Gik Moko Duto osesingore niya,
“Ndalo biro chopo ma wasigu noywau gi olope kendo ngʼato ka ngʼato kuomu,
nochal mana ka rech ma olowu omako.
3 Ginigolu oko mar dala
ka giluwo kodu kuonde momukore mag ohinga,
kendo gibiro witou oko kuchomo Hamon,”
Jehova Nyasaye owacho.
4 “Dhiuru Bethel mondo utim richo;
kendo dhiuru Gilgal mondo umed timoe richo.
Keluru misengini magu okinyi kokinyi
kendo keluru achiel kuom apar magu bangʼ higni adek ka higni adek.
5 Chiwuru makati moketie thowi kaka misango mar dwoko erokamano,
kendo landuru wach kusungoru,
un jo-Israel kuom chiwo mar hera,
nimar mano ema uwinjo
ka morou ka usiko kutimo,”
Jehova Nyasaye Manyalo Gik Moko Duto owacho.
6 “Ne akelo kech e miechu duto,
kendo nubedo maonge chiemo,
to kata kamano pod utamoru duogo ira,”
Jehova Nyasaye owacho.
7 “Ne amako koth mondo kik chue
kane pod odongʼ dweche adek to piny chiek.
Ne amiyo koth ochwe e mier moko,
to ok e mier mamoko.
Ne ochwe e puothe moko,
to puothe mane ok ochweye, to ne wangʼ.
8 Ji ne wuotho awuotha e mier kamanyo pi modho,
kendo ne ok ginyal yudo pi moromogi,
to kata kuom mago duto pod utamoru duogo ira,”
Jehova Nyasaye owacho.
9 “Kuom kinde mangʼeny ne aoro dera
mi oketho chambu gi puotheu mag mzabibu.
Bonyo noketho puotheu mag ngʼowu kod mag zeituni,
to kata kuom mago duto pod utamoru duogo ira,”
mano e wach Jehova Nyasaye.
10 “Ne akelonu tuoche mag buche
machal gi mane akelo ni jo-Misri.
Ne anego yawuotu mangʼeny kod ligangla
kaachiel gi fareseu mag lweny.
Bende ne amiyo tik marach mar joma otho othingʼou e kuondeu mag bworo,
to kata kuom mago duto pod ne utamoru duoga ira,”
Jehova Nyasaye owacho.
11 “Ne atieko jomoko kuomu mana kaka ne atieko Sodom gi Gomora,
kendo ne uchalo mana gi yien moyudh kawangʼ e mach,
to kata kuom mago duto pod ne utamoru duoga ira,”
Jehova Nyasaye owacho.
12 “Kuom mano, ma e gima abiro timonu un jo-Israel,
to nikech abiro timonu kama,
koro ikreuru mondo urom gi Nyasachu, yaye Israel.”
13 Jal mane ochweyo gode
bende ema nochweyo yamo,
onyiso dhano parone,
bende en ema oloko ler mar odiechiengʼ bedo mudho,
en e ruodh piny duto;
nyinge en Jehova Nyasaye, ma Nyasaye Maratego.