13
Mirimb Jehova Nyasaye kuom jo-Israel
1 Kane Efraim owuoyo, to ji ne tetni,
nodhiale e piny Israel.
To notimo richo kuom lamo Baal, mi notho.
2 Koro gimedo timo richo,
bende giloso nyisechegi mag fedha mondo gilam,
ma gin kido molos gi rieko mangʼeny,
magi duto gin tich jopa bepe.
Wachore kuom jogi niya,
“Gitimo misango gi dhano,
kendo ginyodho kido molos mar nyaroya.”
3 Emomiyo ginichal mana kaka ongʼwengʼo mokinyi,
bende kaka thoo mar okinyi malal nono ka nyango owuok,
bende kaka mihudhwe ma yamo keyo kar dino,
bende kaka iro mawuok e dirisa.
4 “To An e Jehova Nyasaye ma Nyasachu
mane ogolou ua e piny Misri.
Ok unyal yango Nyasaye moro amora ma ok An,
onge Jawar machielo makmana An.
5 Ne aritou e piny motwo,
maliel ka mach.
6 Kane apidhogi ne giyiengʼ chuth;
kane giseyiengʼ to sunga nomakogi;
ma wigi owil koda.
7 Omiyo anabi irgi ka sibuor,
kendo ka kwach abiro buto negi e bath yo.
8 Anamonjgi mi ayiechgi matindo tindo
mana ka ondiek ma omaa nyithinde.
Anatiekgi mana ka sibuor,
bende le mag bungu noyiechgi matindo tindo.
9 “Osetieku yaye Israel, nikech ok udwara,
ok udwar jakonyu.
10 Ere ruodhu mondo koro oresu?
Ere jotendu e miechu,
mane usekwayo ni,
‘Miwa ruodh kod jotendwa?’
11 Kuom ich wangʼ mare ne amiyou ruoth
kendo e mirimba ne agole oko.
12 Timbe mamono mag Efraim osekan,
kendo richoge osendik e kitabu.
13 Rem machalo gi mar dhako mamuoch kayo nobine,
to en nyathi maonge gi rieko,
ma ka sa ochopo monego owuog e ich
to okia kama iwuok godo.
14 “Abiro resogi kuom teko mar piny joma otho
kendo anakonygi kuom tho.
In tho, ere masicheni duto,
kata in piny joma otho, ere kethruokni?
“Ok anakeche,
15 kata ka obedo ni odhi maber kamano e kind owetene.
Yamb yor wuok chiengʼ moa ir Jehova Nyasaye nobi,
kakudho koa e piny motwo,
ma pigene mag sokni mamol nodwon,
kod yewni mokuny bende nodwon.
Mwandune manie dechege
noyaki duto.
16 Jo-Samaria nokum kuom richogi
nikech gisengʼanyo ne Nyasachgi.
Noneg-gi gi ligangla;
nyithindgi matindo nochwad piny,
to mondgi mapek nobar iyegi.”