31
1 Jehova Nyasaye nowacho e kindeno niya, “Anabed Nyasach dhout Israel duto, kendo ginibed joga.”
2 Ma e gima Jehova Nyasaye wacho:
“Jogo motony e ligangla noyud ngʼwono e piny motimo ongoro;
anabi mondo ami Israel yweyo.”
3 Jehova Nyasaye nofwenyorenwa chon, kawacho niya:
“Aseherou gihera manyaka chiengʼ;
aseomou gihera mar ngʼwono.
4 Anageru kendo to bende enogeru,
yaye Israel ma nyako ngili.
Bende unugo nyiduongeu kendo,
mi udhi oko ma umiel gi ilo.
5 Bende unupidh mzabibu e gode
matindo mag Samaria;
jopur nopidhgi,
kendo ginibed mamor gi olembegi.
6 Odiechiengʼ moro nobedie ma jorit noywagi
e gode matindo mag Efraim niya,
‘Biuru wadhi Sayun, ir Jehova Nyasaye ma Nyasachwa.’ ”
7 Ma e gima Jehova Nyasaye wacho:
“Wer gi ilo ne Jakobo;
kog matek ne jotelo madongo mag ogendini.
Onego pak magu owinjre, kendo uwachi niya,
‘Yaye Jehova Nyasaye, res jogi, jo-Israel mane otony.’
8 Ne, anakelgi ka gia e piny
man yo nyandwat,
kendo achokgi ka gia e tungʼ
piny ka tungʼ piny duto.
Dhano ma galamoro nodwogi motingʼo muofni
kod rongʼonde,
mine ma yach kod mamuoch kayo.
9 Giniduogi ka giywak;
gini lem sa ma aduogogi.
Anatelnegi e bath aore man-gi pi,
e kuonde mopie ma ok ginichwanyre,
nikech an wuon Israel,
kendo Efraim e wuoda makayo.
10 “Winjuru wach Jehova Nyasaye,
yaye ogendini,
kendo landeuru e kuonde maboyo manie dho nembe:
‘Ngʼama nokeyo jo-Israel nochokgi,
kendo enorit rombe kaka jakwath.’
11 Nimar Jehova Nyasaye nokony Jakobo
e lwet wasike,
kendo enoresgi e lwet jogo matek moloyogi.
12 Ginibi kendo ginikogi gi ilo
e kuonde motingʼore gi malo mag Sayun;
ginibed gi ilo kuom chiwo mabup mar Jehova Nyasaye,
ma gin cham, divai manyien kod mo,
nyithi rombe kod dhok.
Ginichal gi puodho moole pi maber,
kendo ok ginibed gi kuyo kendo.
13 Eka jotich ma nyiri nomiel
kendo bed mamor,
yawuowi matindo kod joma oti machalre.
Analok ywakgi obed mor;
anahogi kendo anamigi ilo kar kuyo.
14 Anami jodolo gik mathoth mongundho,
kendo joga nopongʼ,
gi chiwo mara mabup,” Jehova Nyasaye owacho.
15 Ma e gima Jehova Nyasaye wacho:
“Dwol winjore Rama, ka goyo nduru,
kendo ywak malich,
Rael ywago nyithinde kendo odagi ni ok nyal hoye,
nikech gisetho.”
16 Ma e gima Jehova Nyasaye wacho:
“Lingʼ iwe ywak kendo ywe pi wangʼi,
nimar nochuli kuom tichni.
Giniduogi ka gia e piny wasigu.” Jehova Nyasaye wacho.
17 Jehova Nyasaye wacho niya,
“Omiyo nitiere geno kuom ndaloni mabiro.
Nyithindu nodwogi e pinygi giwegi.
18 “Adiera asewinjo ywak Efraim:
Ne imiya kum ka nyaroya ma lelo,
kendo osekuma.
Duoga, kendo anaduogi,
nikech in Jehova Nyasaye Nyasacha.
19 Bangʼ kane asebaro, ne akwayo weruok;
bangʼ kane wach osedonjona, ne agoyo agoga.
Wiya nokuot kendo ne awinjo lit,
nikech ne atingʼo wichkuot mar bedona rawera.
20 Donge Efraim en wuoda makende,
nyathi ma amor godo?
Kata obedo ni awuoyoga kuome marach,
to pod apare. Emomiyo chunya ywage,”
an-gi kech kuome, Jehova Nyasaye owacho.
21 “Keturu ranyisi mag yore;
keturu gik matayo ji.
Paruru yore moriere, yorno miluwo.
Duogi, yaye Israel ma nyako ngili, duogi e dalau.
22 Nyaka karangʼo ma ibiro bayo,
yaye nyako maonge adiera?
Jehova Nyasaye enochwe gima nyien e piny,
dhako nokwak dichwo.”
23 Ma e gima Jehova Nyasaye Maratego, ma Nyasach Israel, wacho: “Kagologi gia e twech, joma ni e piny Juda kod dalagi noti gi wechegi kendo ni: ‘Jehova Nyasaye ogwedhu, yaye kar dak maler, yaye got mowal.’ 24 Ji nodag kaachiel e kanyakla ei Juda kod miechgi duto, jopur kod jogo mawuotho ka gi kacha gi jambgi. 25 Anami joma ool teko kendo joma chunygi onyosore anajiw.”
26 Kuom mani ne achiewo kendo ne angʼiyo alworana. To nindo mara nobedona mamit.
27 Jehova Nyasaye wacho niya, “Ndalo biro ma anapidhe od Israel kod od Juda gi koth ji kod mar le. 28 Mana kaka ne angʼiyogi mondo apudhgi kendo kethogi, mondo awitgi oko ka atiekogi kendo kelonegi chandruok, anaritgi mondo agergi kendo pidhogi,” Jehova Nyasaye owacho. 29 “E ndalono ji ok nochak owach kendo niya,
“ ‘Wuone osechamo olembe ma wach-wach,
to leke nyithindo ema tho.’
30 Makmana, ngʼato ka ngʼato notho nikech richone owuon; ngʼato angʼata mochano olemo ma wach-wach, lake owuon ema notho.”
31 Jehova Nyasaye wacho niya, “Kinde biro ma anatim
singruok manyien gi dhood jo-Israel kod dhood jo-Juda.
32 Singruokno ok nochal gi mano
mane atimo gi kweregi,
kane amako lwetgi
mi atelonegi kagologi e piny Misri,
nikech negiketho singruokna,
kata obedo nine an chworgi,”
Jehova Nyasaye ema owacho.
33 “Ma e singruok ma anatim
gi dhood jo-Israel bangʼ ndalogo,” Jehova Nyasaye owacho.
“Abiro keto chikena e pachgi
kendo ndikogi e chunygi.
Anabed Nyasachgi
kendo ginibed joga.
34 Koro ngʼato ok nochak opuonj jabathe,
kata nyawadgi kowacho ni,
‘Ngʼe Jehova Nyasaye,’ nikech giduto giningʼeya,
kochakore ngʼat matinie moloyo nyaka ngʼat maduongʼie moloyo,”
Jehova Nyasaye owacho.
“Nimar anawenegi timbegi maricho
kendo ok anachak apar richogi kendo.”
35 Ma e gima Jehova Nyasaye wacho,
ngʼatno mayiero chiengʼ
mondo orieny godiechiengʼ,
machiko dwe gi sulwe
mondo orieny gotieno,
mamiyo apaka mag nam
ruto, Jehova Nyasaye Maratego e nyinge:
36 Jehova Nyasaye wacho niya,
“Mana ka chikegi olal e wangʼa,
e kaka nyikwa Israel nowe bedo oganda e nyima.”
37 Ma e gima Jehova Nyasaye wacho:
“Kane ni polo malo inyalo pim
kendo mise mar piny inyalo many,
eka anakwed nyikwa Israel
nikech gigo duto magisetimo,”
Jehova Nyasaye wacho.
38 Jehova Nyasaye wacho niya, “Kinde biro, ma dala maduongʼ ibiro gerona kendo, kochakore Kar Ngʼicho Motingʼore gi Malo mar Hananel nyaka e Dhoranga Kona. 39 Tond pimo norie kochakore kanyo tir nyaka e got matin mar Gareb bangʼe ogomo kochiko Goa. 40 Holono duto mopongʼ gi ringre joma otho kendo kama ipuke buru, kod kuonde duto mokuny duto, nodhi e Holo mar Kidron man yo wuok chiengʼ mochopo nyaka e kona ma Dhoranga Faras, nobed maler ne Jehova Nyasaye. Dala maduongʼni ok nomuki kata kethi.”