1 Kɛ̀ Dɑfitii ítɛ́ dɛborɛ̀ kɛ́kɔtɛ kɛ́mbo Ãnkedii yɛtɑ̃rɛ̀ ĩ́nkɛ̀. 2 Kɛ̀ Sɑurii bɛti Fidisitɛ̃ɛ̃bɛ kɛ́deè kɛ́konní kɛ̀ bɛ̀ɛ ò nɑ̀kɛ́ kɛ dɔ̀: Dɑfiti bo Ãnkedii kó dikpɑ́ɑ̀. 3 Kòo tɑ̃ɑ̃tɛ́ Isidɑyɛɛribɛ miɛkɛ bɛnitidɑɑbɛ̀ mɔ́mmɔmbɛ kɛ̀ bɛ̀ mbo sikɔupísìtɑ̃ɑ̃ti (3000) kɛ̀ bɛ̀ɛ kɔtɛ Dɑfiti nɛ̀ o kɔbɛ bɛ wɑmmù kɛ sɔ̃́ mbɛ̀ bo ditɑ̃rì bɛ̀ tu dì Sitɑ̃bɔɔ́ kó ditɑ̃rì ììkɛ̀. 4 Kɛ̀ bɛ̀ɛ tuɔkɛ dibòrì mɑrì bɛ̀ tu dì Dipebɑɑkɛ̀rì kucɛ nùù kɛ̀ kutɑ̃dènkù mɑkù dɛ̀ bo, kɛ̀ Sɑurii tɑ ku miɛkɛ kɛ bo yɛ̃nkɛ kɛ sɔ̃́ nDɑfiti nɛ̀ o kɔbɛ kɛ̀ bɛ̀ bo kutɑ̃dènkù fũ̀ɔ̃̀. 5 Kɛ̀ Dɑfiti kɔbɛɛ ò nɑ̀kɛ́ kɛ dɔ̀: Ti Yiɛ̀ nKuyie ndɑ nɑ̀kɛ́ dìì yiè kpɛ́í diì tùɔ̀kɛ, kù do yɛ̃ nkù yóó dɑ duɔ́ ndì ɑ dootitɔù kɑ̀ɑ ò dɔ̀ɔ̀nɛ̀ ɑ dɔ́mɛ̀.

Kɛ̀ Dɑfiti ítɛ́ mɛyɔɔ̀mmɛ̀ kɛ́kéétɛ́ Sɑuri yɑɑ̀bòrì fũ̀ɔ̃̀, 6 ò dì kèétɛ́ mɛmmɛ kɛ́deè kòo kɔ̃m̀bùɔ̀tìi do mɛdiɛ̀ nhò kèétɛ́ mɛ̀ɛ̀ kpɛ́í nSɑuri yɑɑ̀bòrì. 7 Kòo nɑ́kɛ́ o kɔbɛ kɛ dɔ̀: Ti Yiɛ̀ nKuyie mbɑ́ɑ́ yie kɛ̀ n dɑɑ́ n nɔ̀ùtɛ̀ n yiɛ̀ nyĩ́nkɛ̀! Ti Yiɛ̀ nKuyie nkuù ò tɑ̃ɑ̃tɛ́ kòò tu okpɑ̀ɑ̀tì.

8 Dɑfiti bɛ́i mɛmmɛ kɛ́pɛ́ítɛ́ o kɔbɛ bɑ́ bɛ̀ í ndɔ̀ɔ̀ mɛyɛi mmɑmɛ̀ Sɑuri.

Kɛ̀ Sɑurii yɛ̀ kutɑ̃dènkù kɛ́sɔɔtɛ́ o cɛ. 9 Dɛ kó difɔ̃nkúò kɛ̀ Dɑfitii yɛ̀nní kutɑ̃dènkù miɛkɛ kɛ́pĩɛ̃kɛ́ kɛ dɔ̀: N yiɛ̀ nhokpɑ̀ɑ̀tì!

Kɛ̀ Sɑurii wɛ̃ɛ̃tɛní kɛ̀ Dɑfitii nínkú kɛ́sĩ́nnɔ́ɔ, 10 kɛ́nɑ́kɛ́ Sɑuri kɛ dɔ̀: Dɛ̀ yĩ́mɛ kɑ̀ɑ yie mbɛ̀ɛ̀ tu n wɑnti ɑ kó mɛyɛi mbɛ kpɛti? 11 A yɑ̀mu yíe nnɛ̀ ɑ nuɔ ti Yiɛ̀ nKuyie ndɑ pĩ̀ḿmɛ̀ kɛ n duɔ́, bɛ̀ do n tiémmu kutɑ̃dènkù miɛkɛ kɛ tú n dɑ kuɔ kɛ̀ n dɑ coo nkɛ tú m bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀ kɛ yɛ̃́ ti Yiɛ̀ nKuyie nkuù dɑ tɑ̃ɑ̃tɛ́mɛ̀ kɑ̀ɑ tu okpɑ̀ɑ̀tì. 12 Okpɑ̀ɑ̀tì wéntɛ́ n kèétɛ́mɛ̀ ɑ yɑɑ̀bòrì kɛ pikú, m mɛ nkèétɛ́mɛ̀ ɑ yɑɑ̀bòrì mɑ́ɑ̀ kɛ í dɑ kùɔ, ɑ yɑ̀mu n yí dɔ́mɛ̀ kɛ́ dɑ kuɔ yoo n dɑ dɔɔ̀ mɛyɛi, n yí dɑ cɑ̀ɑ̀rɛ̀ dɛ̀mɑrɛ̀, fɔ̃́ɔ̃̀ n wɑnti kɛ bo n kuɔ. 13 Ti Yiɛ̀ nKuyie nkuù bo ti pútɛ́ mí nnɛ̀ fɔ̃́ nkuù bo kpɑ n kpɑ̀nnì, m bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀. 14 Dikotinùù mɑrì tu: Kuyonku bonní bɛnitiyonkubɛ borɛ̀ ndɛ. Mí mmɛ bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀. 15 Isidɑyɛɛribɛ kpɑ̀ɑ̀tì wɑnti we? Weninwe ɑ bɛtìmɛ̀ mí ndɛmɔcírɛ̀, mí nfɛnɑcɛ́kɔ̀fɑ̀ɑ̀? 16 Ti Yiɛ̀ nKuyie nkuù bo ti pútɛ́, kuù bo ti wéntɛ́, kù n kónnɛ́ kɛ́ m pɑtɛ nɛ̀ fɔ̃́!

17 Dɑfiti bɛ́i ndìì mɔ̀nnì kɛ́deè kɛ̀ Sɑuri dɔ̀: M birɛ Dɑfiti fɔ̃́ɔ̃̀ n nɑ̀ɑ́nɑ́ɑ̀? Kɛ́kuɔ́ mmɛdiɛ̀, 18 kɛ́nɑ́kɛ́ Dɑfiti kɛ dɔ̀: A tú onitisɑ̀ù nwe kɛ m pɛ̃ɛ̃tɛ́, ɑ n wɑntinɛ̀ mɛsɑ̀ɑ̀ mmɛ kɛ̀ n dɑ wɑntinɛ̀ mɛyɛi. 19 A m bɛnkɛmu yíe nhɑ n dɔ́nɛ̀mɛ̀ mɛsɑ̀ɑ̀, ti Yiɛ̀ nKuyie nni nhɑ̃nnɛ́mu ɑ nɔ̀ùtɛ̀ miɛkɛ yíe, ɑ mɛ nyí n kùɔ. 20 Òmɔù ɔ̃ɔ̃ í nyɑ̀ o dootitɔù kóò yóu kòo ítɛ́. Ti yiɛ̀ nKuyie ndɑ yietí mɛsɑ̀ɑ̀ nhɑ n dɔ̀ɔ̀ mɛ̀ yíe. 21 N yɛ̃́mu kɛ dò nfɔ̃́ɔ̃̀ yóó di Isidɑyɛɛribɛ kpɑ̀tì, fɔ̃́ɔ̃̀ yóó tì tiekɛ. 22 Di mmɔ̀nnì bɛ́i nkɛ́yú nti Yiɛ̀ nKuyie nyètìrì kɛ dɔ̀, ɑ í yóó kuɔ n cĩ́ɛ̃̀tɛ̀ kɔbɛ nɛ̀ n yɑɑ̀bí n kṹṹ nkó difɔ̃nkúò kɛ̀ n yètìrìi kpɑ́nnɛ́.

23 Kɛ̀ Dɑfitii pɑrìkɛ̀ nɛ̀ ti Yiɛ̀ nKuyie nyètìrì, kɛ́deè kɛ̀ Sɑurii kò. Dɑfiti nɛ̀ o kɔbɛ kɛ̀ bɛ̀ɛ wɛ̃tɛ bɛ̀ do sɔri dɛ̀ ditɑ̃rì ĩ́nkɛ̀.