1 Diyiè mɑrì kɛ̀ Fidisitɛ̃ɛ̃bɛɛ wɛ̃nnɛ́ dihɑ̃ɑ̃pɔ̀ntĩ̀nnì dìmɑ́ɑ̀ kɛ bo dokɛ́nɛ̀ Isidɑyɛɛribɛ, kɛ̀ Akiisii nɑ́kɛ́ Dɑfiti kɛ dɔ̀: Fɔ̃́ nnɛ̀ ɑ kɔbɛ di bo n nɛinɛ̀ mudoò. 2 Kɛ̀ Dɑfiti dɔ̀: Okpɑ̀ɑ̀tì n yiemmu, ɑ mɔ́mmuɔ nhɑ bo yɑ̀ m bo dɔɔ̀ dɛ̀. Kɛ̀ Akiisi dɔ̀: Dɛ̀ wenni fɔ̃́ɔ̃̀ yó ntú n kóo bɑ̀rì sɑ̃́ɑ̃̀.

3 Dɛ̀ do sɔ̃́ nSɑmmuyɛɛri kumu, kɛ̀ Isidɑyɛɛribɛ bɛmɔu kɑ̀ri o kṹṹ nkɛ dèè koò kũnnɛ́ Dɑmɑɑ. Kɛ̀ Sɑurii kuɔ bɛ̀ɛ̀ bourí tinùbootì Isidɑyɛɛribɛ miɛkɛ.

4 Diyiè mɑrì kɛ̀ Fidisitɛ̃ɛ̃bɛɛ tíí mbɛhɑ̃ɑ̃pɔ̀ntĩ̀nnì kɛ́bɑ́tɛ́ Sunɛmmu, kɛ̀ Sɑurii tíí nho kɔbɛ kɛ̀ bɛ̀ɛ kɑri Kidiboɑ. 5 Kɛ̀ Sɑurii yɑ̀ Fidisitɛ̃ɛ̃bɛ ɑ̃ɑ̃pɔ̀ntĩ̀nnì kɛ̀ kufɔ̃wɑɑ́ nhò ɑutɛ́ kòo kɔ̃m̀bùɔ̀tì nduò. 6 Kòo beé nti Yiɛ̀ nKuyie, kù mɛ nyí nhò tɛ̃̀ńnɛ́ bɑ́ nɛ̀ tidɔuǹtì miɛkɛ yoo bɑ́ nɛ̀ idíítí kó mubɔmmù yoo kùu duɔ́ nkɛ̀ ku pɑ̃ɑ̃nɑ́ɑǹtì nɑ́ɑǹtò mɔù ò bɛ́innɛ̀. 7 Kɛ̀ Sɑurii nɑ́kɛ́ o ɑ̃ɑ̃pɔ̀mbɛ̀ kɛ dɔ̀: Wɑɑ́nnɛ̀nní onitipòkù wèè bourí kunùbokù kɛ̀ n kɔtɛ kòò m pɑ̃ɑ̃́. Kɛ̀ bɛ̀ɛ ò nɑ̀kɛ́ kɛ dɔ̀: Òmɔù bo Ã-Ndɔɔ.

8 Kɛ̀ Sɑurii ceetɛ tiyɑ̀ɑ̀tì kɛ́nɛinɛ̀ o tɔ̃mbɛ̀ bɛ̀dɛ́bɛ̀, kɛ̀ bɛ̀ɛ kɔtɛ Ã-Ndɔɔ, kɛ́tuɔkoo kɛyènkɛ̀ kòo nɑ́kɛ́ onitipòkù kɛ dɔ̀: N dɔ́ ɑ n yú ocíì mɔù nwe kɛ̀ nh ò bekɛ tìmɑtì, kɛ̀ n dɑ nɑ̀kɛ́ kɛ yĩ́ ɑ yú wè, ɑ we nyú. 9 Kòo nitipòkùu ò tɛ̃̀ńnɛ́ kɛ dɔ̀: A yɛ̃́mu ɑ mɔ́mmuɔ nSɑuri kùɔmɛ̀ bɛnìtìbɛ̀ bɛ̀ɛ̀ yu bɛcíríbɛ̀ Isidɑyɛɛribɛ tenkɛ̀ miɛkɛ, yɑ́ɑ ɑ dɔ́ kɛ́ n díímmu kɛ́ n kuɔ? 10 Kɛ̀ Sɑurii ò tɛ̃̀ńnɛ́ kɛ dɔ́: Ti Yiɛ̀ nKuyie mbomu, míì bɛ́i nkɛ tú ɑ bɑ́ nyĩɛ̃̀kù tìmɑtì. 11 Kòo nitipòkù dɔ̀: N dò nkɛ́ dɑ yú we? Kòò dɔ̀: Á n yú Sɑmmuyɛɛri.

12 Onitipòkù yɑ̀ní dìì mɔ̀nnì Sɑmmuyɛɛri kɛ́kuɔ́nko kɛ dɔ̀: Dɛ̀ yĩ́mɛ kɑ̀ɑ n soutɛ́? Fɔ̃́ nSɑuri. 13 Kɛ̀ Sɑuri dɔ̀: Bɑ́ nyĩɛ̃̀kù, fɔ̃́ ncɛ̃́nkɛ n nɑ́kɛ́ ɑ yɑ̀ mù. Kòò dɔ̀: N yɑ̀ kukúkɛ́yɑ̃́ntíkù mɑkù nku kɛ̀ kù yɛ̀nní kɛtenkɛ̀ miɛkɛ. 14 Kɛ̀ Sɑuri dɔ̀: Ò dòmmɛ? Kòo nitipòkù dɔ̀: N yɑ̀ odɑkótì nwe kòò dɑ̀ɑ́tí kuyɑɑ̀bòrìkù.

Kɛ̀ Sɑurii bɑntɛ́ Sɑmmuyɛɛri nwe mɛ̀, kɛ́nínkú kɛ́sĩ́nnɔ́ɔ o ììkɛ̀. 15 Kɛ̀ Sɑmmuyɛɛri nɑ́kɛ́ Sɑuri kɛ dɔ̀: A n kɔɔ́nnɛ̀ bɑ nkpɛ́í, kɛ duɔ́ nkɛ̀ bɛ̀ n yuní? Kɛ̀ Sɑuri dɔ̀: Dɛ̀ n dimu mɛdiɛ̀, Fidisitɛ̃ɛ̃bɛ bɛɛ̀ ǹ do mudoò, kɛ̀ Kuyie nni ndɛ̀tɛ́nɛ̀, kù í duɔ́ nkɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kóo mɔù bo m bɛ́innɛ̀ yoo kù m bɛ́innɛ̀ tidɔuǹtì, kɛ̀ n nɛ́ dɑ yùní kɑ̀ɑ bo n nɑ́kɛ́ n dò nkɛ́dɔɔ̀mɛ̀. 16 Kɛ̀ Sɑmmuyɛɛri dɔ̀: A nɛ́ m bekù kɛ yɛ̃ mbɑ, kɛ̀ nsɑ̀ kɛ̀ ti Yiɛ̀ nKuyie ndɑ bùtínnɛ́ kɛ nɑɑ́ nhɑ dootitɔù. 17 Ti Yiɛ̀ nKuyie ndɔ̀ɔ̀ kù sòò n nɑ̀kɛ́ tì nti, kɛ̀ n dɑ nɑ́kɛ́ kɛ tú kù cɔutɛ́ tikpɑ̀tì ɑ borɛ̀ kɛ duɔ́ nDɑfiti. 18 A í yie nkù yɛ̃ mmù kɛ bo kuɔ Amɑdesiibɛ bɛmɔu, dɛɛ̀ te kɛ̀ ti Yiɛ̀ nKuyie ndɑ dɔ̀ɔ̀ mɛmmɛ yíe. 19 Fɔ̃́ nnɛ̀ ɑ nìtìbɛ̀ di bo Fidisitɛ̃ɛ̃bɛ nɔu miɛkɛ nkɛ, nɑnkɛ fɔ̃́ nnɛ̀ ɑ bí di bo konní m borɛ̀ kudɔnkù, kɛ̀ Fidisitɛ̃ɛ̃bɛɛ nɑ Isidɑyɛɛribɛ kó dihɑ̃ɑ̃pɔ̀ntĩ̀nnì.

20 Sɑuri kèè tiì nɑ́ɑǹtì kɛ̀ kufɔ̃wɑɑ́ nhò ɑutɛ́ kòò do. Ò tɛ̃́nkɛ do í mɔkɛ muwɛ̃rímú kɛ yɛ̃́ ò do tṹṹmmɛ̀ kɛ yɑ̀ɑ̀ yiénnɛ̀ ò í di mùmɑmù. 21 Kòo nitipòkùu kɔtɛní o borɛ̀ kɛ́yɑ̀ kufɔ̃wɑɑ́ nhò ɑutɛ́mɛ̀ kóò nɑ̀kɛ́ kɛ dɔ̀: Mí nhɑ kóo tɔ̃ntì n yiemmu kɛ cĩ̀nnɛ m buu kɛ dɔ̀ɔ̀ ɑ m bekɛ tì. 22 Múnkɛɛ kéntɛ́ mí nhɑ kóo tɔ̃ntì n dɔ́ kɛ dɑ nɑ́kɛ́ tì, yóu kɛ̀ n dɑ wɑɑnní mudiì sɑ́m̀pɔ́ kɑ̀ɑ di kɛ́pɛ́tɛ́ muwɛ̃rímú kɛ́nɑ kɛ́kétɛ́ kucɛ.

23 Kɛ̀ Sɑurii yetɛ kɛ dɔ̀ ò bɑ́ɑ́ di, o tɔ̃mbɛ̀ nɛ̀ onitipòkù kɛ̀ bɛ̀ɛ yetoo, kòo mbo kɛ́yie nkɛ́ítɛ́ kɛtenkɛ̀ kɛ́kɑri dikɑ̀rì ĩ́nkɛ̀. 24 Kòo nitipòkùu cokɛ́ mɛcɑ̃ɑ̃ nkɛ́kuɔ dinɑɑdɑbii ò do dùnnɛ dì kɛ́wɑɑ́ mmuyuo nkɛ́ɑ̃ntɛ kɛ́kɑkɛ yɛkɑ̀tìndɑ̀, 25 kɛ́duɔ́ nSɑuri nɛ̀ o tɔ̃mbɛ̀ kɛ̀ bɛ̀ɛ cɑ́ɑ́kɛ́ kɛ́deè, kɛ́kò ndɛ kó kɛyènkɛ̀.