1 Kɛ̀ ti Yiɛ̀ nKuyie mbɛ́i nkɛ dɔ̀:

Eénɛ̀ ditɑ̃tɛheù mɛyɛi mmɛɛ̀ doti n kɔbɛ ɛì fɛcĩrifɛ kɔ̃mɛ.

Bɛ̀ cɑ̀ɑ̀rɛ̀ mɛ̀ɛ̀ kpɛ́í mmɛtɑummɛ̀ n do bɛ̀ dɔ̀ɔ̀nɛ̀ mɛ̀, kɛ yetɛ n tié.

2 Bɑ́ kɛ̀ bɛ̀ dɔ́ bɛ̀ n kuɔ́nnɛ̀ mɛ̀ɛ̀ botí kɛ dɔ̀:

Áú! Kuyie, tínti Isidɑyɛɛribɛ ti dɑ yɛ̃́mu,

fɔ̃́ɔ̃̀ ti te.

3 Isidɑyɛɛribɛ yetɛ mɛsɑ̀ɑ̀ mmɛ mudɔɔ̀rìmù,

dɛɛ̀ te kɛ̀ bɛ dootitɔbɛ̀ bɛ̀ bɛ̀tì.

4 Bɛ̀ pĩ̀ḿmú bɛkpɑ̀ɑ̀tìbɛ̀, bɑ́ bɛ̀ í m beé,

kɛ tɑ̃nkɛ́ bɛnìùbɛ̀, bɑ́ n yí yɛ̃́,

kɛ tùótɛ́ bɛ mɑ́tì pɛ́ítì nɛ̀ bɛ sɔɔ nkɛ dɔɔrinɛ̀ sitenkɑɑnìi,

kɛ̀ sì bɛ̀ fétinko.

5 Sɑmmɑrii kɔbɛ!

Di kó fɛsɔɔmɑ́tìnɑ̀ɑ̀fɛ̀ fɛnfɛ n yí fɛ̀ dɔ́ fɛnɔ̀nfɛ̀,

m miɛkɛ kɛɛ̀ di yɛ̀.

Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑ̀rìmɛ̀?

6 Díndi Isidɑyɛɛribɛ díì dɔ̀ɔ̀ dɛ kó fɛsɔɔmɑ́tìnɑ̀ɑ̀fɛ̀,

fɛ̀ɛ̀ bo Sɑmmɑrii fɛ̀ í tú Kuyie,

fɛ̀ bo pɔntɛ kɛ́yɔurɛ yɔurɛ.

7 Di buɔtí kuyɑɑkù nku kɛ yóó kɔ̃ṹ fɛfɔ̀dɔ́nfɛ̀,

Dikotinùù mɑrì dɛ ntú:

kɛ̀ tiyòùtì í òtɛ mɛbii mbɛ̀ ɔ̃ɔ̃ í ntì nɑ̀ɑ mmuyuo.

Bɑ́ kɛ̀ tì ketɛ́ kɛ dɔ́ tìi pɛitɛ́, bɛpɔ̀ɔ̀bɛ̀ bɛɛ̀ yóó tì di.

8 Ibotí tɛì iì tiekɛ Isidɑyɛɛribɛ,

kɛ̀ bɛ̀ bo i miɛkɛ,

kɛ dò nkunɛnkù bɛ tɛ̃́nkɛ í dɔ́ kù.

9 Nɛ̀ bɛmɑ́ɑ̀ ndi bɛ̀ kɔ̀tɛmɛ̀ Asidii.

Bɛ̀ í tɔkunɛ̀ fɛsèfɛ̀ kɛ fɛ pĩĩ,

kɛ̀ Isidɑyɛɛribɛ biɛ nɛ́ do ntinɛ́potì.

10 Kɛ̀ díndi bɑɑ dɔ́ dí mbɛ cu ticuuti,

dɛ mɔ̀nnì tùɔ̀kɛmu kɛ̀ m bo di tíí,

nkɛ Asidii kóo kpɑ̀ɑ̀tì di fɛ̃́ũ.

11 Isidɑyɛɛribɛ mɑɑ́ kɛ mɑɑ́ yɛwũɔ̃tɔ̀rɛ̀,

kɛ̀ yɛ̀ nɛ́ dɔkɛ bɛ̀ tɑnnɛ́ mɛyɛi mmiɛkɛ.

12 Bɑ́ kɛ̀ m bɛ̀ wɑ̃̀ri n kuɔ́ pɛ́u pɛ́u,

ì bo ndò ndɛ̀mɑrɛ̀ cɑ̀nnɛ̀ bɛ kpɛ́í.

13 Bɛ̀ n feu ìì wũɔ̃, bɛ̀ ì feu kɛ bo ncɑ́ɑ́ nyimɑɑ nyi.

Mí mbɛ Yiɛ̀ nKuyie n yí cɔú dɛ kó yɛpɑ̃rɛ̀.

N yí yóó yɛ̃̀ mbɛ yɛi nkpɛ́í, n yóó yṹɔ̃́mmu bɛ to,

kɛ̀ bɛ̀ɛ wɛ̃tɛ Esibiti.

14 Isidɑyɛɛribɛ yɛ̃̀mmu wèè bɛ̀ dɔ̀ɔ̀, kɛ mɑɑ́ sikpɑ̀ɑ̀tìcɛ̃́ĩ,

kɛ̀ Sudɑɑ kɔbɛ mɑɑ́ yɛhɛkɛ̀ diɛyɛ̀ pɛ́u kɛ̀ yɛ̀ fii nyiduotí.

M bo cṹũnko muhɑ̃ɑ̃́ nkɛ̀ mùu cɔ́útɛ́ dɛ kó yɛhɛkɛ̀ nɛ̀ dɛ kó sicɛ̃sɑ̀ɑ̀sì.