1 Asidii kóo kpɑ̀ɑ̀tì Sɑdikɔ̃ɔ̃ tɔ̃nní dìì benni o kóo ɑ̃ɑ̃pɔ̀nkótì Tɑditɑnni, kòò bo pi Asidɔti ɛì kɛ́ dì pɔ̀ntɛ.

2 Dɛ kó dibenni ndi ti Yiɛ̀ nKuyie ntì nɑ̀kɛ́mɛ̀ Amɔti birɛ Esɑii, wèè nɑ̀ɑ́ nku pɑ̃ɑ̃nɑ́ɑǹtì kɛ dɔ̀: Kɔtɛ kɛ́boutɛ́ kufɔ̀ɔ̀tɔ̃̀nkù ɑ boú kù ɑ kɑ̀, kɛ bo bɛnkɛ mɛyɛǹcɑɑ̀rìmɛ̀, kɛ́dɛitɛ ɑ nɛùtì, kòo mɛ̀ dɔ̀ɔ̀ kɛ́ncentì mɛnɑcɛ̀bii nkɛ feío.

3 Kɛ̀ ti Yiɛ̀ nKuyie mbɛ́i nkɛ dɔ̀: N kóo tɔ̃ntì Esɑii cemmɛ̀ mɛnɑcɛ̀bii mbɑ́ ò í dɑ́ɑ́tí tiyɑ̀ɑ̀tì. Dɛ̀ mɔ̀kɛ yíe yɛbie nyɛ̀tɑ̃ɑ̃ti ndi, dɛ̀ dò mmɛcɑnnimɛ̀ mmɛ nɛ̀ dibɛnkɛ̀rì Esibiti nɛ̀ Etiopii dɛ kpɛ́í. 4 Asidii kóo kpɑ̀ɑ̀tì yóó mɛ mpĩ́mmu Esibiti kɔbɛ nɛ̀ Etiopii kɔbɛ kɛ̀ bɛ̀ɛ ce mmɛnɑcɛ̀bii, bɛdɑpɑ̀mbɛ̀ nɛ̀ bɛdɑkótíbɛ̀. Esibiti kɔbɛ fɛi bo feitɛ́. 5 Bɛ̀ɛ̀ do búɔ́ Etiopii ɛì kɔbɛ nɛ̀ bɛ̀ɛ̀ do pɔtìnɛ̀ Esibiti ɛì kɔbɛ, kufɔ̃wɑɑ́ nnɛ̀ ifɛi dɛ̀ bo bɛ̀ pĩ.

6 Dɛ mɔ̀nnì dɛ kó itempɛ̃ nkɔbɛ bo nnɑ́ɑ́ nkɛ tú: Ntɛ ti do búɔ́ bɛ̀ íbiɛ ti yɛ̀mmɛ̀ do dò nti yóó sɔri kɛ̀, kɛ́pɛ́tɛ́ mɛteèmmɛ̀, kɛ̀ bɛ̀ ti dɛɛtɛ́nɛ̀ Asidii kóo kpɑ̀ɑ̀tì. Ti nɛ́ yóó cuó nkɛ kɛ́pɛ́tɛ́ mɛdɛɛtímɛ̀?