1 Kɛ̀ Kuyie nyíɛ́ kɛ́bɛ́innɛ̀ Sonɑɑsi mɛdɛ́rímɛ̀, 2 kɛ dɔ̀: Kɔtɛ Ninifu dihɛidiɛ̀ kɛ́ bɛ̀ nɑ̀kɛ́ n yóó dɑ nɑ́kɛ́ tì.

3 Kɛ̀ Sonɑɑsii ítɛ́ kɛ́kɔtɛ Ninifu kɛ́ndònnɛ̀ Kuyie nhò nɑ̀kɛ́mɛ̀. Dihɛidiɛ̀ do ndi, kɑ̀ɑ dɔ́ kɛ́ di ce, nhɑ mmɔkɛ yɛwe yɛ̀tɑ̃ɑ̃ti. 4 Kɛ̀ Sonɑɑsii yɛ̀ kɛ́nfirí diyiè ketirì dihɛì kɛ pĩɛ̃kù kɛ tú: Dɛ̀ kpɑɑ́ yɛwe sipísìnɑ̀ɑ̀ ndi kɛ̀ Ninifuu pɔntɛ. 5 Kɛ̀ Ninifu kɔbɛɛ yie nKuyie mbɛ̀ nɑ̀ɑ́ ntì kɛ dɑ́ɑ́tí tifɔ̀ɔ̀tɔ̃̀ntì, kɛ bo bɛnkɛ bɛ yɛ̀mmɛ̀ cɑ̀ɑ̀rɛ̀mɛ̀, kɛ̀ bɛ̀ɛ boú dinùù bɛnitidiɛbɛ̀ nɛ̀ bɛsɑ́mpɔ́bɛ̀. 6 Kɛ̀ Ninifu kóo kpɑ̀ɑ̀tìi tì kèè kɛ́ítɛ́ o kpɑ̀ɑ̀tìkɑ̀rì kɛ́dɑ́tɛ́ o kpɑ̀ɑ̀tìyɑ̀ɑ̀tì kɛ́dɑ́ɑ́tí kufɔ̀ɔ̀tɔ̃̀nkù kɛ́nkɑri ditɑ́pùò ĩ́nkɛ̀, 7 kɛ́duɔ́ nkɛ̀ bɛ̀ɛ pĩɛ̃kɛ́ dihɛì kɛ dɔ̀: Okpɑ̀ɑ̀tì nɛ̀ o tũ̀mbɛ̀ bɛ̀ tu bɛnìtìbɛ̀ nɛ̀ iwũɔ̃ dɛ̀ bɑ́ɑ́ dɛ́útɛ́ dɛ̀mɑrɛ̀ dɛ̀ mɛ mbɑ́ɑ́ yɑ̃̀ mɛniɛ. 8 Bɛnìtìbɛ̀ nɛ̀ iwũɔ̃ dɛ̀ɛ dɑ́ɑ́tí tifɔ̀ɔ̀tɔ̃̀ntì, bɑ́ wè kòò kuɔ́nnɛ̀ Kuyie nnɛ̀ o wɛ̃rímú mumɔu kɛ́yóu o yɛi nnɛ̀ kuyonku. 9 Kɛ̀ dɛ̀ nɑɑti Kuyie nyɛ̀mmɛ̀ɛ ceetɛ, kɛ̀ kùu bónkùnnɛ ku miɛkɛ kɛ̀ ti bɑ́ɑ́ kú.

10 Kɛ̀ Kuyie nyɑ̀ bɛnìtìbɛ̀ yóumɛ̀ bɛ yɛi nkɛ́yóu kù tɛ̃́nkɛ í mbɛ̀ potɛ́ kù do yɛ̃ nkù yóó bɛ̀ potɛ́mɛ̀.