1 Kɛ̀ Sosuwee kótɛ́ kɛ̀ ti Yiɛ̀ nKuyie nhò nɑ̀kɛ́ kɛ dɔ̀: A kòtɛ́mu mɛdiɛ̀ nkɛ̀ yɛhɛkɛ̀ kpɑɑ́ sũ ɑ dò nkɛ́tiekɛ yɛ̀. 2 Fidisitɛ̃ɛ̃bɛ nɛ̀ Kesuriibɛ kó itempɛ̃. 3 Kɑnnɑhɑ̃ɑ̃ kɔbɛ kó kɛtenkɛ̀ kɛ̀ɛ̀ ketɛ́ kukó nSiɔɔri nɛ̀ Esibiti kɔbɛ dɛ̀ mɑ̀nku, kɛ́tuɔkɛ Ekunɔɔ kubɑkù yoú. Fidisitɛ̃ɛ̃bɛ kó bɛkpɑ̀ɑ̀tìbɛ̀ bɛnùmmù borɛ̀, kɛ̀ bɛ ɛkɛ̀ diɛyɛ̀ tu: Kɑsɑɑ nɛ̀ Asidɔti nɛ̀ Asikɑnɔɔ nɛ̀ Kɑti nɛ̀ Ekunɔɔ nɛ̀ Afiibɛ kó kɛtenkɛ̀, 4 kɛ́túótɛ́ kubɑkù cɑ̃̀nku bíɛ́kɛ̀ Kɑnnɑhɑ̃ɑ̃ kɔbɛ kó kɛtenkɛ̀ kɛmɔu, kɛ́túótɛ́ Adɑɑ Sidonniibɛ kó kɛtenkɛ̀ kɛ́tuɔkɛ Afɛki, nɛ̀ Amɔriibɛ dɛ mɑ̀nku. 5 Kebɑɑdi kó kɛtenkɛ̀ nɛ̀ Dimɑɑ diyiè yìɛ̀ní kɛ̀ɛ̀ bíɛ́kɛ̀, kɛ́túótɛ́ Bɑdikɑɑdi Ɛdimɔɔ tɑ̃rì pɛ̃ri, kɛ́tuɔkɛ Debo Amɑti. 6 Nɛ̀ ditɑ̃rì kó yɛhɛkɛ̀ yɛ̀ɛ̀ bo Dimɑɑ nɛ̀ Misifɔɔ-Mɑyimmu dɛ cuokɛ̀, Sidonniibɛ bɛmɔu ɑ̃ yɛ̀. Kɛ̀ ti Yiɛ̀ nKuyie mbɛ́i nkɛ dɔ̀: N yó nni kɛ bɛ̀ bɛ̀tìmu kɛ̀ di tũ. Kɑ̀ɑ totí Isidɑyɛɛribɛ dɛ kó yɛhɛkɛ̀ kɛ́ndònnɛ̀ n tì ndi nɑ̀kɛ́mɛ̀.

7 Totí dɛ kó kɛtenkɛ̀ Isidɑyɛɛribɛ ibotí iwɛì nɛ̀ Mɑnɑnsee botí kɔbɛ kó dikéè.

8 Mɑnɑnsee botí kɔbɛ kó dikéè nɛ̀ Dubɛnniibɛ nɛ̀ Kɑdiibɛ bɛ̀ do bɛ duɔ́mmu bɛ kó kɛtenkɛ̀ Suditɛ̃ɛ̃ yɑ́ɑ̀ diyiè yìɛ̀ní kɛ̀ɛ̀ bíɛ́kɛ̀. Mɔyiisi ti Yiɛ̀ nKuyie nkóo tɔ̃ntì weè do kɛ̀ mbɛ̀ totí. 9 Bɛ tenkɛ̀ mɑ̀nku do tú Adowɛɛ, kubɑkù cɑ̃̀nku bíɛ́kɛ̀, kɛ́yɛ̀nnɛ̀ kukó nhAdinɔ nɛ̀ dihɛì dìì sokɛ́ dɛ kó kubiriku dɛ cuokɛ̀, bɛɛ̀ do te nɛ̀ Mɛdebɑɑ Dibonni tɑ̃dɑ̀nkù. 10 Nɛ̀ Amɔriibɛ kpɑ̀ɑ̀tì diɛwè Sionni kó yɛhɛkɛ̀. Weè do bɑkɛ́ Ɛsibonni kɛ́tuɔkɛnɛ̀ Amɔniibɛ dɛ mɑ̀nku. 11 Bɛɛ̀ do te nɛ̀ Kɑdɑɑdi kó dihɛì nɛ̀ Kesuriibɛ kó kutempɛ̃ nnɛ̀ Mɑɑkɑɑ nɛ̀ Ɛdimɔɔ tɑ̃rì nɛ̀ Bɑsɑ̃ɑ̃ omɔu, kɛ́tuɔkɛ Sɑdikɑɑ. 12 Kɛ tenɛ̀ okpɑ̀ɑ̀tì Ɔku Defɑiibɛ botí kou sɔnwe kó kɛtenkɛ̀ weè do bɑkɛ́ Asetɑdoti nɛ̀ Etedeii Bɑsɑ̃ɑ̃ tempɛ̃ mmiɛkɛ. Mɔyiisi weè do bɛ̀ nɑ kɛ́cɔutɛ́ bɛ tenkɛ̀. 13 Isidɑyɛɛribɛ mɛ nyí mbɛ̀ti Kesuriibɛ nɛ̀ Mɑkɑtiibɛ, kɛ̀ bɛ̀ kpɑɑ́ bo bɛ cuokɛ̀ nɛ̀ yíenní.

14 Defiibɛ bɛɛ̀ mɑ́ɑ̀ do í mɔkɛ kɛtenkɛ̀ bɛ̀ do pɑ̃ɑ̃ nyɛ̀ɛ̀ pɑ̃rɛ̀ ti Yiɛ̀ nKuyie nyɛɛ̀ do tú bɛ kpɛrɛ kɛ́ndònnɛ̀ ti Yiɛ̀ nKuyie ndo tì mbɛ̀ nɑ̀kɛ́mɛ̀.

15 Ntɛnɛ̀ Mɔyiisi duɔ́mmɛ̀ Dubɛnniibɛ bɛ kó kɛtenkɛ̀ bɛ botí dòmmɛ̀. 16 Bɛ tenkɛ̀ mɑ̀nku do tú Adowɛɛ kubɑkù cɑ̃̀nku bíɛ́kɛ̀ kɛ́yɛ̀nnɛ̀ kukó nhAdinɔ nɛ̀ dihɛì dìì sokɛ́ dɛ kó kubiriku dɛ cuokɛ̀ bɛɛ̀ do te nɛ̀ Mɛdebɑɑ tɑ̃dɑ̀nkù kó kɛtenkɛ̀. 17 Nɛ̀ Ɛsibonni nɛ̀ yɛhɛkɛ̀ yɛmɔu yɛ̀ɛ̀ bo kutɑ̃dɑ̀nkù: Dibonni nɛ̀ Bɑmɔti-Bɑɑdi nɛ̀ Bɛtibɑdimɛɔ̃ɔ̃ 18 nɛ̀ Yɑɑsi nɛ̀ Ketimɔti nɛ̀ Mɛfɑɑ 19 nɛ̀ Kidiyɑtɑimmu nɛ̀ Simbemɑɑ nɛ̀ Sedesɑɑ dìì bɑkɛ́ kubiriku 20 nɛ̀ Bɛti-Pɛɔɔ nɛ̀ Disikɑɑ tɑ̃rì pɛ̃ri nɛ̀ Bɛti-Yesimɔti 21 nɛ̀ kutɑ̃dɑ̀nkù kó yɛhɛkɛ̀ yɛmɔu. Amɔriibɛ kpɑ̀ɑ̀tì Sionni wèè do bɑkɛ́ Ɛsibonni o kó yɛhɛkɛ̀ bomu dɛ miɛkɛ. Mɔyiisi weè do nɑ Sionni nɛ̀ Mɑndiyɑ̃ɑ̃ kpɑ̀ɑ̀tì, kɛ̀ bɛ̀ ndò nho kó tidɑɑtì kɛ bo o tenkɛ̀: Efii nɛ̀ Dekɛmmu nɛ̀ Tisuu nɛ̀ Uuri nɛ̀ Debɑɑ. 22 Opɑ̃ũ̀ Bɑdɑmmu Beɔɔ birɛ do kɔkɛ́mu Isidɑyɛɛribɛ kùɔ bɛ̀ miɛkɛ. 23 Suditɛ̃ɛ̃ weè do tú Dubɛnniibɛ tenkɛ̀ mɑ̀nku dɛ ììkɛ̀ bíɛ́kɛ̀. Bɛ̀ do bɛ̀ totí yɛ̀ɛ̀ ɛkɛ̀ bɛ botí dòmmɛ̀ yɛɛ̀ kó yɛyètɛ̀ tu ti yɑ̀ní yɛ̀.

24 Ntɛnɛ̀ Mɔyiisi duɔ́mmɛ̀ Kɑdiibɛ bɛ kó kɛtenkɛ̀ bɛ botí dòmmɛ̀. 25 Yɛɑsɛɛ nɛ̀ Kɑdɑɑdi kó kɛtenkɛ̀ kɛmɔu nɛ̀ Amɔniibɛ kó kɛtenkɛ̀ dikéè kɛ́tuɔkɛnɛ̀ Adowɛɛ ɛì dìì tɔ̀kɛ́nɛ̀ Dɑbɑɑ, 26 kɛ́túótɛ́ Ɛsibonni kɛ́ntɔ kɛ́tuɔkɛnɛ̀ Dɑmɑti-Misipee nɛ̀ Betonimmu kɛ́ntɔ kɛ́tuɔkɛnɛ̀ Mɑɑnɑimmu kɛ́ntɔ kɛ́tuɔkɛnɛ̀ Debii tenkɛ̀ mɑ̀nku. 27 Nɛ̀ Suditɛ̃ɛ̃ kó kubiriku nɛ̀ Bɛti-Adɑmmu nɛ̀ Bɛti Nimudɑ nɛ̀ Sukɔti nɛ̀ Sɑfɔ̃ɔ̃ nɛ̀ Sionni nɛ̀ Ɛsibonni kpɑ̀ɑ̀tì do bɑkɛ́ yɛ̀ɛ̀ ɛkɛ̀. Dɛ kó yɛhɛkɛ̀ do bo Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ nkɛ, kɛ tú bɛ mɑ̀nku kɛ́tuɔkɛnɛ̀ Kinnɛdɛti kóo dɑ̀mɛ́ɛ̀rì kubɑkù yoú. 28 Bɛ̀ do totí yɛ̀ɛ̀ ɛkɛ̀ nyɛ Kɑdiibɛ bɛ botí dòmmɛ̀.

29 Ntɛnɛ̀ Mɔyiisi duɔ́mmɛ̀ yɛhɛkɛ̀ Mɑnɑnsee botí kɔbɛ kó dikéè bɛ botí dòmmɛ̀. 30 Bɛ mɑ̀nku do tú Mɑɑnɑimmu kubɑkù cɑ̃̀nku, kɛ́túótɛ́ Bɑsɑ̃ɑ̃ Ɔku kpɑ̀ɑ̀tì tenkɛ̀ kɛmɔu, nɛ̀ yɛhɛkɛ̀ sipísìkuɔ̀ yɛ̀ɛ̀ bo Yɑii tempɛ̃ mmiɛkɛ, 31 kɛ́túótɛ́ Kɑdɑɑdi ɛì kó dikéè nɛ̀ Asetɑdoti nɛ̀ Etedeii nɛ̀ Ɔku Bɑsɑ̃ɑ̃ kpɑ̀ɑ̀tì ɛkɛ̀ diɛyɛ̀ do tú yɛ̀, kɛ́duɔ́ ndɛ kó kɛtenkɛ̀ kɛmɔu Mɑnɑnsee yɑɑ̀birɛ Mɑkii bí dikéè.

32 Mɔyiisi do bo Mɔɑbu biriku nku Sedikoo diyiè yìɛ̀ní kɛ̀ɛ̀ bíɛ́kɛ̀ kɛ́ bɛ̀ totí dɛ kó kɛtenkɛ̀. 33 Mɔyiisi do í duɔ́ nDefiibɛ kɛtenkɛ̀, ti Yiɛ̀ nKuyie nyIsidɑyɛɛribɛ tũ nkù kuù do tú bɛ kó ticɔ̃nti kɛ́ndònnɛ̀ kù do ti mbɛ̀ nɑ̀kɛ́mɛ̀.