N Yiɛ̀ nKuyie nkuù m mí kɛ n dɛɛrí, n yí yĩɛ̃̀kù òmɔù.

N Yiɛ̀ nKuyie nkuù kɑ̃nkɛ́ n fòmmu, n yí dé òmɔù.

2 Kɛ̀ bɛnitiyɛibɛ n tɔ̀ɔ́nnɛ̀,

kɛ dɔ́ kɛ́ n cɑ́ɑ́kɛ́ tikpɑsĩ̀ntì kɔ̃mɛ.

N dootitɔbɛ̀ bɛ̀ɛ̀ n wɑnti,

bɛɛ̀ yóó bétɛ́ kɛ́duó kɛtenkɛ̀.

3 Bɑ́ kɛ̀ fɛkpɑ̀rìnɑfɛ n dintɛ́, kufɔ̃wɑɑ́ mbɑ́ m pĩ́,

kɛ̀ n dootitɔbɛ̀ dɔ́ kɛ́ n dokɛ́nɛ̀,

m bɑɑ nyĩkú ɑ ĩ́nkɛ̀ nkɛ.

4 N dɔ́ dɛ̀mɑrɛ̀ mɑ́ɑ̀ ndi mɛdiɛ̀ nkɛ dɛ̀ mɔ̀ú ti Yiɛ̀ nKuyie:

M bo mbomɛ̀ ku cĩ́ɛ̃̀tɛ̀ miɛkɛ sɑ̃́ɑ̃̀,

kɛ wúó nku sɑ̀ɑ̀,

kɛ dɑkɛ ku cĩ́ɛ̃̀tɛ̀ kpɛ́í.

5 Dɛǹdɛ kù yóó nni nkɑ̃nkɛ́mɛ̀ mɛyɛi ndiyiè yɛiri yiè,

kɛ̀ nní nsɔri ku cĩ́ɛ̃̀tɛ̀,

kɛ̀ kù n dee nku pèrì ĩ́nkɛ̀,

mɛyɛi nyí yó n nintɛ dɛ̀.

6 N sĩ́ĩ́mmu n dootitɔbɛ̀ bɛ̀ɛ̀ n fitɛ́,

n yóó fíému yɛsɑ̃ɑ̃ nkó iwũɔ̃ ku cĩ́ɛ̃̀tɛ̀ kɛ́ndiè,

kɛ́dɛ́úkùnko ku yètìrì.

7 Áú n Yiɛ̀ nKuyie! N kuɔ́ mmɛsémmɛ̀ kɛ́ n teennɛ̀,

n kuɔ̀nnɛ̀ fɔ̃́ nwe, n kéntɛ́.

8 N dèntɛní ɑ bɛ́i ntì nti kɛ tú: N wɑmmúnɛ̀!

N Yiɛ̀ nKuyie, n dɑ wɑɑ̀mmu.

9 Bɑ́ m bútínnɛ́, ɑ miɛkɛ bɑ́ m pɛikɛ,

fɔ̃́ nwèè n dɛɛrí bɑ́ m bɔntóo.

Bɑ́ n yóu fɔ̃́ n Yiɛ̀ nKuyie,

fɔ̃́ɔ̃̀ n dɛɛrí.

10 N cicɛ nɛ̀ n yɔ̃ kɛ̀ bɛ̀ n dootóo,

fɔ̃́ nyó n cɔutɛ́mu.

11 N Yiɛ̀ nKuyie, m bɛnkɛ ɑ cɛ,

n dootitɔbɛ̀ bɛɛ̀ bo,

n niitɛ́ kucɛ sɑ̀ɑ̀kù.

12 Bɑ́ɑ́ yóu kɛ̀ n dootitɔbɛ̀ n dɔ̀ɔ̀ bɛ̀ dɔ́mɛ̀,

bɛ̀ sɔ̃̀ńtɛ́ kɛ n wɑ́tìrìmu,

bɛ̀ dɔ́ mɛyɛi ndɔɔ̀rìmù mmu sɑ̃́ɑ̃̀.

13 Dɛ̀ nɑ nni ndòmmɛ

kɛ̀ n do í yɛ̃́ kɛ dò m bo yɑ̀ ɑ kó mɛsɑ̀ɑ̀ kɛtenkɛ̀ kiɛ ĩ́nkɛ̀?

14 A mbúɔ́ Kuyie, kpénkùnnɛ ɑmɑ́ɑ̀,

yɑ́úkùnnɛ ɑ kɔ̃̀ntì, mbúɔ́ Kuyie.